Koe uusi yle.fi
Sápmi |

NRK: Dál lea mearriduvvon ahte Norggas čielggadišgohtet dáruiduhttima

Eanaš oassi Norgga Stuorradikki bellodagain doarju evttohusa čielggadisgoahtit sámiid ja kveanaid historjjá.

Čuoldin
vuorkágovva Govva: Kirsti Helena Länsman / Yle

Norgga Stuorradikki vákšun- ja vuođđoláhkakomitea evttoha vuođđudit dutkanlávdegotti guorahallat sámiid ja kveanaid historjjá. Buot eará Stuorradikki bellodagat dorjot evttohusa, baicce Olgešbellodat ja Ovddádusbellodat.

– Vákšun- ja vuođđoláhkakomiteas lea eanetlohku lávdegotti bealis. Dát mearkkaša, ahte Stuorradikki dievasčoahkkimis lea eanetlohku. Nuba sáhtán oalle sihkkarit dadjat, ahte Stuorradiggi boahtte maŋŋebárgga boahtá dohkkehit dán, dadjá komitea njunuš Martin Kolberg NRK:ii.

Golbma jagi dassái evttohus bođii Sámediggái

Jagis 2014 bođii evttohus Sámediggái duohtavuohtakomišuvnnas dutkagoahtit sámiid ja kveanaid dáruiduhttima. Dáruiduhttin bisttii sullii 100 jagi 1800-logu beallemuttu rájes.

– Eat leat vel váldán beali dasa ahte galgágo dan namman šaddat duohtavuohtakomišuvdna, joatká Kolberg.

Kolberg mielde dál lea dehálaš čielggadit buot oainnuid ja duohtavuođaid sámiid ja kveanaid historjjás.

– Álbmoga historjjás lea mearkkašupmi das makkár dilis dat leat dán áigge. Lea čielggas, ahte leat olu áššit sámiid ja kveanaid historjjás, mat eai livčče galgan goassige dáhpáhuvvat. Muhto lea buorre, ahte oažžut parlamentaralaš lávdegotti man nammada riikka bajimus eiseváldi, Stuorradiggi, dadjá Kolberg.

Loga eanet áššiš NKR ođđasis dáppe.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä