Sää´mjânnam |

Nuõrttsääʹmǩiõl škooultõs lij mottam määŋgi jieʹllem – kuuitâǥ ǩiõllškooultõõzzâst feʹrttai eʹpet väʹldded eeʹjj kõhtt

Nuõrttsääʹmǩiõl liinjin feʹrttai eʹpet väʹldded kõhtt. Puõʹtti vuâra nuõrttsääʹmǩiõl linjj alttâd Aanrest eeʹjjest 2020.

Laura Olsen on opiskellut vuoden koltansaamea.
Eeʹǩǩ nuõrttsääʹmǩiõl škooultõõzzâst uuʹdi suʹnne jeänab, ko vuõššân vuõʹrdi. Govva: Janica Gauriloff / Yle

Lååi määnpââʹj mââiårra Laura Olsén ij veâl pââstam mainsted nuʹt jiânnai nuõrttsäämas, ko pâi muäʹdd sääʹn. Ââʹn son eštt ruõʹpsses sååʹffest da mušttal jiijj eeʹjj pirr õõut minoriteʹttsääʹmǩiõl mättjummšest. Juõʹǩǩ sääʹnn mainstâttmõõžžâst lij nuõrttsäämas.

Olsén lij õhtt tõin mättʼtõõđjin, ǩii lij lookkmen nuõrttsääʹmǩiõl da -kulttuur. Suʹnne eeʹǩǩ lij leämmaž samai hääʹsǩ da vääžnai. Suʹnne leäi pukin vääžnmõs, mättjed ođđ ǩiõll.

– Leäm vuäǯǯam jiânnai jeänab, ko leäm vuärddam tän eeʹjjest, särnn Olsén.

Olsén ååsk, što lij võl jiânnai oummu, ǩeäk haaʹleʹče väʹldded sooǥǥ ǩiõl mååust. Da jeeʹres oummu še, ǩeäk haaʹleʹče mättjed nuõrttsääʹmǩiõl.

Âʹvvlest jälsteei Tuomas Kiprianoff lij še Olsén-nalla vieʹttjam čiâssid nuõrttsääʹmǩiõl ǩiõllmäättin.

Son lij še tän miõlâst, što tät škooul oudd jiânnai uʹcc ǩiõʹlle da kulttuuʹre.

– Mättʼjem muu sooǥǥ ǩiõl. Ååʹn meeʹst lij konmlo ođđ ǩiõl mainsteei, Kiprianoff rämmaš.

Koltansaamen kieliharjoittelija Tero Harju haastattelee Tuomas Kiprianoffia.
Yle ǩiõllharjjtõõlli Tero Harju mainstââttmen Tuomas Kiprianooff suu škoouleeʹjjest. Govva: Janica Gauriloff / Yle

Vuäʹmm mättʼtõõtti rämmaš õinn jiijj ǩiõllpälggaz

Oulu universiteeʹtt mättʼtõõtti Markus Juutinen mättʼtõõli še nuõrttsääʹmǩiõl Sääʹmvuuʹd škooultemkõõskõõzzâst eeʹjjest 2012.

Suʹnne ǩiõllškooultõs ääʹvii ođđ uusid: mättʼtõõttmõš mâŋŋa nuõrttsääʹmǩiõlâst šõõddi Juutinen tuâjj.

– Ko mon aʹlǧǧem, de mon tiõʹttem što tät-han lij samai hääʹsǩ da miõllǩiõʹssi ǩiõll, Juutinen mušttal.

Nuõrttsääʹmǩiõl mättjummšest väʹldded eʹpet kõhtt

Sääʹmvuuʹd škooultemkõõskõõzz halltõs lij mieʹrrääm väʹldded kuuitâǥ kõõut nuõrttsääʹmǩiõl mättjummšest.

Nuõrttsääʹmǩiõl da -kulttuur škooultõs lij ouddâl še leämmaž eeʹjj kõõutâst da nääiʹt feʹrttai eʹpet tuåimmad tieʹǧǧ diõtt, särnn Škooultemkõõskõõzz rehtor Eeva-Liisa Rasmus-Moilanen.

– Täk jie leäkku hääʹsǩes mieʹrrõõzz, leâša teäggtõõzz diõtt feʹrttai kuâđđjed mâiʹd-ne meädda, gåårad Rasmus-Moilanen.

Sámi oahpahusguovddáža rektor Eeva-Liisa Rasmus-Moilanen
Sääʹmvuuʹd škooultemkõõskõõzz rehtor Eeva-Liisa Rasmus-Moilanen iʹlla rämmai, ko nuõrttsääʹmǩiõl liinjin feʹrttai eʹpet väʹldded kõhtt. Govva: Linnea Rasmus / Yle

Sääʹmvuuʹd škooultemkõõskõs alttâd eʹpet nuõrttsääʹmǩiõl liinj puõʹtti vuâra eeʹjj ǩeeʹjjest, eman čâhčča 2020.

Ǩeeʹrjteei: Nuõrttsääʹmǩiõl ǩiõllharjjtõõlli Tero Harju da Janica Gauriloff..

Varrasamosat: Sää´mjânnam

Váldoođđasat

Varrasamosat

Muualla Yle.fi:ssä