Sápmi |

Nuorat čoahkkanit bearjadaga Ohcejohkii speallat ija ovttas

Ohcejoga nuoraidráđi ja DigiÁrran-fidnu "SámeLAN" álgá bearjadaga diibmu 17.00 Áilegas-dálus ja bistá lávvordahkii diibmu 13.00 rádjai.

Leevi Halonen Game Jam -dáhpáhusas Ohcejogas guovvamánus 2018.
Leevi Halonen Game Jam -dáhpáhusas Ohcejogas guovvamánus 2018. Govva: Vesa Toppari / Yle

Ohcejoga Áilegas-dálus lágiduvvo odne bearjadaga buohkaide rabas speallandáhpáhus "SámeLAN".

Leevi Halonen Ohcejoga nuoraidráđis muitala, ahte dáhpáhusas beassá speallat ovttas earáiguin – vaikko olles ija, jus háliida.

– Gažaldat lea speallandáhpáhusas, gos don sáhtát seamma sajis speallat dahje gilvalit skihpáriiguin, muitala Halonen.

Halonen muitala, ahte su dieđuid mielde máŋgasat leat boahtimin SameLANii speallat dihtoriiguin. Son goittotge muittuha, ahte dáhpáhussii sáhttá boahtit speallat buotlágan spealuid, maiddái ovdamearkka dihte mobiilaspealuid.

Jietna: Näppäimistö
Jietna
Leevi Halonen jearahallan gullui bearjadaga 4.1.2019. Son muitalii SámeLAN-dáhpáhusa birra. Jietna: Yle Areena. Govva: Toni Pitkänen / Yle

Sáhttá ieš válljet oađđágo vai speallágo

Jurdda SámeLAN dáhpáhussii bođii, go juovlamánu álggus Sámedikki nuoraidráđi DigiÁrran-prošeakta ordnii Ohcejogas speallanbeaivvi. Halonen muitala, ahte juovlamánus ordnejuvvon dáhpáhusas spelle dušše dihto spealuid.

– Válden nuoraidráđi bokte oktavuođa DigiÁrranii ja de mii álggiimet ovttas smiehttat dan, ahte jus ordnet dákkár dáhpáhusa, gos sáhttá speallat buotlágan spealuid.

Dáhpáhus lea dárkkuhuvvon vuosttažettiin nuoraide, muhto ožžot dohko boarrásetge olbmot boahtit. Ahkerádji dáhpáhussii goit lea. Oassálastit galget leat badjel 12-jahkásaččat.

Vaikko dáhpáhusas lea vejolaš speallat olles ija, leat Áilegas-dállui ordnen maiddai idjadansajiid.

Ohcejoga nuoraidráđi ja DigiÁrran-fidnu SámeLAN álgá bearjadaga diibmu 17.00 Áilegas-dálus ja bistá lávvordahkii diibmu 13.00 rádjai. Njuorggámis ja Gáregasnjárggas ordnejit sáhtuid dáhpáhussii. Dáhpáhussii ii dárbbat almmuhit ovddalgihtii.

Varrasamosat: Sápmi

Váldoođđasat

Varrasamosat

Muualla Yle.fi:ssä