Sápmi |

NRK: Norgga stuorámus báŋku ja oljofoanda dorjot Davvi-Dakota oljobohcci huksema

Oljobohcci huksen Davvi-Dakotas USA:s lea šaddan dál báhkka áššin Norggas. NRK Sámi dieđuid mielde sihke Norgga stuorámus báŋku ja oljofoanda dorjot stuorra ruđaiguin Davvi-Dakota oljobohcci huksema.

olju öljy dakota
Govva: Ewa-Mari Hedman / NRK Sápmi

Fargga golbma mánu leat ámerihkálaš eamiálbmogat ja earát doallan miellačájáhusaid Standing Rock Sioux reserváhtas Davvi-Dakotas USA:s. Sii vuostálastet plánejuvvon oljobohcci mii galggašii mannat sin guovllu čađa.

Beate Sjåfjell
Beate Sjåfjell Govva: Alem Zebic / NRK Brennpunkt

Dat nu gohčoduvvon Dakota Access Pipeline lea meroštallon máksit 3,3 miljárdda euro ja galggašii rasttildit njeallje oassestáhta. NRK Sámi dieđuid mielde prošektii lea Norgga stuorámus báŋku, Den Norske Bank, juolludan 333 miljovnna euro. Norgga Oljofoanda fas lea investeren oktiibuot 1,1 miljárdda euro fitnodagaide, mat leat mielde ráhkadeamen oljobohcci. Oslo universitehta juridihkkaprofeassor Beate Sjåfjell bivdá Norgga beroštumiid geassádit prošeavttas.

– Lea dupmehahtti, ahte norgalaččat leat mielde ná gažaldatvuloš prošeavttas, dadjá Sjåfjell NRK Sápmái.

DNB fuolas - oljofoanda ii kommentere

NRK Sápmi lea geahččalan oččodit Norgga Oljofoanddas jearahallama, muhto sii leat biehttalan. Sii vástidit šleađgapoastta bokte, ahte sii eai sáhte dadjat maidige ovttaskas fitnodagaid dahje ovttaskas prošeavttaid birra, muhto sii vurdet ahte fitnodagat doahttalit olmmošvuoigatvuođaid ja váldet vuhtii olmmošvuoigatvuođaid doaimmaineaset. DNB - Den Norske Bank diehtojuohkindirektevra Even Westerveld dadjá NRK Sápmái, ahte sii leat fuolas dálá dilis.

Even Westerveld DNB
Even Westerveld Govva: Ac Remen / NRK

– Mii leat jearran máŋga gažadaldaga ja mis lea lagaš dialoga áššehasaideametguin. Dássái eai leat duođaštuvvon olmmošvuoigatvuohtarihkkumat, muhto mii leat fuolas dálá dilis. DNB ii áiggošii heađisge ruhtadit olmmošvuoigatvuohtarihkkumiid, dadjá DNB Even Westerveld NRK Sápmái.

Norgga Sámedikki stivraláhttu Silje Karine Muotka fas dadjá NRK Sámi jearahallamis, ahte dat čilgehusat eai duhtat sin.

– Mun jáhkán, ahte dat mii lea dehálaš lea, ahte Norgga investorat ja Norgga fitnodagat fertejit čuovvolit olmmošlaš vuoigatvuođaid ja eamiálbmotvuoigatvuođaid maiddái olgoriikkas. Go lea sáhka eamiálbmotvuoigatvuođain, de mii diehtit ahte lea dakkár ovdánahttinbargu, masa mii fertet čađahit maiddái sisriikalaččat, dadjá Silje Karine Muotka NRK Sápmái.

Stuorámus čoahkkaneapmi goassige

Davvi-Dakota oljobohcci galgá huksejuvvot guovllu indiánareserváhta váldočáhcegáldu vuolil. Prošeavtta vuostálastet garrasit, ja miellačájáhusat leat jođus nu báikki alde go interneahtas sosiála mediasge.

standing rock sioux dakota
Govva: Ewa-Mari Hedman / NRK Sápmi

Báikki ala leat boahtán olbmot 500 sierra álgoálbmotčearddas. Goassege ovdal guovllu historjjás ii oktasaš dáhpáhus leat čohkken čearddaid dán lahkái oktii.

Standing Rockas leamašan maiddái veahkaválddálašvuođat gaskal bolesiid ja čázivárjaleaddjiid.

Bohccelinjjá huksemis lea šáddan symbolalaš birasgažaldat, mas máŋggat politihkkarat ja dáiddárat leat mielde bealušteamen álgoálbmogiid.

NRK Sámi čállosa gávnnat das: NRK Sápmi "KRIGEN OM «THE BLACK SNAKE»"

Varrasamosat: Sápmi

Váldoođđasat

Varrasamosat

Muualla Yle.fi:ssä