Sápmi |

Nuoraidráđđi álggahan some-kampánjja válgalogahallamii ohcaleamis – “Mii fertet oažžut nuoraid háleštallat, dalle diehtu vuolgá johtui”

Nuoraidráđi várreságadoalli Ánte Veijola deattuha, ahte nuoraid lea dehálaš oažžut mielde válgalogahallamii dál, go Sámediggái leat boahtime gieđahallamii stuorra áššit, dego Jiekŋameara ruovdegeaidnu.

Ante Veijola
Nuoraidráđi várreságadoalli Ánte Veijola. Govva: Vesa Toppari / Yle

Sámedikki nuoraidráđđi lea álggahan dieđihankampánjja sosiálamedias válgalogahallamii ohcaleamis. Nuoraidráđđi almmustahtii mannan vahkkoloahpa iežas Facebook-siiddus filmmaža, man ulbmilin lea oažžut nuoraid ohcat válgalogahallamii, muitala nuoraidráđi várreságadoalli Ánte Veijola.

– Buot vulggii das, go Sámediggi ii šat sádde nuoraide skoviid ruoktot. Bođii jurdda, ahte mo nuorat dál dihtet ohcat válgalogahallamii, go dálhan lea sullii mánotbadji šat áigi ohcat. Ulbmilin lea kampánjeret sosiálamedia bokte ja bidjat nuoraidráđi Instagram ja Facebook-siidduide govaid ja filmmaid, muitala Ánte Veijola.

“Sáhttá leat buorre, ahte skovvi ii šat boađe poasttas”

Ovddit válggaid oktavuođas Sámediggi lea sádden nuoraide ruoktot reivviid válgalogahallamii ohcamis. Reivviid fárus leamaš maiddái skovvi, mainna nuorat leat sáhttán ovttain sárgestagain almmuhit iežaset Sámedikki válgalogahallamii.

Dáid válggaid oktavuođas Sámedikki válgalávdegoddi lea mearridan, ahte válgalávdegoddi ii šat sádde reivviid nuoraide. Nuoraidráđi várreságadoalli Ánte Veijola oaidná áššis sihke buriid ja heajos beliid.

– Leahan das eanet bargu nuoraide, go dan galgá ohcat doppe neahtas ja printet ja deavdit. Galhan dat livččii buorre jus reive ain boađášii ruoktot, muhto go dál leat ná mearridan.

– Sáhttá leat maiddái buorre, ahte dat skovvi ii boađe šat ruoktot. Go dákkár dieđihankampánja lea dál jođus, de olbmuide sáhttá boahtit motivašuvdna ohcat válgalogahallamii. Jus skovvi boađášii ruoktot, de dat sáhttá báhcit gosa nu jorrat iige dan šat muitte, árvala Veijola.

Sosiálamedia bokte álki olahit nuoraid

Sámedikki válgalávdegoddi merke jagi 2019 válgalogahallamii automáhtalaččat daid sápmelaččaid, geat ledje jietnaválddálaččat ovddit sámediggeválggain jagis 2015. Dat, geat eai lean ovddit válggain jietnaválddálaččat, galget ieža ohcat válgalogahallamii vai besset jienastit čuovvovaš válggain. Eanet dieđut ja ohcanskovvi gávdnojit Sámedikki válgasiidduin.

Ohcanáigi válgalogahallamii lea vel sullii mánotbadji, juovlamánu 31. beaivvi rádjái. Nuoraidráđi Ánte Veijola sávvá, ahte dieđihankampánja nagodivččii olahit buot sámi nuoraid.

– Dathan livččii dat niehku, muhto jus lea realista, de eat varra baste juksat buohkaid. Mii fertet oažžut nuoraid háleštallat, de dalle diehtu vuolgá johtui. Sosiálamedia bokte mii jáhkkit olahit nuoraid, dadjá Veijola.

Veijola deattuha, ahte nuoraid lea dehálaš oažžut mielde válgalogahallamii.

– Go lea válgalogahallamis ja jienasta, de sáhttá váikkuhit iežas áššiide. Dálhan leat boahtime Sámediggái stuorra áššit, dego Jiekŋameara ruovdegeaidnu. Go Sámediggái válljejuvvojit ođđa olbmot, de lea dehálaš, ahte nuoraid jietna gullo ja dohko válljejuvvojit dakkár olbmot geat ovddidit nuoraid áššiid, dadjá Nuoraidráđi várreságadoalli Ánte Veijola.

Varrasamosat: Sápmi

Váldoođđasat

Varrasamosat