Sápmi |

Nuorat čájehedje dáidduideaset stuorra olmmošjovkui Avvila logahaga boarrásiid dánssain

Avvila logahaga valástallansále lei duorastaga eahkedis áibbas dievva, go doppe dánso nu gohčoduvvon boarrásiid dánssaid. Geahča filmma dánssain. Video: Kevin Francett / Yle

Avvil

Ikte duorastaga beaivit Avvila logahaga dán giđa studeantačállit guđđe skuvlla ja vulge lohkat studeantačállosiidda.

Dan dihte skuvlla boarrásepmosat leat dál logahaga nuppi luohká oahppit. Árbevieruide gullá, ahte dan dihte dollojuvvojit nu gohčoduvvon boarrásiid dánssat, gos párat jorggáhallet sierralágan musihka mielde. Ja bureshan dat manai, nieiddain ledje guhkes čuvllat ja gánddat ledje maid rohtten daid buoremusaid badjelii.

Sále lei áibbas dievva gehččiin. Mielde ledje nu skuvlla oahppit go dánsejeddjiid fuolkkit.

Stuorra ráhkkaneamit dánssaide

Anárlaš Hilla Portti muitala, ahte sii leat garrasit hárjehallan dánssaid, ja somáhan dan lei geahččat. Okta dánsa lei ovdamearkka dihte cha cha.

Anarlaš Hilla Portti.
Anárlaš Hilla Portti. Govva: Kirsti Länsman / Yle

– Mii leat hárjehallan sakka. Dánssat leat earáláganat, ahte ii leat okta ja seamma dánsun, hui earáláganat, muitala Hilla Portti.

Logahaga boarrásepmosiidda gullá dál maid avvillaš Sáárákáisá Seurujärvi. Son maid lei gárvodan ja čohkkojuvvon hui čábbát. Árbevieruidehan gullá, ahte nieiddain leat guhkes čuvllat ja vuovttat leat čohkkojuvvon čábbát.

Avvillaš Sáárákáisá Seurujärvi
Avvillaš Sáárákáisá Seurujärvi. Govva: Kirsti Länsman / Yle

– Ovdal mun lean geavahan dušše gávtti. Gal dán guhkes čuvlii lei erenomáš gárvodit. Orru dego livččen prinseassa, Sáárákáisá Seurujärvi čaimmiha.

Maiddái gánddain lunddolaččat leat dat buoremusat badjelis, go sii galget dánssuhit iežaset luohkkáskihpáriid. Dat dárkkuha čáhppes biktasiid ja vilges dahje violeahta báiddiid, ja namalassii vel čuovgi skuovaid.

Dál go logahaga nuppi luohkálaččat báhce iežaset skuvlla boarrásamosin, sis lea vel okta jahki ovddabealde logahaga vázzin, ovdalgo siiges čievččastuvvojit olggos.

Dát lea dehálaš jahki smiehttat, guđe guvlui vuolgá lohkat logahaga maŋŋá. Gáregasnjárgalaš Juuso Valle lea juo smiehttan, mii sus šaddá stuorra gándan.

– Badjealmmái dahje vuolggán lohkat universitehtii. Mus lea mielas dálkkasdieđa ja lean jurddašan, ahte dohko manan, muitala Juuso Valle iežas boahttevuođaplánain.

Nieidda guovttos Hilla Portti ja Sáárákáisá Seurujärvi lohkaba, ahte soai eaba leat nu guhkás vel geargan smiehttat.

Gáregasnjarggalas Juuso Valle
Gáregasnjárgalaš Juuso Valle. Govva: Kirsti Länsman / Yle

Fulkkiide dehálaš beaivi

Boarrásiid dánssain fuolkkit besset oaidnit, mo bearraša nuorat leat čábbát gárvodan ja earenomážit mo dat dánsun lihkostuvvá. Párat jorggáhallege lagabui diimmu, ja dan maŋŋá besse maid earát mielde.

Anárlaš áhku guovttos Birit-Kirsti Länsman ja Saara Portti maid leigga doapman geahččat, mo sudno áhkkubis Hilla Porttis manná guhkes helmmiid limškkuheamis.

Birit-Kirsti Länsman ja Saara Portti.
Anárlaš Birit-Kirsti Länsman ja Saara Portti geahččamin áhkkubis dánsema. Govva: Kirsti Länsman / Yle

– Dathan gal lea somá, go son lea nu čáppat, lohká Birit-Kirsti Länsman go oaidná nieiddanieiddas geahppasit girddáhallamin lávddi alde.

Saara Portti lea fas Hilla Portti áhčibeale áhkku. Son maid illuda go nuorat dánsejit.

– Gal dat lea somá go nuorat jorggáhallet. Dieđe vaikke vel ganjalge suoli golggiha, go leat nu čábbát, dadjá Saara Portti.

Máŋggat varra muittašit maid iežas skuvlaáiggiid dego Sáárákáisá Seurujärvi eadni Miina Seurujärvi. Áiggi hurggiheapmi boahtá duohtavuohtan ovdii, go oaidná iežas máná skuvlla boarráseamosin.

– Na iihan dan sáhte ipmirdit, mo mu uhca nieiddažis lea šaddan nu stuoris, muhto lea suohtas, Miina Seurujärvi dadjá.

Osmo ja Miina Seurujärvi Avvilis.
Osmo ja Miina Seurujärvi geahččamin nieiddas Sáárákáisa dánsema. Govva: Kirsti Länsman / Yle

Filbma: Kevin Francett / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä