Sápmi |

Njuorggáma ođđa skuvla-máŋggadoaimmadálu huksejeaddji koŋkánan – gielddahoavda jáhkká ođđa vistti gárvvásmuvvama maŋŋonit

Gielddahoavda deattuha, ahte ođđa skuvla-máŋggadoaimmadálu áigot liikká hukset, vaikko huksenáigetávval sáhttáge rievdat.

Vuokko Tieva-Niittyvuopio
Vuokko Tieva-Niittyvuopio muitala, ahte gielda lea ráđđádallamin konkursabesiin. Govva: Kaisa Aikio / Yle

Keco Oy -huksenfitnodat lei válljejuvvon Njuorggáma ođđa skuvla-máŋggadoaimmadálu huksejeaddjin, muhto fitnodat lea koŋkánan. Fitnodat gearggai álggahit huksenbargguid.

Ohcejoga gielda ja konkursabeasi fuolaheaddji leat dál ráđđádallamin, mo dás ovddosguvlui. Gielddahoavda Vuokko Tieva-Niittyvuopio dieđuid mielde fitnodat lei beassan jo bures álgui huksenbargguiguin.

– Mii ráđđádallat das, ahte maid ja man olu konkursabeassi sáhttá vel bargat. Muhtin veardde leat jo elemeanttaiguin bargagoahtán, ja livčče áinnas buorre, ahte daid sáhtášii geavahit, muhto dan in dieđe, boahtágo dat lihkosmuvvat vai ii.

Gielda ii leat vuos mearridan, ohcetgo ođđa huksenfitnodaga vai mo áigot čoavdit dili. Sin ulbmilin goittotge lea, ahte ođđa skuvla-máŋggadoaimmadállu huksejuvvo.

Plánan lei, ahte visti livččii gárvvis giđa 2021 áigge. Gielddajođiheaddji ii máhte dán muttus vel árvvoštallat, man olu áigetávval boahtá rievdat, muhto jáhkká, ahte skuvlla gárvvásmuvvan maŋŋona plánejuvvon áigetávvalis.

– Muhto jus ovdamearkka dihte giđđat beasašedje hukset, de galhan dat várra oalle jođánit das gárvvásmuvašii, lohká Vuokko Tieva-Niittyvuopio.

Varrasamosat: Sápmi

Váldoođđasat

Varrasamosat

Muualla Yle.fi:ssä