Sápmi |

NSR dominere Norgga Sámediggeválggaid – NRK Sápmi sádde njuolggostreama

Norgga Sámedikki válggaid dominere NSR-bellodat, NRK Sámi oaiviliskkadeami mielde 54 proseanta jienasteddjiin guottihit NSR ja Aili Keskitalo presideantan.

Norgga Sámediggi
Norgga Sámediggi válljejuvvo vuossárgga 11.9.2017. Govva: Dan Robert Larsen / NRK

Otne vuossáreahkeda čielgagoahtá, mo Norgga Sámedikki válggain geavvá.

Jagi 2013 válgga vuoitit ledje Norgga Sámiid riikkasearvi NSR, Bargiidbellodat Bb, Árjá ja ovddádusbellodat FRP. Maiddái dáin válggain NSR orru leamen nana vuoiti, NSR:a ja Aili Keskitalo guottihit badjel 54 proseanta jienasteddjiin NRK Sámi oaiviliskkademiid mielde. NSR lea vuoitán maiddái skuvlaválggaid 28,3 proseanta guottihusain. Maiddái Ávvira oaiviliskkademiin njunnošis lea NSR.

Bargiidbellodagas lea nubbin stuorámus guottihus, čájehit oaiviliskkadeamit. NSR:a jođiheaddji Aili Keskitalo ja Bb jođiheaddji Ronny Wilhemsen oassálasttiigga NRK Sámi presideantaduellii. Soai leaba nannosamos presideantakandidáhtat.

Norgga sámedikki presideantta Aili Keskitalo Sámi parlamentáralaš ráđi čoahkkimis.
Aili Keskitalo jođiha NSR joavku. Govva: Vesa Toppari / Yle Sápmi

Aili Keskitalo jođihii Sámedikki gitta jagi 2016 juovlamánu rádjai, go gártai luohpat sajistis eahpeluohttámuša dihte. Dálá Sámedikki presideantan šattai dalle vel Bb jođiheaddji Vibeke Larsen. Maŋŋá Larsen lea guođđán Bb siskkáldas giccuid dihte ja vuođđudan iežas bellodaga, Šiela.

Vibeke Larsena Šielas ii oro mannamen nu bures dáin válggain. Ávvira oaiviliskkadeami mielde Larsena Šiella-bellodaga guottihit dušše 0,8%.

NRK Sápmi čuovvu válggaid

Norgga bealde leat otne sámedikkeválggat. Válggaid bohtosat čielgagohtet eahkeda mielde. NRK Sápmi čuovvu válggaid ovdáneami ja sádde Válgaidja-prográmma. Dan sáhttá čuovvut NRK Sámi neahttasiidduid bokte. Válgaidja-sátta álgá dii 20 Norgga áigge.

Válggain leat mielde 14 evttohaslisttu dahje bellodaga main leat oktiibuot 181 evttohasa. Eanemusat evttohasat leat Norgga Sámiid riikkasearvi NSR:s. 

Norgga Sámedikki válggaid jienastuslogus leat mielde vádjit 17 000 jienasteaddji olles Norggas. Norggas leat čieža sierra válgabire, Nuortaguovlu, Ávjovárri, Davveguovlu, Gáisi sihke Viesttarmeara-, Mátta-Sámi ja Mátta-Norgga válgabire. 11 proseanta jienasteddjiin leat jienastan ovddalgihtii borgemánu loahpas.

Sámediggái válljejuvvojit 39 áirasa.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä