Sápmi |

Norga evttoha gieldit Deanu luossabivddu oalát boahtte gease – sivvan luossanáli heajos dilli

Suopma áigu guorahallat iežas oaivila ja vástidit Norgga evttohussii dán ja boahtte vahku áigge.

Tenon kalastus.
Guolásteaddjit šlivgo vel geassit 2020 Deatnogáttis. Boahtte gease dilli soaitá garrasit nuppástuvvat. Govva: Vesa Toppari / Yle

Norga evttoha gieldit Deanu luossabivddu čuovvovaš guolástanbadjái oalát luossanáli heajos dili dihtii. Áššis muitala eana- ja vuovdedoalloministeriija.

Norgga ja Suoma ministarat ráđđádalle Deanu luossanáliid dilis 26.2. Ráđđádallamiid maŋŋá Norga lea sádden Supmii evttohusa luosaid bivdogildosis, mii guoskkašii olles Deanu rádjejohkaguovllu.

Dasa lassin Norgga dálkkádat- ja birasdepartemeanta gieldá guolásteami Norgga beale oalgejogain ja Deanu vuolimus oasis. Norgga birasdepartemeanta lea maid sádden cealkinláhkai evttohusa Deanu luossabivddu gieldimis Deanuvuonas ja Norgga rittus njealji gieldda, Davvinjárgga, Davvesiidda, Gáŋgaviikka ja Bearalvági, guovlluin.

Evttohus sisttisdoallá geavadis olles dan guovllu, gos Deanu luosa bivdet. Eará guliid bivdonjuolggadusat bisošedje sullii seammán.

– Suopma lea deattuhan ráđđádaladettiin Norggain, ahte luossanáliid suddjendoaimmaid galgá dahkat olles luosa eallinbálgá guovllus jogas merrii. Ráddjehusat galget leat dásseveardásaččat Suoma ja Norgga iešguđet guolásteaddjejoavkkuid gaskkas. Dán geahččanguovllus mii váldit Norgga evttohusa hui duođas, dadjá eana- ja vuovdedoalloministtar Jari Leppä ministeriija dieđáhusas.

Diibmá Detnui gorgŋo vuollái bealli jagi 2018 luossamearis

Eana- ja vuovdedoalloministeriija muitala dieđáhusastis, ahte Suoma ja Norgga ráđđádallamat Deanu guolástannjuolggadusain leat ádjánan varas dutkandieđuid dihtii. Dain vuođul Deanu luossanáli dilli lea jođánit hedjonan moatte maŋimuš jagi áigge.

Skádjaseasanbohtosiid mielde Detnui gorgŋo mannan gease gođđat dušše badjelaš 14 000 luosa. Dat lea vuollái bealli jagi 2018 luossamearis, mii datge ii lean nu ráhpa.

Suopma áigu guorahallat iežas oaivila ja vástidit Norgga evttohussii dán ja boahtte vahku áigge. Evttohusa leat gieđahallan Deanu luossanáliid dikšunjoavkkuin ja Deanu guolástannjuolggadusaid ráđđádallangottiin, ja das áigot ráđđádallat maiddái Sámedikkiin.

Boahtte jagi guolástannjuolggadusat bohtet maiddái vel cealkinláhkai. Mearrádusa guolástanbaji 2021 ráddjehusain figget oažžut fápmui 1.5. rádjai.

Varrasamosat: Sápmi

Váldoođđasat

Varrasamosat

Muualla Yle.fi:ssä