Sápmi

Njuorggáma skuvlamánát vázzet vurrolágaid lávvoskuvlla – oahppi: "Buoremus lea, go oažžu leat duolji alde"

Nuorgamin laavukoulu
Luukas Pohjanrinne, Anni-Siviä Länsman ja oahpaheaddji Sisko Länsman leat návddašan das, go skuvlabeaivvi sáhttá doallat olgun. Govva: Vesa Toppari / Yle

Skuvlabeaivi lávus lea sihke ártet ja somá, dadjet Njuorggáma ovdaskuvllalaččat.

Njuorggáma skuvllas leat mearridan sirdit skuvlabeivviid olggos. Dan oidne buori čoavddusin, go skuvlla leat dán giđa vázzán eanaš ruovttus dihtora guoras ja skuvlavisttis leat maid sisáibmováttisvuođat.

Skuvlla šilljui, Deanu dearpmi ala lea ceggejuvvon lávvu álgoálggus giellabeassemánáid geavahussii. Dán lávu leat dál dán giđa beassan earátge skuvllalaččat geavahit.

Ovdaskuvllalaččat Anni-Siviä Länsman ja Luukas Pohjanrinne leaba álggaheamen eatnigiella diimmu.

– Buoremus lea, go oažžu leat duolji alde, muitala Anni-Siviä.

Anni-Siviä Länsman
Ovdaskuvllalaš Anni-Siviä Länsman lea liikon lávvoskuvlii. Govva: Vesa Toppari / Yle

Anni-Siviä oahpahallá, makkár sániin lea ie-diftoŋŋa. Luukas čohkká mohtorgielkáduhkorasa alde ja čállá. Soai beassaba duollet dálle geavahit lávu dábálaš skuvlalanjaid lassin. Oahpaheaddji Sisko Länsman čohkká nuppi duolji alde veahkeheamen.

– Mii leat vehá nugo vurrolagaid dáppe. Jos mis lea miella mannat sisa, de leat sáles dahje dáppe, muhto eat mii leat háliidan mannat sisa. Mii leat háliidan leat dáppe olgun, muitala Länsman.

Laavukoulu Nuorgamissa. Sisko Länsman ja Anni-Siviä Länsman.
Oahpaheaddji Sisko Länsman mielas skuvlabeaivi olgun lea hui suohtas Govva: Vesa Toppari / Yle

Boahtte čavčča Njuorggámis galggašedje álgit ođđa skuvlavistti huksenbarggut. Velá ii dieđe mo ja gos Njuorggáma skuvllalaččat besset čakčat doallat skuvlabeivviid.

– Eat dieđe vel, gosa mii mannat ovdal go oažžut ođđa skuvlla. Jáhkán, ahte go leat nu liikostan dasa lávvui, ahte kánske boahtit hui dávjá jearrat, ahte beassatgo mii boahtit fas deike, dadjá Länsman.

Vaikko lávus ii leatge beaŋka dahje pulpeahtta, Anni-Siviä mielas lávvoskuvla livččii sihkkarit buoret molssaeaktu, go gaskaboddosaš skuvlalatnja.

– Danne go dat lea ártet, dat lea somá ja doppe ii dárbbaš meastta dahkat maidige, moddjá Anni-Siviä Länsman.

Varrasamosat

Muualla Yle.fi:ssä