Sápmi |

Norgga bieggamilloplánat olaše Suoma beallai – Stuorra elrávdnjelinnjá rájá rastá Ohcejoga gildii

Suoma St1 -bensenfitnodat goittotge lea gárvvis vihkkehallat geassádit eret bieggamilloplánain, jus leat doarvái buorre ákkat. Bieggamilluin ii leat makkárge ávkki ohcejohkalaččaide, oaivvilda Ohcejoga gielddastivrra lahttu.

Jari Suominen
Jari Suominen lohká, ahte sii leat ain smiehttamin ášši eaige leat dahkan vel loahpalaš mearrádusaid. Govva: Markku Ulander / Lehtikuva

Grenselandet AS lea plánemin hukset guokte bieggamillopárkka Nuorta-Finnmárkui Davvesiidda ja Deanu gielddaide. Bieggamillopárkkain livččii oktiibuot 350 bieggamillu. Bieggamillopárkka ollišlas fápmu livččege de 900 megawatta.

Suoma bensiidnafitnodat St1 lea dán fidnus fárus. Ođasmuvvi energiija doaimmajođiheaddji Jari Suominen dadjá, ahte St1 lea jurddašan leat fárus investerejeaddjin ja oamasteamin bieggafápmorusttegiid.

– Mii leat das fárus dan dihte, go álgoárvalusaid vuođul doppe lea erenoamáš buorre bieggadilli, ja dan dáfus dákkár árktalaš dimenšuvdna beroštahttá boahtte áiggi bieggafámu buvttadeami ektui.

Ulbmilin lea, ahte elrávdnji manná geavaheddjiide Norgga elrávdnjefierpmádaga bokte.

Plánat ollet maid Suoma beallai

Jos bieggamillopárkka plána ollašuvvá, dat livčče nubbin stuorámus bieggamillopárka Norggas.

Bieggamillopárkka plánat olahit maiddái Suoma beallai Ohcejoga gildii. Jari Suominen St1:žis muitala, ahte Norgga fierpmi ii geavat buot dan elrávnnji, maid bieggamillopárka buvttadivčče, ja danin oktan molssaeaktun livčče, ahte elrávdnji boađášii oassái Suoma bokte.

– Doppe gal galggašeimmet hukset ođđa fierpmi danin go dála fierpmit mat doppe leat, leat dolin plánejuvvon eanet čáhcefámu buvttadeami várás ja dat eai vealttekeahttá bastte dan kapasitehta dákkárin váldit vuostá.

ST1 huoltoasema
SUoma ST1 bensenstašuvdna lea mielde Grenselandet AS:a bieggamillofidnus. Govva: Jari Pelkonen / Yle

Grenselandet AS almmustahttán plána mielde ođđa elrávdnjelinnjá boađášii bieggamilloguovllus duoddaris Leavvajohkii (Levajokk) ja joatkkášii das Deanuleagi mielde Norgga bealde Ohcejoga guvlui, ja Ohcejoga girkosiidda buohta boađášii Suoma beallái.

Jari Suominen St1:žis ii váldde beali dasa, leago dat loahpalaš plána, baicce dadjá, ahte linnjáid leat plánemin ja smiehttamin.

– Dan galgat dasto fievrridit deikke máttás guhkesge mátkkiid, nu figgat de dasto vejolašvuođaid mielde ávkkástallat dála njáskkahagaid.

Bieggamilluin ii leat makkárge ávkki báikkálaččaide - hehtte boazodoalu

Suominen mielas Suoma beallai galggašii hukset dalán 400 kilovoltta linnjá, mii lea stuorát go dála linját leat. Geavadis dat dárkkuhivččii dan, ahte linnjá govdodat livččii 10 mehtera.

Ohcejoga gielddaráđđehusa lahttu Anni Ahlakorpi lea fuolas bieggamilloplána ja ođđa elrávdnjelinnjá váikkuhusain.

– Dat váikkuha deike min ealáhusaide issorasat, ja das ii livčče midjiide makkárge ávkki, dat dušše hehttešii. Dat eai leat dušše dákkár unna linját, dat hehtte boazodoalu ja eará elliid, ja dieđusge dathan eai leat čábbá.

Anni Ahlakorpi
Anni Ahlakorpi oaivvilda, ahte bieggamilluin leat dušše negatiiva váikkuhusat Ohcejohkii. Govva: Susanna Guttorm / Yle

– Mii geahččalit ovddidit turismma dáppe ja dat eai leat dat maid olbmot háliidit oaidnit. Nu oainnán, ahte dat dušše hehtte. Mii eat fidne das oba ruđage, Norgga beallai lohpidedje 10 bargosaji muhto min beallai eai boađaše datge, čilge Ahlakorpi.

Bieggamilloplánat leat ožžon negatiivvalaš vuostáiváldima báikkálaččain, muitala Anni Ahlakorpi.

– Maid mun lean facebookkas čuvvon ságastallama, nu in leat gal áidna gii vuosttilda dan ášši. In leat oaidnán ovttage dákkár kommeanta, mii livčče dan fitnu bealis leamašan.

St1 vuordá buriid ákkaid ovdal geassáda fitnus

Jos báikkálaččat vuostálastet, St1:žis vurdet buriid ákkaid ovdal go fitnodat geassáda fitnus.

– Dat lea das gitta, leatgo dat ovttaskas olbmot geat vuosttildit. Dat lea das gitta, mat dat sivat de leat. Dieđusge mii vihkkehallat dan de dáhpáhusaid mielde, lohká St1 ođasmuvvi energiija doaimmajođiheaddji Jari Suominen.

Rástegáisá
Nuvvos Áilegasas govvejuvvon davás, Rástegáissá davábeale eatnamat oidnojit. Bieggamillut ceaggánivčče Rástegáissá lagašduoddariidda. Govva: Jouni Aikio / Yle Sápmi

Bieggamilloprošeavtta dárkilis áigetávval ii leat vel dieđus. Jos plána áigot ovddidit, galgá dan váldit vuhtii maiddái eanagoddelága.

Beaiváduvvon 26.9.2017 dii 10:37: Bajilčálus lei álggus Norgga bieggamilloplánat olaše Suoma beallai –  Stuorra elrávdnjelinnjá rájá rastá Ohcejoga gildii.

Beaiváduvvon 26.9.2017 dii 15:30: Bieggamillopárkka ollišlas fápmu lea 900 MW.

Divvojuvvon 28.9.2017 dii 7:55:  Vuolimuš gova govvateaksta divvojuvvon. Ovdal logai, ahte bieggamillut ceagganivčče Rástegáissá ala. Divvojuvvon nu, ahte bieggamillut ceagganivčče Rástegáissá lagašguovlluide. 

Varrasamosat: Sápmi

Váldoođđasat

Varrasamosat

Muualla Yle.fi:ssä