Sápmi |

Norgga Juovlavuona fávlli áigot čiekŋudit – bivdet Suomasge cealkámušaid, go prošeakta sáhttá váikkuhit luosaide ja čázádahkii

Olbmuid cealkámušaid vuođul Suoma eiseválddit ožžot buoret gova das, makkár váikkuhusat Deanunjálmmi fávlli čiekŋudeamis sáhttet leat Suoma beallái.

Juovlavuona čiekŋudahttima birasváikkuhusaid čielggadeapmi gávdno Birasministeriija siidduin.
Juovlavuona čiekŋudahttima birasváikkuhusaid čielggadeapmi gávdno Birasministeriija siidduin. Govva: Birasministeriija siidduin govvejuvvon govva

Deanuleagis, Juovlavuonas doaibmá máilmmi nubbin stuorimus kvartsihttaruvke, Elkem Tana, ja dan dárbbuid várás Juovlavuona fávlli háliidit čiekŋudahttit.

Dál fanasjohtolaga buorideamis ja fávlli čiekŋudeamis Juovlavuonas Deanunjálmmi nuorttabealde lea gárvánan birasváikkuhusaid árvvoštallan.

Maiddái Suomas ja Suoma olbmuin bivdet cealkámušaid birasváikkuhusaid árvvoštallamis, muitala áššedovdi Essi Römpötti birasministeriijas. Supmii ášši guoská ovdamearkka dihte danin, go Deanunjálmmi bokte luosat gorkŋot earret eará Detnui ja dan oalgejogaide.

– Dát fidnu leamašan jođus guhkká. Suopma lea ovdal jo dáhtton Norgga čielggadit dárkilabbot dan, makkár váikkuhus prošeavttas lea ovdamearkka dihte luosaide ja gudjoriidda.

– Dál mii dutkat birasváikkuhusa árvvoštallama ja geahččat mo dat Suoma jearaldagat leat vuhtii váldojuvvon, muitala Römpötti.

Olbmuid cealkámušain lea mearkkašupmi

Juovlavuonas Deanu gielddas fávlli lea oaivil govddidit 120 mehterii ja čiekŋudit ovcci mehterii erret eará gálvofievrredanjohtolaga dorvvolašvuođa dihte.

Riddoeiseváldi Kystverket lea bivdán dán birasbargoplánas cealkámušaid ja maiddái Suoma bealde olbmuin lea vejolašvuohta cealkit oainnus dán doaimma birasváikkuhusain.

Birasministeriijas doivot olbmuid oaivvildit áššis.

– Olbmuid oaiviliid vuođul mii oažžut dárkilut gova das, mo fávlli čiekŋudahttin sáhttá váikkuhit Suoma beallái.

Áššebáhpáriidda sáhttá oahpásmuvvat davvisámegillii ja suomagillii birasministeriija neahttasiidduin. Áššegirjjit leat maiddái oaidninláhkái Ohcejoga gielddadálus. Áššis sáhttá cealkit Suoma birasministeriijai borgemánu 14. beaivve rádjai.

Norggas luonddugáhttejeaddjit leat ballan bodnigoaivuma dagahit katastrofa luosaide ja lottiide.

Varrasamosat: Sápmi

Váldoođđasat

Varrasamosat

Muualla Yle.fi:ssä