Sää´mjânnam |

Ođđ eeʹǩǩ pohtt siidsåbbra jõnn šõddmõõžžid – tän eeʹjj rääʹjest siidsååbbar koontâr kääzzkâstt še Keväjääuʹrest

Saaʹmi siidsåbbar koontâr da ouddooumaž lie valmštââllmen ođđ ekka, mii pohtt ouʹdde jõnn aaʹššid.

Terhi Harju
Siidsåbbar ođđ piisar Terhi Harju kääzzkâstt puõʹtti ääiʹjest še Keväjääuʹrest. Govva: Mikkal Morottaja / Yle

Eeʹǩǩ 2019 pohtt säʹmmlaid jõnn aaʹššid. Påʹrǧǧmannust prääzkjet, ko säʹmmlai aazztummšest šâdd õhttsa 70 eeʹjj da tõõzz lie oummu juʹn valmštõlškuättam. Nuʹt še saaʹmi siidsååbbar ođđ piisren alttääm Terhi Harju.

– Vuârdam, što šâdd leeʹd jiânnai tuâjj kâʹl tän prääʹzniǩ eeʹjj diõtt da lie še jiânnai jeeʹresnallšem haʹŋǩǩõõzz jååʹttmen. Âlgg kâʹl jiânnai reâuggad, smeâtt Harju.

Juʹn eeʹjj vuõssmõs tuâjjpeeiʹvin feʹrttji Harju vaʹstteed tuåimteei kõõččmõõžžid jiijjâs tuâj pirr. Vuõssmõs tuâjjeeʹjjest son vuârdd jiânnai tuâj.

– Kâʹl leäm hoʹhssjam, što tät tuâjj lij jeänab da jeänab aalǥam ǩieʹssed muu miõl. Muʹnne lij vääžnai mieʹldd tän tuâjast da haaʹlääm ooudeed tän siidsåbbar tuåimmjummuž muu jiijjân tuâjain.

Še siidsåbbar koontâr tuåimid lij ođđ tuâjjla mieʹldd šõddâm muttsid. Saaʹmi siidsåbbar koontâr Sääʹmpõõrtâst Čeʹvetjääuʹrest lij äävai eeʹjj 2019 aalǥâst ääʹljeeʹl juõʹǩǩ neäʹttel vuõssaarǥ da mââibaarǥ čiâss 10.00-17.00.

Leâša tän eeʹjj ääʹljeeʹl še Njeäʹllem-Keväjääuʹr vuuʹdest lij mååžna âânned siidsåbbri kääzzkõõzzid, ko piisar Terhi Harju kääzzkâstt še jiijjâs dåmmsiidâst. Keväjääuʹrest äʹššummuž pirr âlgg suåppad ouddǩiõʹtte piisrin.

Saaʹmi ouddooumaž: "Måtam kueʹllšeellemaaʹššjid feʹrttai piijjâd siidsåbbrin tän peivva"

Veikko Feodoroff
Mõõʹnni eeʹjj ouddoomžen vaʹlljuum Veikko Feodoroff vuârdd juʹn eeʹjj kååččid. Govva: Vesa Toppari / Yle

Saaʹmi ouddooumaž Veikko Feodoroff alttâd še ođđ tuåimmpââʹjes. Prääzniǩeeʹǩǩ pohtt jiânnai vuârddmõõžžid da tuåimid še saaʹmi ouddooumže.

– Meeʹst lie jååttmen nåkkam jõnn ääʹšš da tõk-han lie ooudâs mõõnnam mâʹte tät mäddkåʹddkääv da ruʹvddčuâǥǥas ääʹšš. Näʹvddem lie vuõssmõs ääʹšš, mušttal Feodoroff.

Vuõssmõs siidsåbbrid lij plaanum alggekka, ko pâi sääʹmsuåvtõõzz pieʹsse vuõssân såbbrâʹstted.

Õhttân ääʹššen šâdd še säʹmmlai kueʹllšeellempõõrti puõʹtti ääiʹj.

– Leäʹp Meäʹcchalltõõzzin valmštõõllâm tõn kueʹllšeellempõõrti da tõi paaiʹǩi pirr nåkkam vuâđđjuuʹrd, što mäʹhtt ǩeâmpid vuäitt vuäʒʒad da koozz da mõõnnalla tõid vuäitt ooccâd. Näkkam aaʹššjin meeʹst feʹrttai toʹben siidsåbbrest âânned, mušttal Feodoroff.

Varrasamosat: Sää´mjânnam

Váldoođđasat

Varrasamosat

Muualla Yle.fi:ssä