Säämi |

Nooveelháástu vuossâmuu čalluu čáálá Henna Aikio skiijpâst, purjâskárbást

Aikio halijdij jo pärnin kirječällen.

Henna Aikio
Vuossâmuš čällee vuárbádui já tom vuoitij Henna Aikio. Govva: Kirsti Länsman / Yle

Anarâškielâ seervi mediapargee Petter Morottaja piejâi joton nooveel čäällimháástu. Taat ij lahte monkin projektân, lii tuše Anarâš-loostâ hommá. Čällee uážžu 100 euro čäällim päälhi.

– Juurdân tast lii, ete ulmuuh njuškiiččii tubdâmettum kuávlun, miäcán, iätá Morottaja.

Vuossâmuš čällee vuárbádui já tom vuoitij Henna Aikio. Kuuđâs lijjii almottâttâm taan háástun. Sii kooskâst Petter Morottaja talle vuárbui netti vuárbumohjelmáin vuossâmuu čällee. Fáádá sun meid meridij, tot lii skiijpâ.

– Mun tuáivum, ete sust lii jo mottoomlágán juurdâ tast maid sunjin taat skiijpâ-sääni puáhtá mielân já maggaar nooveel täst šodâččij, muštâl Morottaja.

AKS mediapargee Petter Morottaja algâttij nooveelháástu.
AKS mediapargee Petter Morottaja algâttij nooveelháástu. Govva: Vesa Toppari / Yle

Henna Aikio halidij jo uccen kirječällen

Henna Aikio lii iiloost, ete viijmâg-uv sust lâi lukko.

– Mun jiem lah vissâ kuássin maiden vuáittám, illood Aikio.

Tállán ko ooinij taan háástu, te juurdân lâi, ete taas kalga peessâđ fáárun. Taat lii suu vuossâmuš nooveel.

– Jiem lah kuássin ovdil čáállám nooveel, jiem suomâ- jiemge sämikielân. Jiešalnees muu pärnivuođâ tuoivâáámmát lâi kirječällee, muštâl Aikio.

Fáddá-uv, skiijpâ, lâi sunjin aaibâs oomâs. Koolgâi sänikirjeest tállán tärhistiđ, maid taat meerhâš. Sun lii jo algâttâm čäällim. Tast puátá mielâkuvviittâs maainâs.

– Jiemhân mun veeltithánnáá tuše skiijpâst čääli, tot tuáimá inspiraatio kälden. Uáiniđ leš mii tast puátá, hundâruš Aikio.

Vala kiergân mieldi čäälliđ novellijd Anarâšloostân

Uđđâ čällee vuod vuárbáduvvoo, mutâ Henna Aikio uážžu sunjin valjiđ fáádá. Mieldi piäsá vala, mut tuáivumist ličij, ete čälleeh iä liččii hirmâd ennuv, lovmat lii šiev meeri.

– Jiem mun haalijd, ete čälleeh láá čuođij mield ulmuuh. Talle iä peesâ tagareh čäälliđ, kiäh olmânáál halijdeh, smiättá Morottaja.

Toh kiäh čäälih já uážžuh čalluus valmâšân, te sii nommâ sihostuvvoo meddâl. Čalluuh almostuveh Anarâšloostâst.

– Juurdân lii, ete jyehi anarâšloostâst almostuuččij ohtâ nooveel, nooveel háástu nooveel, arvâl Morottaja.

Anarâšloostâ paaldâst almostuvá meid “Loostâš”. Lostiist láá eenâb koveh ko mainâseh já almostuvá tuše neetist. LoostâšAnarâšlostâ kávnojeh tääbbin.

Nooveelháástu sahhiittâllâm kávnoo tast. Jietna: Yle areena

Varrasamosat: Säämi

Váldoođđasat

Varrasamosat

Muualla Yle.fi:ssä