Sápmi |

Nuorat miehtá máilmmi gazzet Roavvenjárggas oahpu birasváikkuheamis – Fárus sámenuorat Suomas, Ruoŧas ja Ruoššas

Arctic Youth Summit -nammasaš skuvlejupmi lea dán vahkus čohkken nuoraid miehtá máilmmi Roavvenjárgii smiehttat čovdosiid dálkkádatrievdama váikkuhusaide. Rosa-Máren Magga ja Juulienna Näkkäläjärvi mielas skuvlejupmi leamaš máŋggabealat ja ávkkálaš.

Juhán Niila Stålka, Rosa-Máren Magga ja Juulienna Näkkäläjärvi.
Beavdde birra ságastallamin Juhán Niila Stålka (gurut ravddas), Rosa-Máren Magga ja Juulienna Näkkäläjärvi. Govva: WWF Suomi

Roavvenjárggas leat dán vahkus skuvlen nuorain birasváikkuheaddjiid.

Arctic Youth Summit -nammasaš nuoraidskuvlejupmi álggii vahku dassái bearjadaga ja joatkašuvvá dán vahku bearjadahkii Norvajärvi leairaguovddážis. Skuvlejupmái oassálastet 35 sullii 18–25-jahkásaš nuora 11 riikkas. Stuorámus oassi nuorain bohtet árktalaš riikkain, muhto maiddái Árktalaš ráđi observerejeaddjiriikkain Indiás, Duiskkas ja Singapores.

Skuvlejumi leat leamaš ordnemin earret eará Suoma ja USA WWF-searvvit.

– Ulbmil lea, ahte nuorat ohppet skuvlejumis árktalaš guovllus ja dan suodjaleamis, muitala diehtojuohkináššedovdi Antti Haavisto WWF Suomas.

Skuvlejupmi lea oassi Árktalaš biodiversitehta kongreassas, mii dollojuvvo Roavvenjárggas 9.–12.10.2018. Dat lea okta Suoma Árktalaš ráđi ságadoalliáigodaga (2017–2019) dehálamos dáhpáhusain.

Sámenuoraguovttos duđavaččat skuvlejupmái

Skuvlejupmái oassálastet maiddái sámenuorat Suomas, Ruoŧas ja Ruoššas.

Juulienna Näkkäläjärvi Anára Lismmás ja Rosa-Máren Magga Eanodaga Heahtás leaba goappašagat duđavaččat skuvlejupmái. Vahku prográmma leamaš máŋggabealat ja ávkkálaš.

– Mis leat leamaš logaldallamat earret eará árktalaš luonddu birra, mii leat bargan bargojoavkkuin, mii leat beassan muitalit iežamet vásáhusaid dálkkádatrievdamis ja de leat hupman vehá árbevirolaš máhtu birra, čilge Juulienna Näkkäläjärvi.

– Gal dáppe lea olu oahppan. Birasáššit ja dálkkádatrievdan leat hui stuorra áššit, mat váikkuhit min buohkaid eallimii ja galggašii gávdnat buorre ja efektiiva vugiid čoavdit daid váttisvuođaid, maid dat mielddisbuktá. Daid mii leat geahččaleamen dáppe smiehttat ja čoavdit ovttas, muitala Rosa-Máren Magga.

Arctic Youth Summit
Arctic Youth Summitii oassálastet 35 nuora 11 riikkas. Govva: Anna-Katri Kulmala / WWF

Magga lea fuomášan skuvlejumis, ahte olbmo duogáš váikkuha oainnuide dáid áššiin.

– Dieđusge min duogážat leat earáláganat, ja eamiálbmotnuorat vásihit vehá earálágan áššiid go váldoservodaga nuorat vaikko dakkár stuorra gávpogiin.

Skuvlejumi váldoulbmil lea, ahte nuorat ožžot gávcci beaivvi áigge árktalaš luonddus dakkár dieđuid, maid sii sáhttet juohkit ovddosguvlui iežaset oahppásiidda ja mearrideaddjiide.

– Dáinna skuvlejumiin hálidit addit árktalaš nuoraide vugiid ja neavvuid váldit oasi politihkalaš ráđđádallamiidda iešguđet oassebeliiguin, doalvut nuoraid jiena dohko kongressii ja dan bokte maiddái váikkuhit mearrideaddjiide, jos vejolaš, muitala Rosa-Máren Magga.

Nuoraid cealkámuš ja filbma ovdanbukto kongreassas duorastaga

Arctic Youth Summit -skuvlejumi nuorat ovdanbuktet otne duorastaga davviguovllu birasministariidda iežaset cealkámuša árktalaš guovllu suodjaleamis.

– Mii leat čállán deklarašuvnna, man min ovddasteaddji lohká Árktalaš biodiversitehta kongreassas duorastaga, muitala Rosa-Máren Magga.

– Dasa lassin mii leat ráhkadan video dán čoahkkaneami áigge ja dat maid čájehuvvo kongreassas. Dat boahtá sihkkarit nehttii maid maŋŋelappos, lasiha Juulienna Näkkäläjärvi.

Varrasamosat: Sápmi

Váldoođđasat

Varrasamosat