Sápmi |

Nuorat háliidit vázzit rihppaskuvlla vai besset ristváhnemin – guovlal makkár lei Anára searvegotti rihppaskuvllas

Rihppaskuvla ii leat dušše biibbala stáven, dehálaš lea maid suohtastallat ovttas. Nuoraide rihppaskuvla lea dehálaš ášši.

Video: Anára searvegotti rihppaskuvla geassit 2019.
Anára searvegotti rihppaskuvla 2019 / Inarin seurakunnan rippileiri 2019

Rivdola nuoraidguovddáža valáštallansáles lávlot nuoraid sálmmaid, muhtumat alla jienain, nuppiid njálbmečiegat eai lihkasge. Anára searvegotti rihppaskuvllas lea jođus ipmilbálvalus, man nuorat ieža leat plánen.

Fáhkka lea beare šlápma ja riedja, go moaddelogi nuora viehkalit gáfestallat. Juuso Valle ja Taina Hakovirta báhciba čoaggit láhttis sálbmagirjjiid. Soai leaba stuoruhat.

– Dát lea somás geassebargu. Anára searvegottis lei dárbu stuoruhiidda, de mun bohten deike. Manan vel Ohcejoga rihppaskuvlii stuoruhin, muitala gáregasnjárgalaš Juuso Valle.

Avvillaš Taina Hakovirta muitala, ahte bargu rihppaleairras lea somá.

– Mun lean veahkkejođiheaddji ja plánen prográmmaid nuoraide.

– Hirbmat somá leamašan. Buoremus ášši leamašan dát joavku, muitala Hakovirta.

Stuoruhat Juuso Valle ja Taina Hakovirta.
Juuso Valle ja Taina Hakovirta leaba rihppaskuvllas veahkkejođiheaddjin, dahjege stuoruhin. Guktuin lea iežas joavku mas fuolahit. Govva: Kaija Länsman / Yle

Gáffebottu maŋŋá lea fas áigi čohkkestit nuoraid čorraga oktii ja lohkat leago juohkehaš báikki alde. Rihppaskuvlanuorra Pihka Puranen orru earenomáš movtta. Son ássá Oulus, muhto sus leat fuolkkit Avvilis.

– Dáppe lea buorre joavku ja joavkovuoigŋa. Buohkaid váldet jovkui fárrui.

Dego earáge nuoraide, de Purasii lea okta ášši hui dehálaš.

– Mun háliidan goasnu leat risteadni ja danin háliidin čađahit rihppaskuvlla, muitala Puranen.

Pihka Puranen ja Janna Välitalo.
Pihka Puranen ja Janna Välitalo Avvilis. Puranen jáhkká, ahte dán leairra áigge oažžu olu ođđa ustibiid. Govva: Kaija Länsman / Yle

Háliidii rihppaskuvlii vaikko ii gula girkui

Anárlaš Kiira Savikko viggá doalahallat, ahte ii skužistišgoađe. Suohtastallanbottus nuorat galget duhkoraddat, ahte sii leat bánehis boarrásat ja muitalit makkár ealli sii maŋimuš leat oaidnán. Okta nubbi orru nu de gávdnasiid doallamin.

– Dáppe leamašan somá, eandaliige friijaáigi, muitala Savikko.

Savikko háliidii áinnas boahtit rihppaskuvlii, vaikko dasa ii livčče lean dárbu.

– Mun ieš in gula girkui, muhto lean lihkká johtán skuvllas oskkoldaga diimmuin. Mu eai konfirmere, muhto lihkká háliidan čađahit buot iskosiid.

– Buot mu skihpárat leat dáppe. Rihppaskuvla lea stuorra ášši, muitala Savikko.

Emma Sieppi ja Kiira Savikko.
Anárlaš Emma Sieppi ja Kiira Savikko. Savikko muitala, ahte buot somámus leamašan friijaáiggis go nuorat leat beassan gaskaneaset ovttastallat. Govva: Kaija Länsman / Yle

“Sávan, ahte nuorat ožžot nisttiid vuoiŋŋalaš eallima dikšumii”

Sámebáhppa Mari Valjakka muitala, ahte rihppaskuvla ii leat rievdan das go son váccii dan. Ain galget nuorat máhttit muhtun kristtalaš teavsttaid dego čázi.

Bajil ferte máhttit ovdamearkka dihte Áhčči min -rohkosa, gásttagohččuma, hearrá buressivdnádusa, eahkedaččaid ásahansániid ja logi báhkkoma.

Rihppaskuvlla ulbmil lea addit nuoraide áiggi, dorvvu ja saji dutkkadit eallima stuorra gažaldagaid.

– Váldooahpahus dieđusge lea osku ja Ipmila sátni, dadjá Valle.

– Dáppe oahppá olu iežas searvegottis ja oskkoldagas, joatká Hakovirta.

Sámebáhppa Valjakka sávvá, ahte rihppaskuvlla oahpput guddet guhkás boahttevuhtii.

– Sávan, ahte nuorat besset oahpásmuvvat Ipmilii, iežas oskui ja Jeesusii. Sávan, ahte nuorat ožžot nisttiid vuoiŋŋalaš eallima dikšumii, dadjá Valjakka.

Nuoraide rihppaskuvla lea nana, oktasaš vásáhus mii nanne iešdovddu, čielgá Jarmo Kokkonen nákkosgirjjis. Dan Valjakkage sávvá.

– Dieđusge mun doaivvun, ahte rihppaskuvla livčče buorre vásáhus buohkaide, ja ahte nuorat ožžot leat ovttas nuppiiguin ja maiddái oahpásmuvvat Ipmilii, dadjá Valjakka.

Suomas rihppaskuvla lea hui bivnnut, nu lea maid Sámis. Ođđaseamos statistihkaid mielde olles Suomas buot 15-jahkásaš nuorain 77,3 proseantta vázzet rihppaskuvlla.

Rihppaskuvllas juohkehaš galggai čállit nuppis juoidá buriid beliid báberváibmui.
Dá muhtun rihppaskuvlalačča váibmu, masa juohkehaš lea čállán čappa adjektiivvaid.
Pihka Puranen čálii eará rihppaskuvllalaččain čáppa sániid báberváimmuide.

Beaivvi loahpas juohkehaš rihppaskuvlanuorra fitná čállimin earáid báberváimmuide juoidá čáppa, govvideaddji sániid.

Báberváimmut buktet sihkkarit ilu seammás go jurdagat jorret konfirmašuvnnas.

– Lean gealdagasas, ahte beasango mun rihppaskuvlla čađa. Gal dás lea olu maid smiehttat, jurddaša Puranen.

Dát Anára ja Avvila nuorat konfirmerejuvvojit sotnabeaivve 16.6.2019. Konfirmašuvdnameassu lea Avvilis diibmu 10 ja Anára girkus diibmu 14. Konfirmašuvnnas dovddastuvvo girku osku ja fidnejuvvo riekti iehčanassii fitnat rihpain.

Varrasamosat: Sápmi

Váldoođđasat

Varrasamosat

Muualla Yle.fi:ssä