Sápmi |

Nuorra, dál sáhtát jearrat Sámedikki jođiheddjiin maid háliidat – Nuoraidráđđi ordne joavkochat ságadolliiguin

Ságadolliin sáhttá jearrat maid beare, iige ságastallan dárbbaš leat politihkalaš, deattuha nuoraidčálli.

Elli-Marja Hetta
Nuoraidčálli Elli-Marja Hetta vuordá joavkochatta iluin. Govva: Xia Torikka / Yle

Suoma Sámedikki nuoraidráđđi lea ordnen cuoŋománu rájes joavkochattaid neahtas sierra sámegielaiguin. Jurdda joavkochattaid ordnemii lea vuolgán DigiÁrran-fidnu nappo digitálalaš nuoraidbarggu ovddideami olis.

Nuoraidčálli Elli-Marja Hetta mielde nuorat leat gávdnan chattiid bures. Joavkochat galgá leat báiki, gos nuorat besset čálašit nu, ahte eai dárbbaš bállat čállinfeaillain.

– Dat lea dorvvolaš giela geavahanarena. Deháleamos lea boahtit fárrui, deattuha Hetta.

Nuoraidráđi plánain lea ordnegoahtit chattiid temáid mielde. Otne gaskavahko nuoraidráđi chattas leat mielde Sámedikki ságadoalli Tuomas Aslak Juuso, sihke várreságadoalliguovttos Anni Koivisto ja Leo Aikio. Ulbmilin lea oažžut Sámedikki lagabui nuoraid.

Chattii sáhttá oassálastit golmma sámegielain.

Elli-Marja Hetta vuordá somás ságastallama, mii ii dárbbaš leat nu politihkálaš. Nuorat ožžot jearrat ságadolliin maid beare hutket.

– Soitet boahtit gažaldagat áigeguovdilis ja politihkalaš fáttáin, muhto ieš jearašin ságadolliid miela miel ivnniin, astoáiggedoaimmain ja geasseluopmoplánain. Dakkár dábálaš áššiin, muitala Hetta.

Joavkochat ordnejuvvo gaskavahko eahkes diibmu 18.00-19.00. Loga eambo dieđuid joavkochattas dás.

Jietna: Pinja Pieski

Varrasamosat: Sápmi

Váldoođđasat

Varrasamosat

Muualla Yle.fi:ssä