Sää´mjânnam |

Nuõrttsäʹmmlain iʹlla ni veâl päiʹǩǩ ođđ Tâʹvv-Lääʹddjânnam ortodookslaž seäʹbrrkååʹdd välddõõzzâst – Saaʹmi ouddooumaž: "Tuõđi hueʹneld hoiʹddjum äʹšš"

Ko Lappi seäʹbrrkåʹdd õhttââvv Oulu da Kajaani seäʹbrrkooʹddivuiʹm õhttân jõnn seäʹbrrkåʹdden skamm-mannust, päʹcce nuõrttsäʹmmla välddõsneeʹǩǩtää še tän vuâra. Täävtõssân lij vuäǯǯad sääʹmeeʹttkõʹstti jeäskka eeʹjj 2024 aʹlǧǧi toiʹmmjempâjja.

Veikko Feodoroff.
Saaʹmi ouddooumaž Veikko Feodoroff lij maantõõttâm, mäʹhtt ortodookslaž ceerkav lij ǩiõttʼtõõllâm nuõrttsäʹmmlai vuässõõttâmvuõiggâdvuõđ ceerkvallaš välddõõzzâst. Govva: Sara Kelemeny / Yle

Skamm-mannust Tâʹvv-Lääʹddjânnam ortodookslaž seäʹbrrkooʹddin šâdd jõnn raajâsoođummuš, ko kolmm seäʹbrrkååʹdd õhttâʹvve õhttân jõnn seäʹbrrkåʹdden. Puõʹttiääiʹj Lappi, Kajaani da Oulu seäʹbrrkååʹdd puäʹtte tåimmad õõutsââʹjest da skamm-mannust ođđ seäʹbrrkådda vaʹlljeet jõnn vuuʹdest õhttsa 15 ođđ ceerkav-välddõsneʹǩǩed da Lappi vuuʹdest lie õhttsa kolmm pääiʹǩ.

Nuõrttsäʹmmlain ij kuuitâǥ puäʹđ leeʹd jiijjâz välddõsneǩ tän ođđ välddõõzzâst, håʹt juʹn eeʹjj 2019 Lappi ortodookslaž seäʹbrrkåʹdd da Sääʹmteʹǧǧ lie saǥstõõllâm ääʹššest.

Oulu seäʹbrrkååʹdd pââimõs papp Marko Patronen mušttal, što säʹmmlai äʹšš paaʹʒʒi hoiʹddjeǩani koronapandemia tuejjääm sââʹj diõtt.

– Korona sieʹjjti jiânnai ääʹšš ouddnummuž. Eeʹjj 2020 ceerkavsåbbar õõlǥi såbbrõõššâd ougglõssân da ouddâl tõn såbbar mieʹrriim, što puk lääʹǩǩ- da šiõttõsaaʹššid seeʹrdet puõʹtti ekka tõʹnt, ko tõk lie miâlggâd vaiʹǧǧes ääʹšš. Nuõrttsäʹmmlai välddõspääiʹǩ ouddnummuš lij lääʹjj mottmõõžž tueʹǩǩen, mušttal Patronen.

Marko Patronen
Oulu seäʹbrrkååʹdd pââimõs papp Marko Patronen mušttal, što nuõrttsäʹmmlai aaʹššid viiǥǥât ooudâs nuʹtt, što nuõrttsäʹmmla leʹčče mieʹldd välddõsvaalin eeʹjj 2023. Govva: Oulun ortodoksinen seurakunta

Pââimõs papp Marko Patronen mušttal, što nuõrttsäʹmmla vuäǯǯa jiijjâs pääiʹǩ ceerkav-välddõʹsse tååimpâjja 2024-2026. Jietna: Sara Kelemeny / Yle

Säʹmmlain huõll, mäʹhtt sij jiõn vääʹldet lokku tuʹmmstõktuâjast

Nuõrttsäʹmmla jie leäkku mieʹldd veâl taʹnni vaalin, koin vaʹlljeet vuäŋkõs pâjja välddõõzz Tâʹvv-Lääʹddjânnam seäʹbrrkådda. Patronen mušttal, što täävtõssân lij, što nuõrttsäʹmmlai eeʹttkâsttmõš lij mieʹldd eeʹjj 2023 vaalin, koin vaʹlljeet puõʹtti pâjja 2024-2026 eeʹttkõʹstti.

Ortodookslaž ceerkav lij čõnnõõttâm viikkâd ooudâs nuõrttsäʹmmlai sââʹj ceerkvest ouddmiârkkân sääʹmǩiõllsaž kääzzkõsõõlǥtemvuõđin da tõin, što nuõrttsäʹmmlain feʹrttai leeʹd eeʹttkõʹstti ortodookslaž pââimõs mieʹrreemvääʹldest leʹbe ceerkavsåbbrest. Tõn lââʹssen säʹmmlain âlgg leeʹd eeʹttkâsttmõš še vueʹlbuž mieʹrreenvääʹldest, mâʹte vooudlaž seäʹbrrkååʹdd välddõõzzâst.

Saaʹmi ouddooumaž Veikko Feodoroff mušttal, mäʹhtt saaʹmi siidsååbbar da Sääʹmteʹǧǧ lie tuõđi kuuʹǩǩ tuejjääm tuâj tõn ouʹdde, što nuõrttsäʹmmla peäʹsse vuässõõttâd ceerkav tuʹmmstõktuõjju.

Saaʹmi ouddooumaž Veikko Feodoroff vuäinn, što Lääʹddjânnam ortodokslaž ceerkav paaʹʒʒi ääʹšš kõskkräjja. Feodoroff lij maantõõttâm, mäʹhtt säʹmmlai ääʹšš jie ouddân ni vooʹps ortodokslaž ceerkvest. Jietna: Sara Kelemeny / Yle

Nuõrttsäʹmmlain õõlǥči leeʹd vuässõõttâmvuõiggâdvuõtt nuʹtt jõnn Tâʹvv-Lääʹddjânnam seäʹbrrkååʹddest ko še uuʹccab Lappi vuuʹd kappelseäʹbrrkååʹddest. Saaʹmi ouddoummust lij huõll, mäʹhtt nuõrttsäʹmmlai jiõnn puätt ouʹdde tuʹmmstõktuâjast.

– Meeʹst iʹlla ni kuäbbaž sââʹjest põõšši päiʹǩǩ. Leäʹp saǥstõõllâm ääʹššest juʹn 2019 ij-ǥa tõt leäkku ouddnam ni koozz. Lij tuõđi hueʹneld hoiddum ortodookslaž ceerkvest tät äʹšš da tåbddai, äʹšš lij pääccam kõõskräjja, Feodoroff särnn.

Ortodookslaž ceerkav täätt lââʹzz saǥstõõllmõõžžid

Oulu seäʹbrrkååʹdd pââimõs papp Marko Patronen tuâtt, što ääʹšš ǩiõttʼtõõllâm lij ouddnam miâlggâd meälǥžet.

– Välddõspaaiʹǩid feʹrttai tuejjeed lääʹǩǩmuttsid, kook ouddne tuõđi meälǥžet. Tõt lij gåår, leâša kuuitâǥ täk ääʹšš ouddne kâʹl, särnn Patronen.

Patronen mušttal še, što sij lie mieʹrrääm ceerkavhalltõõzzâst tättad ođđ saǥstõõllmid Sääʹmtiiʹǧǧin. Täävtõssân lij čõõđtet saǥstõõllmid eʹpet Sääʹmtiiǧǧin juʹn skamm-mannust.

– Mââimõs saǥstõõllmin lij mõõnnâm tuõđi kuʹǩes äiʹǧǧ, da tõʹnt haaʹleep kõõččâd Sääʹmteeʹǧǧest, što haaʹlee-a sij peeiʹvted mâid-ne da koʹst leäʹp tän räjja mõõnnmen, mušttal Patronen.

Saaʹmi ouddooumaž Veikko Feodoroff vuârdd, što mââimõsân ääʹšš mâʹnne õõudårra, mâʹte lij juʹn iiʹjji ääiʹj nuõrttsäʹmmlaid låʹppuum.

– Vuârdam, što saǥstõõllmõõžžin puätt ouʹdde, što tõid âlgg teâuddjed, tõid vuõiggâdvuõđid, mâʹst leäʹp juʹn õʹhttešt saǥstõõllâm. Mij taarbšep täi jeeʹres taaʹzzid jiijjân eeʹttkõʹstti juõʹǩǩ päikka. Tän mij haaʹleep viikkâd čõõđ, ko tõk lie juʹn miʹjjid låʹppuum, särnn Feodoroff.

Lââʹzz sääʹmǩiõllsaž ođđsid vuäitak ǩiõččâd Yle Ođđâz-seeidast da kuvddled Nuõrttsäämas-seeidast Yle Areenast.

Varrasamosat: Sää´mjânnam

Váldoođđasat

Varrasamosat

Muualla Yle.fi:ssä