Sápmi

Nubbi Skábmagovat-filbmaávžžuhus: Sámi oanehisfilmmat ja skuvlaeallima arkiivačájáhus

Skábmagovien apulaistuottaja Anni Koivisto.
Skábmagovaid veahkkebuvttadeaddji Anni Koivisto. Govva: Kirsti Länsman / Yle

Skábmagovaid filbmaávžžuhusat -ráiddu nuppi oasis jitnii beassá festivála veahkkebuvttadeaddji Anni Koivisto.

Dán jagi Skábmagovaid prográmmas ii leat oktage Sámis buvttaduvvon guhkes filbma, muhto oanehisfilmmat leat dange ovddas.

Festivála veahkkebuvttadeaddji Anni Koivisto ávžžuhage olbmuid oahpásmuvvat daidda dán jagáš festiválas.

– Mis leat hui olu sámi oanehis filmmat ja maiddái dakkár dahkkit, geain leat máŋga filmma mielde, Koivisto muitala.

Dá Anni Koivisto filbmaávžžuhusat dán jagáš Skábmagovain.

Sunna Nousuniemi gáidat / máhccat

"Dát lea min ovddeš festiválajođiheaddji ja -buvttadeaddji Sunna Nousuniemi oanehisfilbma.

Filbma gieđahallá dan, go lea eamiálbmotsiellu, muhto galggašii birget dán gávppálaš máilmmis. Dát lea viehka morašlaš eksperimentála filbma."

gáidat máhccat
gáidat / máhccat lea eksperimentála muitalus das, go olmmoš gáidá eallimis ja figgá ceavzit. Govva: Skábmagovat

Filbma čájehuvvo bearjadaga diibmu 13.00 sámekulturguovddáš Sajosis.

Ville-Riiko Fofonoff filmmat

"Ville-Riiko Fofonoffis leat Skábmagovain máŋga filmma. Son lea govven earret eará nuortalaš eamida gahpira duddjoma ja bigálusaid máŋggain báikkiin.

Ville-Riiko lea maid ráhkadan min ođđa logo, nappo mun gal ávžžuhan mannat geahččat su čehppodaga.

Skállovárri
Ville-Riiko Fofonoff lea govven filmmaidis earret eará áimmus. Govva: Skábmagovat

Ville-Riiko Fofonoff oanehisfilbma Anára gilis jagiid 2017–2018 čájehuvvo Skábmagovaid rahpandoaluin duorastaga diibmu 18.00 Guovssahasteáhteris ja filbma Ohcejoga Skállovári bigálusain lávvardaga diibmu 17.30 Guovssahasteáhteris.

Áŋŋela Skádjaváris govvejuvvon bigálusfilbma, Saamsiǩ-dokumeanta ja Sámás muinna -musihkkavideo čájehuvvojit sotnabeaivve diibmu 12.00 sámekulturguovddáš Sajosis.

Máret-Inger Aslaksdatter Anti filmmat

"Máret Inger A. Antis leat Skábmagovain golbma filmma. Okta lea Eadni, juoiggastivččetgo?. Dat muitala das, mo sáhttá váldit luođi ruovttoluotta, jus lea massán dan."

Eadni, juoiggastivččetgo?
"Eadni, juoiggastivččetgo?" lea guoskkahahtti filbma luođi ruovttoluotta váldimis. Govva: Skábmagovat

Máret Inger A. Anti filmmat "Eadni, juoiggastivččetgo?" ja Mii čájehuvvojit bearjadaga diibmu 13.00 sámekulturguovddáš Sajosis.

Kor e mine čorve? -filbma, mas Ravn’Asllat Lásse muittaša buohcceviessoáiggiid ja mánáid eaidama sámegielas 1950-logus, čájehuvvo sotnabeaivve diibmu 12.00 sámekulturguovddáš Sajosis.

Elle Sofe Sara filmmat

"Elle Sofe Saras leat Skábmagovain guokte filmma. Nubbi lea Giitu giitu, mii muitala oskkolaš lihkadusaid birra. De lea filbma Ribadit, mii muitala dološ irggástallanvuogis. Dat lea hui fiinnis, go lea maid dánsa mielde."

Ribadit
Ribadit-filmmas guokte boarrásut sápmelačča láidesteaba sámenuoraid boares soagŋomeanuid, ribadeami, suollemasvuođaide. Filbma čájeha earret eará, mo albmát lávejedje gaikut boahkánis, jus ledje liikostan geasanu. Govva: Skábmagovat

"Ribadit" čájehuvvo lávvardaga diibmu 17.30 Guovssahasteáhteris ja "Giitu giitu" sotnabeaivve diibmu 12.00 sámekulturguovddáš Sajosis.

Arkiivačájáhus

"Mun gal manašin dán jagi geahččat maiddái min arkiivačájáhusa. Das lea hui miellagiddevaš fáddá, sámi skuvlaeallin sierra áigodagain. Geahčči beassá galledit ovdamearkka dihte ásodaga."

Arkiivačájáhus čájehuvvo duorastaga diibmu 19.30 ja nuppádassii bearjadaga diibmu 17.00 sámemusea Siiddas.

Skábmagovaid olles prográmmakárta ja lassidieđut filmmain gávdnojit festivála neahttasiidduin.

Skábmagovaid filbmaávžžuhusat -ráidu oidno neahtas ja gullo rádios

Eamiálbmogiid filbmamáilmmis dehálaš filbmafestiválan šaddan Skábmagovat lea fas dán vahkus Anáris.

Skábmagovat čohkke juo 22. geardde filbmadahkkiid ja kulturberošteaddjiid miehtá máilmmi geahččat eamiálbmotfilmmaid. Festivála álgá duorastaga 23.1. ja bistá gitta sotnabeaivái 26.1. Dán jagi temán lea oktavuohta eatnamii. Festivála váldoguossit bohtet Mátta-Amerihkás, earenomážit Perus.

Festivála dáiddalaš jođiheaddji Jorma Lehtola, veahkkebuvttadeaddji Anni Koivisto ja filbmaguovddáš Skábma plánejeaddji Tarja Porsanger addet iežaset filbmaávžžuhusaid Yle Sámi kanálain juohke beaivve dán vahkus.

Neahta lassin ávžžuhusat gullojit rádios beaivválaččat Yle Sámi iđitsáddagis diibmu 7.00–8.00 ja nuppádassii veaigin Dearvva! Tiervâ! Tiõrv! -sáddagis diibmu 14.30–16.00.

Varrasamosat

Muualla Yle.fi:ssä