Sápmi |

Nuvvosa rohkosviesus leat vázzán skuvlla ja rohkadallan – viesu šilju ordnejedje dán vahkus

Ohcejoga searvegottis leat dán geasi geavahan návccaid searvegotti eaiggáduššan visttiid, ráhkkanusaid ja daid birrasiid ordnemii.

Video: Nuvvosa rohkosviesu birrasa ordnejedje
00:45
Nuvvosa rohkosviesu birrasa ordnejedje Video: Yle

Deatnogáttis Nuvvosis lea oalle hušša go loginar olbmo leat ordnemin Nuvvosa rohkosviesu birrasa. Šiljus ja dearpmi alde sahejit olles leavttuin miestagiid ja sogiid. Ulbmil lea sahát suhkkes ja menddo guhkkin šaddan miestagiid eret vai oainnus Deatnogáddái rahpasa.

Päivi Aikasalo mielas eaktodáhtolaš bargu lea maid ovttastallan, mas lea mearkkašupmi.
Päivi Aikasalo mielas eaktodáhtolaš bargu lea maid ovttastallan, mas lea mearkkašupmi. Govva: Maiju Saijets / Yle
Ohcejoga searvegottis leat dán geasi geavahan návccaid searvegotti eaiggáduššan visttiid, ráhkkanusaid ja daid birrasiid ordnemii. Ohcejoga girkohearrá Päivi Aikasalo mielde searvegoddi lea ordnen dán geasi Nuvvosa rohkosviesu birrasa lassin maiddái Ohcejoga ođđa ja boares hávdeeatnama, Ohcejoga báhppala birrasa ja borgemánus áigot velá sahát miestagiid Savvona hávdeeatnamis.

– Dán geasi leat bargan vehá eanet go dábálaččat hávdeeatnamis, leat sahán miestagiid ja njeaidán muoraid nu, ahte ii leat nu suohkat. Dasto Ohcejoga boares hávdeeatnamis leat ceggen ruossaid ja báhppala olgovisttiid leat málen ođđasit.

Barggu olis muittašit viesu historjjá

Nuvvos rohkosviesu šiljus eaktodáhtolaččat háleštit ja smiehtadit barggu olis vistti duogáža ja historjjá. Ohcejoga searvegottis lea dieđus, ahte rohkosviesu historjá ollá gitta 1800-logu beallái. Nuvvosa rohkosviesu duogážis leat máŋggalágan muittut ja dieđut.

Lahja Paltto Nuvvos rohkosviesus gáffebottus. Paltto mielas lea suohtas ovttas ordnet boares rohkosviesu birrasa.
Lahja Paltto Nuvvos rohkosviesus gáffebottus. Paltto mielas lea suohtas ovttas ordnet boares rohkosviesu birrasa. Govva: Maiju Saijets / Yle
Nuvvoslaš Lahja Guttorm lea gullan iežas isida sogas, ahte rohkosviessu ii leat álot ceaggán Nuvvosis Deanu gáttis dearpmi alde. Guttorm lea gullan, ahte viessu lea buktojuvvon báikki ala Savvonis. Dan ovdal dát boares hirsaviessu sáhttá leat leamaš vel eará sajis ovdalgo Savvonii sirdojuvvui.

Ándde Jon Piera, Piera Guttorm muittaša, ahte rohkosvisti lea dál juo goalmmát sajis. Guttorma mielde rohkosviessu lea álggos huksejuvvon Nuorbenjárgii, gos dat sirdojuvvui Savvonii ja maŋŋelis Nuvvosii.

– Ándde Jon Piera muittaša, ahte rohkosviesu dáide sirdit dan maŋŋá Savvonii. Historjjá dutkit leat čállán, ahte vuosttas Deanu virggálaš guolástusnjuolggadus bođii fápmui 1873 ja dat loahpahii Vuovdaguoikka rastábuođu geavaheami.

Ándde Jon Piera, Piera Guttorm čohkohallamin Nuvvosa rohkosviesus.
Ándde Jon Piera, Piera Guttorm čohkohallamin Nuvvosa rohkosviesus. Govva: Maiju Saijets / Yle
Nuvvosa rohkosviessu ceaggá dál goittotge Deanu dearpmi alde Nuvvosis Lahja ja Heikki Guttorm eatnama alde.

Rohkosviessu lea doaibman searvegoddeeallima lassin maiddái eará doaimmas. Toivo Paltto muitala iežas vázzán rohkosviesus skuvlla maiddái.

– Mun dat gal lean dáppe leamaš nu gohčoduvvon kiertoskuvllas. Dat lávii leat ain golbma vahku hávil. Midjiide oahpahedje oskkoldaga, rehkenastima ja mii dat okta lei vel, smiehtada Paltto.

Toivo Paltto lei okta dain eaktodáhtolaš bargiin, guhte lei ordnemin Nuvvosa rohkosviesu birrasa.
Toivo Paltto lei okta dain eaktodáhtolaš bargiin, guhte lei ordnemin Nuvvosa rohkosviesu birrasa. Govva: Maiju Saijets / Yle
Paltto muittaša, ahte johttiskuvllas dahjege nugo suopmelaččat dadje kiertoskuvllas oahpahedje mánáide vuođđoáššiid. Olmmoš galggai máhttit lohkat, rehkenastit ja lávlut. Paltto muitá, ahte Nuvvosis johttiskuvllas oahpaheaddjin lávii leat Agneta Valle. Katekehtaskuvla ja Agneta Walle birra lea čállán ovdamearkka dihte Veli-Pekka Lehtola Saamelaiset suomalaiset -girjjistis.

“Hui fiinnis go Deatnu oidno fas”

Päivi Aikasalo oaidná, ahte oktasaš divvunbargguin leat máŋggat mearkkašumit searvegoddelaččaide. Vuosttažettiin biras šaddá čorgadabbon ja nuppe dáfus olbmot besset ovttastallat. Eaktodáhtolaš bargiid lea leamaš álki oažžut birasbargguide.

– Dás lea hui fiinnis, šaddá suohtas čohkohallat šiljus ja rohkosviesu siste girkogáfiid juhkamin, go Deatnu oidno fas. Olbmot leat liikon bargat ovttas ja lea hui dehálaš, ahte juohke olbmo barggus lea mearkkašupmi ja dárbu, čilge Aikasalo eaktodáhtolaš barggu mearkkašumis.

Varrasamosat: Sápmi

Váldoođđasat

Varrasamosat