Sápmi |

Nordea ii geassát ollásit Dakota Access Pipeline -huksemiin – Birassearvi sivaha álgoálbmotrivttiid rihkkumis

Nordea-báŋku ii áiggo investeret lasi fitnodagaide, mat duvdet oljobohcci huksema. Sii eai goittotge vuovdde oamastusaid eret.

olju öljy dakota
Golggotmánus go Ođđasat galledii Davvi-Dakota lei oljobohcci njulgen ain báhuid gaskan. Dál huksetkeahttá ii livččii go oassi mii galggašii bovrejuvvot Missouri deanu vuolil lahka Standing Rocka. Govva: Ewa-Mari Hedman / NRK Sápmi

Nordea-báŋku ii áiggo investeret šat lasi golmma fitnodahkii, mat leat mielde Dakota Access Pipeline -oljobohcci huksemis Davvi-Dakotas, Amerihkás.

Nordea Vásttolaš Investerema komitea (eŋg. Responsible Investment Committee) dahkan mearrádusa mielde Energy Transfer Partners-, Sunoco Logistics Partners- ja Philips 66 -fitnodagaide eai investere čuovvovaš guđa mánu áigge.

Nordea-báŋku áigu árvvoštallat dili ođđasit maŋimustá guđa mánu geažes.

Gáibidit plánet ođđasit, gokko geassit oljobohcci

Nordeas dieđihedje vuossárgga, ahte sii gáibidit fitnodagaid plánet ođđasit, gokko hukset oljobohcci álgoálbmogiid reserváhtaid lahkosiin.

– Min mearrádus vuođđuduvvá dieđuide, mat leat boahtán ovdan ságastallamiin fidnu čanusjoavkkuiguin. Mii leat gávnnahan, ahte fidnui laktáseaddji birasriskkaid árvvoštallamat leat dahkkon dego galgáge, lohká guovllus aiddo fitnan Sasja Beslik, gii lea Nordea vásttolaš investerema vástideaddji jođiheaddji.

Nordeas mieđihit, ahte gulahallan báikkálaš olbmuiguin fidnu olis ii leat lihkostuvvan.

– Mii leat ságastallan olbmuiguin báikki alde ja ságastallamiin bođii ovdan, ahte fidnui laktáseaddji ovttasbarggus báikkálaččaiguin leat leamaš váilevašvuođat, Beslik joatká.

“Mii háliidit buoridit fitnodagaid doaibmavugiid”

Nordeas muitalit, ahte sii háliidit váikkuhit daid fitnodagaid doaibmavugiide, maidda leat investeren ja buoridit sin bargovugiid, eaige danin geassát ollásit fitnodagaid investeremis.

Sii háliidit báicca geahččalit rievdadit fitnodagaid doaibmavugiid buorebun.

Mii bargat dan ovdamearkka dihte nu, ahte galledit fitnodagain ja ságastallat das, mo áššiid sáhttá buoridit, Nordeas dieđihit.

Nordeas muitalit, ahte danin oamastusaid vuovdin lea sin maŋimuš molssaeaktu.

“Nordea háliida sihke borrat gáhku, ja seastit dan”

Greenpeace-birassearvi ii dohkket dán čilgehusa.

Prošeaktajođiheaddji Rolf Lindahl mielas lea mearkkašahtti, ahte Nordea ain investere fitnodagaide, mat eai gudnejahte eiseváldiid mearrádusa bissehit oljobohcci huksema ja mat rihkkot álgoálbmotrivttiid.

– Dainna ahte dat ii vuovdde investeremiid eret, Nordea dohkkeha doaimmaid maid Ovttastuvvan Našuvnnat lea kritiseren. Nordea váikkuhivččii buot eanemus dainna, ahte dat geassádivččii ollásit prošeavttas, prošeaktajođiheaddji Rolf Lindahl Greenpeaces lohká.

Greenpeace-organisašvunna mielas Nordea ii váldde ovddasvástádusa váttisvuođain, mat laktásit Dakota Access Pipeline -oljobohcci huksemii.

– Go Nordea bisseha ođđa investeremiid dat mieđiha, ahte prošeavttas leat čuolmmat, muhto dat ii váldde ovddasvástádusa dain. Gažaldat lea das, mii lea ođđa ja boares investerema erohus. Nordea háliida sihke borrat gáhku ja seastit dan, Rolf Lindahl lohká.

Sámedáiddárat gáibidit Nordea geassádit investeremiin

Sámedáiddarat ja birasaktivisttat Suomas ja Ruoŧas čájehedje ovddit vahkus miela Nordea kantuvrraid ovddabealde.

Sii gáibidedje Nordea geassádit investeremiin, mat duvdet Dakota Access Pipeline oljobohcci huksema Davvi-Dakotas Amerihkás álgoálbmoteatnamiin.

Divvojuvvon 13.12.2016 Rievdáduvvon sátni ossosat oamastussan.

Varrasamosat: Sápmi

Váldoođđasat

Varrasamosat

Muualla Yle.fi:ssä