Sápmi

Nuortalaš Jaana Sverloff sihkkelastá 1 200 kilomehtera borasdávdabuohcci mánáid buorrin – joavkkut vulget mátkái bearjadaga

Jaana Sverloff, Team Rynkeby God Morgon
Jaana Sverloff vuolgá somás dovdduiguin sihkkelastit Suoma čađa. Govva: Priváhtta

Suomas sáhttá bearjadaga rájes oaidnit geainnuid alde fiskes ivdnái gárvodan sihkkelastiid. Okta sis lea Jaana Sverloff, Avvilis eret, guhte ostii vuosttas geaidnosihkkelis easkka mannan čavčča.

Jietna: Gabriela Satokangas / Yle

Ođđa gávpogii ja guvlui fárren oaččui Jaana Sverloff ohcat ođđalágán astoáiggedoaimmaid. Sverloff fárrii guokte jagi dassái Kokkolai, eaige gávpogis orron guoimmi lassin jur eará oahppásat. Sverloff lea eret Avvilis, gos Kokkolai lea badjel gávcci diimmu mátki, nuba bearášge lei oba guhkkin. Astoáigái gávdnui lihkus somás áigegollu sihkkelastimis.

– Liikojin lihkadit ja smihtten, mii livččii dakkár doaibma, man sáhtášin álggahit. Dasto oidnen báikkálaš aviissas almmuhusa, mas sihkkelastinjoavku ozai sihkkelastiid, Sverloff muittaša.

Jaana Sverloff Rynkeby-sihkkel
Jaana Sverloff sihkkelis lea Suoma leavgga lassin dieđusge maid sámeleavga. Govva: Priváhtta

Sverloff beasai mielde Nuortabađaeatnama Team Rynkeby – God Morgon -sihkkelastinjovkui (TRGM). Fiskes biktasiidda gárvodan olbmot sihkelastet buori daguid vuoiŋŋas ja sin čohkken ruđat mannet ovdamearkka dihte borasdávdii buohccán mánáid veahkeheapmái.

– Dán Rynkeby-sihkkelastimis sáhtii bargat buori sihke alcces ja earáide. Dasto dasa gullá maiddái sosiálalaš bealli, go mii bargat das olu ovttas. Dát orui hui heivvolaš munnje, son dadjá.

1 200 kilomehtera miehtá Suoma

Jaana Sverloff ovttas eará sihkkelastiiguin vuolgá mátkái dán vahku bearjadaga. Ulbmilin lea sihkkelastit miehtá Suoma 1 200 kilomehtera. Dábálaččat joavkkut leat sihkkelastán Pariisii, Tour de France -sihkkelastindáhpáhusa ruovttubáikái, muhto koronavirusdili geažil sii sihkkelastet dál Suoma geainnuid.

Dál namman leage Tour de Finland.

sihkkelastinjoavku
Ostrobothnia-joavku sihkkelastá Kokkolas gitta Levii. Govva: Priváhtta

Ostrobothnia-joavku vuolgá Kokkolas Vaasai ja Seinäjokii, gos stuorrá oassi joavkku olbmuin orro. Dasto sii vulget Suomussalmi bokte Guossámii, Soađegillái ja moalla vuordá Gihttela Levis boahtte vahku sotnabeaivve.

Oktiibuot leat gávcci joavkku ja sulaid 300 sihkkelasti duolmmasteamen mátkái dáhpáhusa olis.

Guhkes mátkki sihkkelastin gáibida beaktilis hárjehallama

Dákkár mátkái ii sáhtáše vuolgit hárjehallama haga. Olles čavčča ja dálvvi áigge joavku lea hárjehallan olu, vai sii leat sihkkarit gárvásat sihkkelastit badjelaš duhát kilomehtera mátkki.

– Mun in leamaš makkárge gárvvis sihkkelasti, go serven jovkui. Osten vuosttas geaidnosihkkela mannan čavčča, Jaana Sverloff muitala.

Dálvvi áigge hárjehallanprográmmas leamaš máŋggat spinning-hárjehusat ja vázzintuvrrat. Dieđusge deahkit galget leat maid buriin fámuin, vai veadjá. Joavku lea geahččalan hárjehallat ovttas nu olu go fal vejolaš. Go geainnut sudde, sii dieđus vulge dalán daidda sihkkelastit.

– Geasi guvlui vahkuid sihkkelastindiimmut leat gal lassánan. Mii leat hárjehallan dan, mo sihkkelastit guhkit mátkki, son lohká.

Geassebáhkat deive justa reaissu áigái

TRGM-joavkkut vulget reisui bearjadaga justa, go olles Suomas leamaš issoras báhkka dálkkit. Mollii Levii sii galggašedje beassat boahtte vahku sotnabeaivve. Ostrobothnia-joavkkus leat 35 sihkkelastti ja gávcci olbmo fuolahanjoavku, geat fuolahit das, ahte čáhci lea doarvái ja biepmu gávdno.

– Dákkár dálkkiin ii sáhte deattuhit menddo olu dan, man dehálaš fuolaheapmi lea.

– In veaje stresset dan menddo olu, boahtá dakkár dálki, mii boahtá. Dieđusge dat váikkuha mátkái diená, ahte ferte leat earenoamáš dárkil das, ahte juhká doarvái, Sverloff muitala.

TRGM
Čáppa duovdagiid ii sáhte mátkki alde nu beare olu geahččat, vaikko miella livččiige. Vai bissu joavkku fárus, galgá leat olles áigge pára bálddas. Jaana Sverloff čaibmáge, ahte stuorámus oasi mátkkis manná skihpára bađa geahčadettiin. Govva: Priváhtta

Vaikko mihttár lahkonivččege garrasutge báhkaid, ii dat daga Sverloff mielas maidege.

– Válddán goas beare millosabbot dákkár báhkka geassebeaivvi, go arvedálkki dahje bajándálkki. Mii leat gal dan arvvisge sihkkelastima hárjehallan, muhto millosabbot beaivváža, giitu fal! čaibmá Sverloff.

Dál Sverloff vuordá juo iluin dan, ahte beasašii viimmat geainnu ala. Su mielas leamašan nu somá trenet ovttas joavkkuin ja sis leamaš somá joavkovuoigŋa álggu rájes.

– Vuolggán hui somás dovdduin. Mii leat ovttas dás bargan buori barggu fargga jagi, ovttas mii maid besset molii.

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat

Muualla Yle.fi:ssä