Sápmi |

Norggas Ánnejogas bivdet garra vugiiguin ruoššaluosaid eret – Beaivvis bivdet juoba 1000 guoli eret

Ruoššaluosat leat laskan Ánnejogas. Dál juohke beaivve máŋgalogi olbmo bivdet daid eret firpmiiguin ja nuhtiiguin ja bajidit luossatráhpain hoavaiguin.

Ari Anttila
Ari Anttila muitala, ahte sii leat hoavaiguin lokten 250–1100 ruoššaluosa beaivvis. Sii gurrejit luossatráhpaid oktii beaivvis. Govva: priivaat

Várjjatvuona gáttis Ánnejogas sihke báikkálaččat ja turisttat barget garra vugiiguin dan ovdii, ahte ruoššaluosat eai beasaše johkii. Báikkálaš oahpaheaddji ja guolásteaddji Ari Anttila lea čuvvon ja leamašan mielde dain doaimmain.

Jagis 2019 ruoššaluosat laske Ánnejogas ja dalle einnostedje, ahte jagis 2021 dat livčče vel eanet, ja nu dat geavaige.

Anttila muitala, ahte ruoššaluosat gorgŋo dán jagi vuosttaš háve luossatráhpaid bajás, ja danin sii fertejedje bidjat luossatráhpaid gitta ja giddet bajimus áldá nu, ahte čáhci golgá čađa muhto guolit eai.

– Dasto go tráhpat leat dievva, mii bidjat dan bajimus oasi gitta. Dasto lea vejolaš hoavaiguin loktet daid guliid doppe eret, son čilge.

Luossatráhpaid sii gurrejit oktii beaivvis. Anttila muitala, ahte sii leat hoavaiguin lokten 250–1100 ruoššaluosa beaivvis. Dasa lassin sii leat maiddái firpmiiguin ja nuhtiiguin guolástan ruoššaluosaid eret.

Kutuvalmiita ja elävänä mätänemään alkaneita kyttyrälohia Näätämöjoesta Norjasta Kolttakönkään alapuolelta 14.8.2019.
Ruoššaluosaid eallin lea guovttejahkásaš. Dat jápmet gođđama maŋŋá. Govva: Tapani Leisti / Yle

– Ruoššaluosaid hivvodat dagaha dan, ahte juohke beaivve galget leat badjel 20–30 olbmo bargamen daid dihte. Mii háliidit, ahte ráđđehus ja earát geaidda dát guoská, plánegohtet juo dál jagi 2023.

Moadde beaivve dássái sii buokčaledje ja rehkenaste ruoššaluosaid meari joga vuosttaš guoikkas merrii. Dan moadde kilomehtera mátkkis ledje sullii 15 000 ruoššaluosa, vaikko sii leat hui olu daid juo goddán.

Anttila muitala, ahte sii leat maiddái dutkan borrago ruoššaluossa Atlánttaluosa veajehiid. Sii leat rahpan badjelaš 600 ruoššaluosa čoavjji, eaige ovttasge lean čoavjjis luosaveajehat.

– Oalle sihkkarit mii sáhttit dadjat, ahte dat ii bora luosaveajehiid, son lohká.

Go sii leat goddán ruoššaluosaid, ožžot báikkálaččat dasto viežžat daid nuvttá borramuššan.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä