Eamiálbmogiid filbmafestivála Skábmagovat čohkke dál juo 21. geardde filbmadahkkiid ja kulturberošteddjiid miehtá máilmmi Anárii. Festivála álgá duorastaga 24. beaivve ja bistá gitta sotnabeaivái ođđajagimánu 27. beaivái. Dán jagi temán leat árktalaš guovllu eamiálbmogat, ja eamiálbmotguossit bohtet Kalaallit Nunaatis nappo Ruonáeatnamis ja Jakutias Ruoššas.
Festivála jođiheaddji Sunna Nousuniemi ja dáiddálaš jođiheaddji Jorma Lehtola leaba muitalan Yle Sápmái, maid filmmaid soai earenomážit ávžžuheaba mannat geahččat. Sudno filbmaávžžuhusat gullojit juohke iđit Yle Sámi iđitsáddagis diibmu 7.00–8.00 gaskkas.
Ávžžuhus: Ruonáeatnama historjjálaš filmmat
Otne maŋŋebárgga Skábmagovat-filbmaávžžuhusat bohtet Kalaallit Nuunatis nappo Ruonáeatnamis.
Festiválajođiheaddji Sunna Nousuniemi ávžžuha festiválain earenomážit geahččat Akornatsinniittut – Tarratta Nunaanni (Among us – in the land of our shadows, bagadan Marc Fussing Rosbach) ja Anori (Wind, bagadan Pipaluk Kreutzmann Jørgensen).
– Dát filmmat leat historjjálaččat. Akornatsinniittut – Tarratta Nunaanni lea vuosttas ruonáeatnanlaš scifi-filbma ja dan 23-jahkásaš bagadalli boahtá deike Anárii. Anori-filmma bagadalli fas lea vuosttas ruonáeatnanlaš nissonbagadalli, guhte lea ráhkadan guhkesfilmma. Guktuin filmmain guovddažis lea buori ja bahá dáistaleapmi.
Sitáhtat vuolábealde leat Sunna Nousuniemi jearahallamis.
Akornatsinniittut – Tarratta Nunaanni
"Das lea váldokarakter Nukappi ja son niegadišgoahtá issoras nieguid, mat dolvot su ja su skihpára Mio balddalasmáilbmái diehttiid ja bahás vuoiŋŋaid lusa. Doppe suoivaniideatnamis buorre ja bahá dáistalit.
Dan filmmas leat hui fiidnát dološ myhtat heivehuvvon spesiála efektaide ja scifi-máilbmái."
Akornatsinniittut – Tarratta Nunaanni čájehuvvo Skábmagovain sotnabeaivve diibmu 12.00 Sajosis.
Anori
"Dán filmmas buori ja bahá dáistaleapmi gieđahallojuvvo ráhkisvuođa bokte, dat lea dakkár ráhkisvuohtadráma.
Dat muitala Anor ja Inuk stuorra ráhkisvuođas, man tragihkalaš lihkusvuohta geahččaladdá. Anor gártá de dáistalit buot fámuidisguin bahás, sevdnjes áššiid vuostá. Dat dráma ovdána maiddái myhtaid bokte.
Liikon dan filbmii, go dat ii leat dábálaš Hollywood-lágan filbma. Das leat čáppa govat doppe Ruonáeatnamis, muhto oassi dáhpáhusain leat maid New Yorkas."
Anori čájehuvvo Skábmagovain lávvardaga diibmu 12.00 Sajosis.
