Sápmi |

Njuorggáma ođđa skuvla-máŋggadoaimmadállu lea dál ceagganeamen – galggašii gárvvásmuvvat golggotmánu lohppii

Njuorggáma ođđa skuvla-máŋggadoaimmadálu huksenbarggut leat joatkašuvvan. Ovddit huksejeaddji koŋkánii mannan čavčča, ja dan dihtii huksen lea ádjánan. Ođđa fitnodat álggahii huksenbargguid miessemánu álggus.

Video: rakennustyömaa nuorgamin koulu
Geahča, go Njuorggáma skuvlla ceggejit. Video: Anneli Lappalainen, Kirsti Länsman / Yle

Njuorggáma skuvla-máŋggadoaimmadállu ceaggana dál olles fártta, go ođđa huksenfitnodat álggahii bargguidis miessemánu álggus.

Ohcejoga gielda dieđihii golggotmánus 2020, ahte Njuorggáma ođđa skuvla-máŋggadoaimmadálu huksejeaddji Keco Oy -huksenfitnodat lea koŋkánan. Fitnodat gearggai álggahit huksenbargguid.

Dál gielda lea fidnen ođđa huksenfitnodaga ja huksenbarggut leat ovdánan bures, muitala Ohcejoga gieldda huksendárkkisteaddji Markku Porsanger. Ođđa fitnodahkii leamašan ávki ovddit fitnodaga elemeanttain ja vuođđobargguin. Áigedávvalii bohte goittotge nuppástusat, muitala Porsanger.

– Álgoálggus lei hui čavga áigedávval, ahte skuvllat galggašedje álgit ođđa skuvllas. Muhto dan háve mii gárttaime dies vehá addit vuollái ja golggotmánu lohppii dat galggašii leat gárvvis.

Markku Porsanger
Ohcejoga gieldda huksendárkkisteaddji Markku Porsanger illuda go huksenbarggut ovdánit. Govva: Anneli Lappalainen / Yle

Huksenbargguid ollašuhttá dál huksenfitnodat Rakennusliike Holmberg Oy, mii lea Avvilis eret.

Huksendárkkisteaddjis lea bunci ravgan máŋgii – dál goittotge buriin mielain

Huksendárkkisteaddji Markku Porsanger muitala, ahte ođđa skuvla-máŋggadoaimmadálu huksenprošeakta lea leamaš mohkkái ja bunci lea ravgan máŋgii.

– Muhtumin orru miella ahte dál gal ferte jo šluhttet obba hommá, muhto gal dat álo manai ovddosguvlui, ja dálhan gal lea buorre dilli ja aisttan buorre miellage.

Porsanger lea buriin mielain maiddái gieldalaččaid bealis. Ohcejoga gieldda skuvllat ledje boarásmuvvan ja heittot ortnegis, muhto farga maiddái njuorggánlaččat besset illudit ođđa skuvllas.

– Dat lea buorre, ahte mánáide boahtá dorvvolaš skuvlavázzinbálggis.

Guldal dá Ohcejoga gieldda huksendárkkisteaddji Markku Porsanger jearahallama. Jietna: Anneli Lappalainen / Yle

Njuorggáma skuvla sulastahttá Ohcejoga ja Gáregasnjárgga skuvllaid – okta earru goittotge

Vaikko huksenbarggut leat ovdánan bures ja sáhttá lohkat skuvla-máŋggadoaimmadállu lea juo dáluvuohkái, de dál barggut easkka álget, muittuha Porsanger.

– Dies leat olu siskkáldas barggut vel ja dieđusge olggobealde maiddái, ahte dat manná čakčii guhkás ovdal go dat lea dien láhkai, ahte sáhttá váldit atnui.

Njuorggáma ođđa skuvla sulastahttá Ohcejoga ja Gáregasnjárgga skuvllaid. Gieldda huksendárkkisteaddji Markku Porsanger mielde dat lea leamaš dárkkuhusge.

– Visot dát gieldda visttit galget leat sullii seamma vuogi mielde plánejuvvon ja sullii seammaláganat ivnniid dáfus vai olbmot dihtet, ahte diet leat gieldda visttit.

Vaikko Njuorggáma skuvla sulastahttá Ohcejoga ja Gáregasnjárgga skuvllaid, lea dat goittotge uhcit. Njuorggámis eai leat seamma olu oahppit dál, eaige rehkenastimiid mielde boahttevuođasge.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä