Sápmi |

Nuortalaččat dohkkehedje evttohusa duohtavuođa- ja soabadankomišuvnna bargun – ášši lea dál Sámedikki duohkin

Nuortalaččaid ovddasteaddjit gieđahalle ášši duorastaga, Sámediggi čoahkkana boahtte vahkus.

Veikko Feodoroff
Nuortalaččaid ovdaolmmoš Veikko Feodoroff. Govva: Vesa Toppari Yle / Yle

Nuortalaččat lea dohkkehan sámiid duohtavuođa- ja soabadankomišuvnna mandáhta dahjege evttohusa komišuvnna bargun.

Nuortalaččaid siidačoahkkin (nu. siidsååbbar) ovttas Njellim, Keväjärvi ja Njávdáma guovlluid nuortalašráđiiguin čoahkkanedje mearridit áššis duorastaga 12.12. Njellimii.

Suoma stáhta, Sámediggi ja nuortalaččaid siidačoahkkin leat vássán jagi áigge ovttasbargan komišuvnna mandáhtain. Stáhtaráđđi gieđahalai ja dohkkehii evttohusa jo 13.11.2019.

Sápmelaččaid ja stáhta gaskasaš duohtavuođa- ja soabadanproseassa mihttomearrin lea dovddastit ja meroštallat vealaheami, man sápmelaččat leat vásihan sihke historjjás ja vásihit ain dán beaivve. Dárkkuhus lea čielggadit ja buktit oidnosii earret eará Suoma stáhta suddadanpolitihka ja sápmelaččaid vuoigatvuođaid eará loavkidemiid.

Evttohusas árvalit sápmelaččaide eanetlogu komišuvdnii. Komišuvnnas livčče vihtta komissára, geain guokte válljejuvvojit stáhtaráđi evttohusas, guokte Sámedikki evttohusas ja okta nuortalaččaid giličoahkkima evttohusas.

Sámediggi čoahkkana boahtte vahkus – stivra evttoha juogo dohkkehit dahje hilgut

Dál go nuortalaččaid ovddasteaddjit leat dohkkehan mandáhta, ášši lea Sámedikki dievasčoahkkima duohken. Jus dat dohkkeha evttohusa, sáhttet de nammadišgoahtit komišuvnna lahtuid.

Sámediggi čoahkkana dievasčoahkkimii 17.–18.12. Áššelisttus leat gávcci aitosaš čoahkkinášši, main duohtavuođa- ja soabadanproseassa evttohit gieđahallat goalmmádin.

Sámedikki stivrras leat jo evttohusat komissáraid válljema várás

Sámedikki stivra lea mearridan evttohit dievasčoahkkimii, ahte dat juogo dohkkeha dahje hilgu evttohusa.

Stivra evttoha maid dievasčoahkkima dohkkehit bealiváldima sámiid duohtavuođa- ja soabadankomišuvnna ásaheamis, jus dat mearrida dohkkehit evttohusa komišuvnna mandáhttan.

Bealiváldimis buktet ovdan sápmelaččaid vásáhusaid ja deattuhit, ahte komišuvnna mihttomearri lea čielggadit daid ovttasbarggus Sámedikkiin ja Nuortalaččaid siidačoahkkimiin.

Stivra evttoha dievasčoahkkima maid dohkkehit evttohusa das, mo Sámediggi nammada iežas oasil komišuvnna lahtuid.

Stivra evttoha Sámedikki bivdit sámeservošis evttohusaid heivvolaš komissárain, geain lea maid ovddalgihtii jerrojuvvon, háliiditgo álgit dan bargui. Sámediggi ordnešii maid gullama dahje gullamiid evttohuvvon komissáraid válljemis. Loahpalaččat Sámedikki dievasčoahkkin mearridivččii, geaid dat evttoha stáhtaráđđái komissáran.

Varrasamosat: Sápmi

Váldoođđasat

Varrasamosat

Muualla Yle.fi:ssä