Sápmi

Norgga mearkadovdit veahkehit Suoma bolesiid boazosuolavuođaášši dutkamis Báišduoddaris  – mearkadovdit fitnan Suomas bolesiid veahkkin beannot vahku dassái

Lappi boles dutká ášši roava suolavuođa- ja vearistanrihkkosin.

Poliisin hihamerkki
Govva: Timo Nykyri / Yle

Moadde vahku dassá boles dieđihii, ahte Suoma bealde Báišduoddara bálgosis leat dutkamin boazosuolavuođa ja mearkarievdadeami. Lappi boles dieđihii dalle, ahte sii dutket ášši roava suolavuohtan.

Yle, NRK ja Ávvira dieđuid mielde bohccuid bealljemearkkaid livčče rievdadan sihke Suoma ja Norgga boazoeaiggádiid bohccuin. Mediaid dieđuid mielde gažaldagas sáhttet leat máŋgalogi bohcco.

NRK Sámi dieđuid mielde ášši dutkamis leat geavahan maid Norgga beale mearkadovdiid veahki. Norgga boazobolesa jođiheaddji Inger-Anita Øvregård duođašta, ahte sii leat fitnan Suoma bolesiid veahkkin Suomas miessemánus.

– Midjiide bođii veahkehanbivdda ovddit vahkuloahpas ja lávvardaga 9.5. mis fitne guokte mearkadovdi Suoma bealde, dadjá Inger-Anita Øvregård.

Øvregård ii muital dađe eanet dan, maid bolesat leat dán rádjái gávnnahan, go áššis dutkanovddasvástádus lea Suoma bolesis. Norgga bolesat leat goit čállán Suomas fitnamis sierra ráportta, mii lea sáddejuvvon Suoma bolesii.

NRK Sámi jearahallamis Øvregård namuha, ahte sii leat ožžon Norgga beale boazosápmelaččain muhtin váidagiid, mat gusket dán áššái. Váidagiid mearis son ii goit muital albmosii, muhto namuha ahte sii sáddejit dađistaga váidagiid Supmii, jus dat bohtet lasi.

– Man stuorisin ášši šattaš, ii sáhte vástidit, go dat leat dušše Suoma bolesat, mat sáhttet vástidit, dadjá Øvregård.

Suoma bolesat muitalit unnán áššis

Lappi boles lea sádden ovtta dieđáhusa Báišduoddara dáhpáhusas miessemánus. Dan mielde boles dutká Ohcejogas bohccuid bealljemearkkaid rievdadeami roava suolavuođa- ja vearistanrihkkosin. Bolesa mielde navdojuvvo, ahte suoláduvvon opmodaga árvu lea stuoris.

Báišduoddara bálggus dagai 3.5. bolesii rihkkusalmmuhusa, mas navde rievdadan bohccuid ja sirdán rievdaduvvon bohccuid sierra ellui. Bolesa mielde bálggus lea maid ieš geahččalan čielggadit ášši.

Go dutkan lea álgomuttus, de boles ii muital áššis eanet.

Guldal Inger-Anita Øvregård jearahallama Buorre iđit Sápmi -sáddagis Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä