Sápmi |

Norgga sámediggeráđđi rávve hilgut Deanu soahpamuša – "Dahkukonsultašuvnnat"

Norgga sámediggeráđđi rávve dievasčoahkkima hilgut ođđa Deanu soahpamuša. Sámediggeráđi lahttu Silje Karine Muotka dadjá, ahte šiehtadusas ii leat doarvái doarjja. Son gohčoda Norgga Sámediggi ja departemeantta ráđđádallamiid dahkukonsultašuvdnan.

Silje Karine Muotka
Norgga sámediggeráđi lahttu Silje Karine Muotka lea bidjan ovdan evttohusa Sámedikki dievasčoahkkimii, ahte hilgut Deanu soahpamuševttohusa. Govva: Kenneth Hætta

Sámediggeráđđi rávve hilgut Deanučázádaga luossašiehtadusa Norgga ja Suoma gaska, muitala Norgga Sámediggi dieđáhusastis.

– Dán šiehtadusas ii leat doarvái doarjja iige dat adnojuvvo doarvái lobálažžan báikkálaččat, dadjá sámediggeráđi lahttu Silje Karine Muotka.

Son lea bidjan ovdan evttohusa Sámedikki dievasčoahkkimii, ahte hilgut Deanu soahpamuševttohusa.

– Go mii dál bidjat ovdan evttohusa Sámedikki dievasčoahkkimii ahte hilgut soahpamuševttohusa, de lea min árvvoštallan ahte dievasčoahkkima nana evttohus lea nanus Stuorradikki árvvoštallama ektui dán soahpamuševttohussii. Sámediggeráđđi áigu maid čađahit čoahkkimiid Suoma bealde Sámedikkiin ja Norgga ja Suoma bealde vuoigatvuođalaččaiguin dán áššis, dadjá Muotka.

"Vuoigatvuođalaččat galget beassat hábmet evttohusa"

Sámediggeráđi oaidnu lea, ahte guoskevaš vuoigatvuođalaččat galget oažžut vejolašvuođa hábmet Deanu soahpamuševttohusa.

Das galggašii sámediggeráđi oainnu mielde fuolahuvvot buorebut, ahte vuoigatvuođalaččat besset váikkuhit soahpamuša hálddašeapmái ja muddemiidda.

– Buohkat leat ovttamielalaččat das, ahte bivddu ferte geahpedit gaskaboddasaččat nannen dihtii bivddu vuođu buorebut boahtteáigái, muhto dat ferte dahkkojuvvot govttolaččat sihkkarastin dihtii árbevirolaš bivddu. Viidáseappot lea sámediggeráđi oainnu mielde deaŧalaš ahte báikkálaš olbmot, geat ásset lahka resurssa, galget vuoruhuvvot nu bures go vejolaš bivddu geahpedeami oktavuođas, dadjá Silje Karina Muotka.

"Dahkukonsultašuvnnat"

Norgga Sámediggi lea čađahan konsultašuvnnaid departemeanttain dán áššis.

Ráđđelahtu Silje Karine Muotka mielas departemeanta lea goittotge juo ovttabeallásaččat mearridan doarjut Deanu soahpamuša dálá hámis.

– Mu oainnu mielde dát ledje dahkukonsultašuvnnat. Konsultašuvnnain Sámediggi bijai ovdan konstruktiiva evttohusaid das mo sáhtášii sihkkarastit báikkálaš doarjaga ja dárbbašlaš lobálašvuođa šiehtadussii.

– Dađibahábut ii beroštan stáhtačálli Lunde oppanassiige árvvoštallat Sámedikki evttohusa. Dat čájeha ahte gulahallanávžžuhus buriid ja ovttamielalaš čovdosiid birra mat leat konsultašuvdnašiehtadusas, čuovvoluvvojit váilevaččat departemeantta politihkalaš njunušgotti bealis, dadjá Muotka. 

Varrasamosat: Sápmi

Váldoođđasat

Varrasamosat

Muualla Yle.fi:ssä