Sápmi |

NRK: Boles gohcigoahtá eambbo olgoriikalaš biillaid ja bivnnuhis turistabáikkiid

Davvi-Norggas leat gártan maŋimuš beivviid áigge jáget eret duiskalaš ja hollándalaš turisttaid, mat leat boahtán lobiheamet riikii.

Karigasniemi 15.6.
Finnmárkku bolesis navdet, ahte duiskalaš turisttat leat boahtán Davvi-Norgii Suoma ja Baltia-riikkaid bokte. Govas Gáregasnjárgga tuollu. Govva: Linda Tammela / Yle

Máŋggat turisttat, geat leat johtán Finnmárkkus dán vahkus, leat jágehuvvon gaskaboddasaččat eret Norggas, muitala Norgga riikkaradio NRK. Turisttain ii leamaš lohpi rasttildit rájá ja boahtit Norgii.

Geassemánu 15. beaivve ložžii Norga rádjaráddehusaid nu, ahte ovdamearkka dihtii dánmárkolaččat ja suopmelaččat ožžo johtigoahtit Norggas. Dás fuolakeahttá Finnmárkku boles lea deaivan duiskalaš ja hollandalaš turisttaid. Boles leage ferten jáget sin eret riikkas.

Finnmárkku bolesis dieđihitge dál, ahte gohcigohtet dál eambbo olgoriikalaš turisttaid bivnnuhis turistabáikkiin.

Navdet, ahte turisttat bohtet Suoma bokte

Finnmárkku bolesis navdet, ahte duiskalaš turisttat leat boahtán Davvi-Norgii Suoma ja Baltia-riikkaid bokte.

Gaskavahku eahketbeaivve gávnnahalle guokte turistta Deanušalddis, geat leigga lobiheamet rasttildan rájá Norgii.

Norgga bolesis árvalit, ahte Suoma eiseválddit leat bidjan návccaid Ruota rájá gohcimii eaige gártta čuovvut johtolaga, mii boahtá Baltia-riikkain.

Varrasamosat: Sápmi

Váldoođđasat

Varrasamosat

Muualla Yle.fi:ssä