Sápmi |

NRK: Norgga Stuorradikki eanetlohku doarju duohtavuođakomišuvnna ásaheami

Norgga Bargiidbellodat lea almmuhan, ahte dat doarju duohtavuođa komišuvnna ásaheami ja dáruiduhttima váikkuhusaid guorahallama. De leage Norgga Stuorradikki eanetlohku mii doarju dan ášši.

Norjan Suurkäräjät
Govva: Norgga Stuorradiggi

Norgga stuorámus bellodat, Bargiidbellodat, doarju duohtavuođa komišuvnna ásaheami ja dáruiduhttima váikkuhusaid guorahallama muitala NRK Sápmi. Dat dárkkuha dan, ahte Norgga Stuorradikki eanetlohku doarju dan ášši. Norgga Stuorradiggi gieđahallá ášši 20. geassemánu.

– Mii leat gieđahallan dán ášši ja Bargiidbellodat doarju ovttamielalaččat duohtavuođakomišuvnna ásaheami, dadjá Bargiidbellodaga Stuorradiggeáirras Martin Kolberg NRK Sápmái.

Árabut leat Sosialistalaš Gurutbellodat (Sosialistisk Venstreparti), Kristtalaš Álbmotbellodat (Kristelig Folkeparti), Ruonábellodat (Miljøpartiet De Grønne) ja  Guovddášbellodat (Senterpartiet) almmuhan, ahte dorjot duohtavuođakomišuvnna ásaheami.

Ovddádusbellodat (Fremskrittspartiet) fas lea almmuhan, ahte ii doarjjo dáruiduhttima dutkama ja duohtavuođakomišuvnna ásaheami Olgešbellodat ii leat vel almmuhan maid oaivvilda áššis. Duohtavuođakomišuvnna bargu livččii  guorahallat mo sápmelaččat ja kvenat leat vásihan stáhta dáruiduhttinpolitihká.

"Dehálaš ášši sámiide"

Norgga Sámedikkeráđđi Inger Eline Eriksen Fjellgren (Árja) lea jođihan ášši gieđahallama Sámedikkis ja lea duđávaš dasa mo ášši dál ovdána Stuorradikkis.

norge sametinget norgga sámediggi norjan saamelaiskäräjät
Norgga sámedikki ráđđeláhttu Inger Eline Eriksen Fjellgren / Norjan saamelaiskäräjien hallituksen jäsen Inger Eline Eriksen Fjellgren Govva: Marit Sofie Holmestrand / NRK

– Lea hui buorre, ahte Stuorradiggi doarju duohtavuođakomišuvnna ásaheami. Dat čájeha maiddái dan, ahte Sámedikki rahčamušat dán proseassas leat váldon vuhtii.

29 organisašuvnna, daid joavkkus sihke sámi ja kvena organisašuvnnat, muitaledje iežaset oaiviliid rabas gullamis Stuorradikkis miessemánu beallemuttus. Bargiidbellodaga Martin Kolberg muitala NRK Sápmái, ahte ákkat mat bohtet ovdan gullamis dagahedje dan, ahte Bargiidbellodat mearridii doarjut komišuvnna ásaheami. Norgga Sámedikkeráđđi Inger Eline Eriksen Fjellgren deattuha ášši dehálašvuođa.

– Dat lea hirbmat dehálaš sámi álbmogii. Máŋgasat oaivvilidit, ahte Norgga stáhta ii leat čorgen dili doarvái bures dáruiduhttima maŋŋel, dadjá Inger Eline Eriksen Fjellgren NRK Sápmái.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä