Sápmi |

NSR vuittii Norgga Sámediggeválggaid – Keskitalo máhccámin presideanttastullui

NSR oažžumin Sámediggái vihta áirasa eanet go ovddit válggain. Geahča dás, mat eará bellodagat birgejedje.

Aili Keskitalo
Aili Keskitalo jođiha fas Sámedikki. Govva: Linda Tammela / Yle

Ikte vuossárgga ledje Norggas Sámediggeválggat. Norgga Sámiid riikkasearvi NSR lea vuoitimin válggaid čielgasit, nu mo oaiviliskkadeamit einnostedje. NSR:a jođiha Aili Keskitalo. Keskitalo lea fas máhccamin Norgga Sámedikki njunušin.

Norgga Sámiid Riikasearvi orru šaddamin stuorimus vuoiti dán jagi Sámediggeválggas. Otne diibmu 10:45 Norgga áiggi beaiváduvvon riikaviidosaš válgasiiddu mielde NSR lea oažžumin 27,1 proseanta go buot jienain lea rehkenastojuvvon 85,50 proseantta. NSR lea oažžumin 16 áirasa, nappo sii ožžot vihta áirasa eanet go ovddit válggain jagis 2013.

Nubbin bođii Bargiidbellodat 16,40 proseanttain. Bb massii 4,4 proseanta jienain ovddit válggaid ektui nappo ovtta áirrasbáiki. Dál Bb oažžu 9 áirrasbáiki.

Guovddášbellodat oaččui goalmmát saji 7,70 proseanta jienain. Guovddášbellodahkii dat oaivvilda dán, ahte sin válgaboađus lea buoret go jagi 2013 válggain. Sii ožžot dál guokte áirasa sisa.

Larsen gahččamen eret Sámedikkis?

Sámedikki dálá presideanta Vibeke Larsen orru gahčan Sámedikkis vaikko NRK Sápmi twiittii dii 23:47, ahte son vejolaččat livčče beassamen sisa. Riikkaviidosaš válgasiiddu mielde Larsena Šiella-bellodat oaččui dušše 2,20 proseanta jienain, mii dárkkuha dan, ahte Šiella ii leat fidnemin ovttage áirrasbáiki.

Larsen maiddái ii leat NRK Sámi listtus, masa lea čohkkejuvvon buot boahtte sámediggebaji áirasat.

Loahpalaš válgaboađus nannejuvvo goittotge easkka moatti vahku siste.

Beaiváduvvon 12.9.2017 dii 12.30 ođđasamos dieđut Norgga sámedikki válggaid bohtosiin ja lasihuvvon liŋka riikkaviidosaš válgasiidui.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä