Sápmi |

Nuorra politihkkárat vuostálastet Jiekŋameara ruovdegeainnu garrasabbot go ruoktobellodahkaset

Eatnašat politihkalaš nuoraidorganisašuvnnaid jođiheaddjiin eai ane plánejuvvon Jiekŋameara ruovdegeainnu dehálažžan.

Polithkkalaš nuoraidorganisašuvnnaid jođiheaddjit čoahkkanedje Helssegii digáštallat Suoma politihkkas.
Boahttevaš mearrideaddjit, dáláš nuoraidorganisašuvnnaid jođiheaddjit háliidit bissehit Jiekŋameara ruovdegeainnu plánaid dakkaviđe, dego sosiálademokráhtaid nuoraid jođiheaddji Mikkel Näkkäläjärvi. Govva: Vesa Toppari / Yle
helsset

Dievva sále ovdii čohkánedje maŋŋebáreahket sii, geat bohtet boahttevuođas jođihit Suoma. Sii leat Suoma bellodagaid politihkalaš nuoraidorganisašuvnnaid jođiheaddjit.

Eatnašat sis eai ane plánejuvvon Jiekŋameara ruovdegeainnu dehálažžan. Gieskat Yle Sápmi muitalii, ahte stuorát bellodagat oidnet Jiekŋameara ruovdegeainnus ruđalaš ávkki ja unnibut vuostálaste dan.

Muhtun boahttevaš mearrideaddjit, ja dáláš nuoraidorganisašuvnnaid jođiheaddjit háliidit bissehit plánaid dakkaviđe, dego sosiálademokráhtaid nuoraid jođiheaddji Mikkel Näkkäläjärvi.

– Ii leat jierbmi vuolgit dan šat plánet. Dat hehtte sámiid ja ealáhusaid mealgadit, iige eisige bisset dálkkádatrievdama, dadjá Näkkäläjärvi.

Nuorten vaalidebatt / Botta 08.01.2019
Sosiálademokráhtaid nuoraid jođiheaddji Mikkel Näkkäläjärvi jáhkká nuoraid bastit váikkuhit Jiekŋameara ruovdegeainnu plánaide. Govas mielde maid ruonáid Sameli Simonen, kristtalaččaid Aleksi Sarasmaa ja ruoŧŧelaš álbmotbellodaga nuoraid Christoffer Ingo. Govva: Jouni Immonen / Yle

Olgešbellodat lea oaivvildan, ahte Jiekŋameara ruovdegeaidnu buvttášii lasi bargosajiid. Olgešbellodaga nuoraid jođiheaddji Henrik Vuornos goit oaidná, ahte dehálutge fidnut gávdnojit.

– Mis ii leat čavga oaivil guđege guvlui. Jus jurddašat, ahte dan galggašii stáhta ruđain hukset, de dat ii leat min mielas dehálamos fidnu, masa bidjat ruđa.

– Ovdal galggašii ovddidit baicce váldoruovdegeainnu Roavenjárggas máttás, dat bálvalivčče bealle Suoma. Gal dás badjánit maiddái luonddugažaldagat ja álgoálbmotrievttitge ovdan, dadjá Vuornos.

Guovddášbellodaga johtolatministtar Anne Berner dat lea ovddidan Jiekŋameara ruovdegeainnu Suomas.

Guovddášbellodaga nuoraidorganisašuvnna jođiheaddji Suvi Mäkeläinen lea várrugas plánain.

– Orru, ahte ii dat nu jierbmás fidnu leat. Divrrashan vel lea ja dat luddešii boazodoalloguovllu. Dorvvolašvuođapolitihkkan dan ii sáhte ákkastallat. Olu leat gažaldatmearkkat, vihkkehallá Mäkeläinen.

Nuorten vaalidebatt / Botta 08.01.2019
Govas olgešbellodaga Henrik Vuornos, guovddášbellodaga Suvi Mäkeläinen ja gurutlihtu Tuomas Sihvonen. Guovddášbellodaga nuoraidorganisašuvnna jođiheaddji Suvi Mäkeläinen mielas Jiekŋameara ruovdegeainnus leat hui olu gažaldatmearkkat Govva: Jouni Immonen / Yle

Ruonát ja ruonánuorat vuostálastet Jiekŋameara ruovdegeainnu, muitala Sameli Sivonen.

– Dat lea Lappi hearkkes lundui váralaš prošeakta. Mii eat máŋge namas guottit dan, beaškala Sivonen.

Gurutlihtu nuoraid ovddasteaddji Tuomas Suihkonen lea ovttaoaivilis.

– Mii vuostálastit ruovdegeainnu garrasit. Dat baicce ovddida dálkkádatrievdama, dadjá Suihkonen.

Vuođđosuopmelaš nuorat oidnet Jiekŋameara ruovdegeainnus dalán áitaga dorvvolašvuhtii, iige dáinna plánejuvvon linnjáin sáhte sihkkarastit ovdamearkka dihte gálvvuid buktima Supmii, jus heađi beaivi boahtá, ákkastallá vuođđosuopmelaččain Asseri Kinnunen.

– Suoma sihkkarvuođa dihte fidnu lea dehálaš, muhto ruovdegeainnu ferte geassit Ruoŧa bokte Norgii.

– Dálá linnjá manná menddo lahka Ruošša rájá. Dat lea dorvvolašvuohtagažaldat, ahte ruovdegeaidnu livčče nu lahka Ruošša rájá, ahte kranáhta sáhttá bálkestit. Kriissa áigge dan ruovdegeainnu livčče álki bilidit, ákkastallá Kinnunen.

Christoffer Ingo
Dál galggašii vuolgit Lappii guldalit báikkálaččaid oaiviliid Jiekŋameara ruovdegeainnus, dadjá ruoŧŧelašálbmotbellodaga nuoraid jođiheaddji Christoffer Ingo. Govva: Vesa Toppari / Yle

Ruoŧŧelašálbmotbellodaga nuoraid jođiheaddji Christoffer Ingo fas oaidná fidnu dehálažžan.

– Dat lea dakkár, man galgá hukset. Váttisvuohta lea, ahte oktage ii leat háleštan báikkálaččaiguin ášši birra. Dál galggašii vuolgit Lappii ságastallat áššis. Fidnu lea dehálaš Suoma infrastruktuvrra dáfus, dadjá Ingo.

Kristtalaš nuorat eai leat vel gávdnan nana ja sihkkaris oaivila áššái, muitala Aleksi Sarasmaa.

– Mii eat njuolga vuostálastte gal. Jus ruovdegeainnu huksejit, leat golbma ášši maid ferte bures váldit vuhtii ja dat leat dorvvolašvuohta, álgoálbmotrievttit ja birasgažaldagat.

Nuorat bastet váikkuhit bellodagaide ja plána lea čielggas

Buot nuoraid mielas dálkkádatrievdan lea ášši, man ovdii ferte čuovvovaš válgabajis bargat. Jiekŋameara ruovdegeaidnu laktása dán fáddái nannosit, dadjá gurutlihtu nuoraid ovddasteaddji Tuomas Suihkonen.

Tuomas Suihkonen.
Ráđđehusprográmmii galggašii čielgasit čálihit, ahte eatnamat leat álgoálbmogiid opmodat ja dasa ii sáhte guoskat, deattuha gurutlihtu Tuomas Suihkonen. Govva: Vesa Toppari // Yle

– Ruovdegeaidnu baicce ovddida dálkkádatrievdama, go hearkkes birrasii gusket, dohko gosa ii galggašii hukset maidige ruovdegeainnuid.

– Ráđđehusprográmmii galggašii čielgasit čálihit, ahte eatnamat leat álgoálbmogiid opmodat ja dasa ii sáhte guoskat, deattuha Suihkonen.

Nuoraidorganisašuvnnat bastet váikkuhit bellodagaid oaiviliidda, nannejit ruonánuorat ja guovddášbellodaga Suvi Mäkeläinen.

– Gal mii lihkus bastit váikkuhit. Dál mii eat leat nu viššalit háleštan guovddášbellodagas dán fáttás, muhto jáhkán, ahte mii nuorat bastit váikkuhit boahtevuođasge bellodaga oaivilii, árvala Mäkeläinen.

Nuorat čoahkkanit loahppavahkus hárjehallat ráđđehusráđđádallamiid. Nuoraid organisašuvnnat dahket ovttas iežaset ráđđehusprográmma ja dan bokte sii sáhttet váikkuhit Jiekŋameara ruovdegeidnui, smiehtada sosiálademokráhtaid Mikkel Näkkäläjärvi.

– Mii sáhttit čálihit iežamet, nuoraid ráđđehusprográmmii, ahte fidnu plánema heitet ja de doalvut dan dieđu min iežamet bellodagaide, čilge Näkkäläjärvi.

Makkár nuoraidorganisašuvnnaid ráđđehusprográmmas šaddá, dat čielgá bearjadaga 11.1.2019 veaigin.

Varrasamosat: Sápmi

Váldoođđasat

Varrasamosat

Muualla Yle.fi:ssä