Sámepolitihkka |

Norgga stáhtačálli: Suoma eiseváldit gáibidedje ođđa rivttiid Deanuleagi bártaeaiggádiidda

Dálkkadat- ja birasdepartameantta stáhtačálli Lars Andreas Lunde (Høyre) čilge NRK Sápmái makkár ráđđádallamat sis leamašan Norgga Sámedikkiin Deanu soahpamuša birra. Seamma oktavuođas son čuoččuha, ahte Norga fertii dohkkehit Suoma eiseváldiid gáibádusaid, go sii hálidedje ođđa rivttiid Suoma bártaeaiggádiidda.

Dálkkadat- ja birasdepartameantta stáhtačálli Lars Andreas Lunde (Høyre)
Dálkkadat- ja birasdepartameantta stáhtačálli Lars Andreas Lunde (Høyre) biehttala iežaset dušše dahkaluddan, go leat konsulteren Deanu soahpamuša birra Norgga Sámedikkiin. Govva: NRK

Dálkkadat- ja birasdepartameantta stáhtačálli Lars Andreas Lunde (Høyre) biehttala iežaset dušše dahkaluddan, go leat konsulteren Deanu soahpamuša birra Norgga Sámedikkiin.

Lunde lohká iežas leat váldán duođas sámediggeráđi oaiviliid ášši hárrái.

– Muhto go eat leat ovttaoaivilis singuin, de eat sáhte dohkkehit sámediggeráđi árvalusaid álggahit áibbas ođđa šiehtadusaid. Deanu soahpamuševttohus lea dárbbaslaš, jos galget sáhttit gáhttet Deanu čázádaga luossanáliid, dadjá Lunde.

Norgga sámediggeráđi Silje Karine Muotka gohčodii duorastaga Norgga Sámediggi ja departemeantta ráđđádallamiid Deanu soahpamušas dahkukonsultašuvdnan.

Stáhtačálli: Suoma eiseváldit gáibidedje ođđa rivttiid Deatnogátti bártaeaiggádiidda

Seamma jearahallamis stáhtačálli Lars Andreas Lunde čuoččuha, ahte Norga gárttai miehtat Suoma eiseváldiid gáibádusaide addit ođđa rivttiid olgobáikegoddelaš giddodatoamasteaddjiide, geat eai fásta oro Ohcejogas.

– Šiehtadallama lundui gullá váldit ja addit. Danin fertii Norga dohkkehit Suoma eiseváldiid, go leat gáibidan ođđa vuoigatvuođaid Suoma bártaeaiggádiidda, dadjá Lunde.

Dát bártaeaiggádat eai šat rehkenasttojuvvo turistan, muhto galget leat ovttadássásaččat guovllu stággobivdiiguin.

Bártaeaiggádat besset registreret fatnasa ja sin bivdojándor lea olles jándor iige 17 diimmu dego turisttain. Maiddái 11 000 oaggunlobis várrejuvvo goalmmátoasi dihtomearri sidjiide, geain lea dállu ja guolástanriekti Detnui, muhto geat eai oro fásta Deanuleagis.

Per Holm Varsi
Govva: Erlend Leithe / NRK
Guolásteaddji Per Holm Varsi Sirpmás moaitá bártaeaiggádiidda addojuvvon rivttiid.

– Dat ii veahket, jos báikki olbmuin geahpedit vuoigatvuođaid ja sii geahpedit bivddu, go earát ožžot seamma vuoigatvuođaid, geat olggobealde bohtet. Hui buorre go Norgga Sámediggi lea váldán dan ášši bajás, Varsi dadjá.

Muotka: Báikkálaš olbmot fertejit vuosttažettiin beassat bivdit

Sámediggeráđi lahttu Silje Karine Muotka dadjá NRK Sápmái, ahte soahpamuševttohusas ii leat doarjja iige legitimitehta.

– Nu mo mun dulkon riekteguoddiid ja Deanu ássiid, nu sin oaivil lea, ahte báikkálaš olbmot fertejit vuosttažettiin beassat bivdit ja de jos ferte unnidit bivddu – nu mo mii buohkat vuhtiiváldit, ahte lea dehalaš vai beassá bivdit eanet boahtteáiggis – de galget riektiguoddit ja báikkálaš berošteaddjit beassat vuosttažettiin ávkkástallat resurssa, Muotka dadjá.

Silje Karine Muotka
Govva: Kenneth Hætta
Muotka moaitá dan, ahte turisttat bohtet ja ávkkástallet Deanu resurssa.

– Sis ii leat seamma dárbu go báikkálaš olbmuin eaige seamma vuoigatvuođat. Sii leat dat joavku, mas min mielas galggašii eanemus unnidit bivddu.

Guldal jearahallamiid duorastaga Sáhkaváibmosis-prográmmas.

Varrasamosat: Sámepolitihkka

Váldoođđasat

Varrasamosat

Muualla Yle.fi:ssä