Sápmi |

Nuoraidráđđi lea bovden stáhtaráđis gussiid oahpásmuvvat Sámediggái – Deaivvadeapmái boahtime badjel 70 oassálasti

Deaivvademiin háliidit nannet ja ovddidit ovttasbarggu ja dialoga guovtti álbmoga gaskkas.

Sámediggi
Govva Sámedikki čoahkkimis. Govva: Vesa Toppari / Yle

Sámedikki nuoraidráđđi ja stivra háliidit lasihit ovttasbarggu mearrideddjiiguin ja virgeolbmuiguin, ja danin leatge bovden ministariid, riikkabeaiáirasiid ja stáhta virgeolbmuid oahpásmuvvat Sámedikki doaimmaide. Deaivvadeapmi bistá guokte beaivvi ja dat ordnejuvvo 15.–16.8.

Sámedikki nuoraidráđi ságadoalli Risten Mustonen muitala, ahte sii leat bastan duddjot miellagiddevaš ja viiddes prográmma, mas leat iešguđetlágán logaldallamat ja temát.

Deaivvadeamis gieđahallet sápmelaččaid eamiálbmogin ja sápmelaččaid iešstivrejumi, skuvlen- ja oahppomateriálaáššiid, sámegielaid, sápmelaččaid rivttiid, árabajásgeassima ja giellabeassedoaimma, sosiála- ja dearvvašvuođabálvalusaid, sápmelaččaid árbevirolaš ealáhusaid, sámekultuvrra ja nuoraidáššiid.

Deaivvadeapmái leat almmuhan boahtit badjelaš 70 oassálasti. Sis lea vejolašvuohta oahpásmuvvat Sámedikki doibmii ja sámiid guoskevaš gažaldagaide sihke oassálastit Ijahis idja -festiválii.

– Mis leat olu oassálastit, dat lea hui dievva dat skuvlejupmi. Mis lea doppe okta ministtar, máŋggat riikabeaiáirasat, iešguđet virgeoapmahaččat ja stáhta virgeolbmot. Min ulbmilin lea juohkit dieđu, mo Sámedikki doaibmá, makkár áigeguovdilis lihkostuvvamat ja buorit bealit leat ja maiddái makkár hástalusat.

– Mun gal illudan, ahte nu stuorra beroštupmi lea čájehuvvon doppe stáhta bealde ja virgeolbmuid beales, illuda Mustonen.

"Bastit juohkit áigeguovdilis ja rivttes dieđu"

Sámediggi lea válmmaštallan dán oahpásmuvvangalledeami ministariidda, riikkabeaiáirasiidda ja stáhta virgeolbmuide Sámedikki nuoraidráđi evttohusas. Maiddái riekteministeriija lea oassálastán válmmaštallamiidda, go jagis 2017 almmustahtton Álbmotlaš vuođđo- ja olmmošvuoigatvuođaprográmma sikte dasa, ahte sámeáššiid gieđahalli virgeolbmuid máhttu buoriduvvo sápmelaččaid rivttiid gieđahalli skuvlejumiin. Sámedikki doibmii ja sámeáššiide oahpásmuvvan lea lunddolaš joatkka sámeáššiid vuođđokursii, man riekteministeriija lea árabut ordnen.

– Lea hui buorre, ahte mii leat bargan ovttasbarggus nuoraidráđđi, stivra ja olles Sámedikki ja riekteministeriija dainna. Mun gal illudan dasa, dadjá Mustonen.

Nuoraidráđi ságadoalli Risten Mustonen oaivvilda, ahte skuvlejupmái lea dárbu ja das lea ávki boahttevuođas.

– Dieđusge álo lea ávki, ahte mii bastit juohkit áigeguovdilis ja rivttes dieđu. Go leat dakkár virgeolbmot, mearrideaddjit ja politihkkarat geat barget sámi áššiiguin ja geat galget diehtit geaidda dat mearrádusat ja dialoga guoská, dieđusge mii háliidit nannet ja ođasmahttit dan dialoga ja gulahallama guovtti álbmoga gaskkas.

Varrasamosat: Sápmi

Váldoođđasat

Varrasamosat

Muualla Yle.fi:ssä