Sápmi |

NRK: Pedersen čuoččuha eiseváldiid bálkkestan sin olggos Deanu soahpamušráđđádallamiin

Norgga bealde lea šaddan digáštallan das, leago Deanu čázádaga guolástanhálddahus beassan oassálastit Deanu soahpamuša loahppašiehtadallamiidda vai ii.

Steinar Pedersen
Deanu čázádaga guolástanhálddahusa jođiheaddji Steinar Pedersen Govva: Åse Pulk / Yle

Norgga beale Deanu čázádaga guolástanhálddahusa jođiheaddji Steinar Pedersen oaidná, ahte Norgga eiseválddit leat bálkestan sin olggos Deanu soahpamušráđđádallamiin.

– Go eiseválddit bálkestedje min olggos loahppašiehtadallamiin, de dat lea njulgestaga badjelgeahččanvuohta, čilge Deanočázádaga guolástanhálddahusa stivrajođiheaddji Steinar Pedersen.

Pedersena mielde láhttenvuohki rihku riikasis lágaid ja gaskariikalaš konvenšuvnnaid, earenoamážit Deanolága, Finnmárkolága, ILO-konvenšuvnna 169 ja ON-artihkal 27.

– Mun lean hirpmástuvvan. Vaikko báikkálaš olbmot namahuvvon lágaid ja konvenšuvnnaid bokte galggašedje beassat mielde hálddašit luondduriggodagaid, de stáhtalaš institušuvnnat láhttejit justa nuppe láhkai. Láhkarihkkumat leat oktiibuot nu stuorrá, ahte dat hehtte Deanuleagi sámi materiálalaš kultuvrra doaibmaid, Pedersen oaivvilda.

“Eat oba diehtánge daid loahppašiehttadallamiin”

Norgga dálkkádat- ja birasdepartemeantta stáhtačálli Lars Andreas Lunde biehttala eiseválddiid leat bálkestan Deanočázádaga guolástanhálddahusa ja eará báikkálaš vuoigatvuođalaččaid áirasiid olggos loahppašiehtadallamiin nie mot Pedersen čuoččuha.

– Eat leat bálkestan geange olggos, dadjá Lunde.

– Sii leat álgoálggu rájes beassan leat mielde, gitta loahpageahčai, čuoččuha Lunde.

Deanu čázádaga guolástanhálddahus ii leat oba diehtánge loahppašiehttadallamiin.

– Dalle gal Lunde ii muital dan duohtavuođa. Eat oba diehtánge daid loahppašiehtadallamiid birra, mat dollojuvvojedje geassemánus, danin eat beassan buktit ovdan iežamet árvalusaid, Pedersen čilge.

Varrasamosat: Sápmi

Váldoođđasat

Varrasamosat

Muualla Yle.fi:ssä