Sápmi |

Ođđa davvisámegielat biibbalajorgalus váldojuvvui atnui Suomasge – Nuoraid mielas jorgalus lea áddehahtti

Boares biibbalajorgalusas ledje olu sánit maid nuorat buolva ii fáhten dahje ádden, dál dan lea álkit lohkat, oaivvildit sii.

Ohcejoga nuorat besse lohkat ávvumeassus čalabihttáid ja ovdarohkosa.
Ohcejoga nuorat besse lohkat ávvumeassus čalabihtáid ja ovdarohkosa. Govas Senja Aikio, Elle Raudasoja ja Mihkku Laiti. Govva: Vesa Toppari / Yle
ohcejohka

Gieskat ávvudedje Guovdageainnus, dál leiges Suomas vuorru ávvudit ođđa davvisámegielat biibbalajorgalusa. Davvisámegielat biibbalajorgalusa ávvumeassu lei Ohcejogas sotnabeaivve 1.9.2019.

Ohcejoga nuorat leat vázzán rihppaskuvla boares jorgalusa áigge, iige dat lean álki, muitala ohcejohkalaš Senja Aikio.

– Gal dat lei muhtin sániid vehá váttis áddet, mieđiha Aikio.

Nuorat besse lohkat allaárvosaš dilálašvuođas ovdarohkosa lassin velá čálabihtáid ođđa jorgalusas ja sii ledje duđavaččat jorgalussii, muitala Elle Raudasoja.

– Dat lei hirbmat áddehahtti go veardida dasa boares Biibbalii. Doppe ledje hirbmat olu sánit maid ii ádden iige fáhten muhto dát ođđa lea buorre.

– Dál ádde veháš eanet maid lohká, go doppe leat dakkár ođđa áigásaš sánit, joatká Raudasoja.

Elle Raudasoja ja Mihkku Laiti logaiga čalabihttáid ávvumeassus.
Elle Raudasoja ja Mihkku Laiti logaiga ávvumeassus čalabihtáid ođđa Biibbala jorgalusas. Govva: Vesa Toppari / Yle

Boarrásat buolva máhtii bures lohkat boares jorgalusa, dál sámebarggu čálli illuda nuoraid beales

Oulu Bismagotti sámebarggu čálli Erva Niittyvuopio mielas boarrásat buolva gal máhttá bures lohkat boares jorgalusa.

– Dalle go mu eadni vel elii, de mun dávjá riŋgestin sutnje ja jerren, ahte sáhtátgo munnje lohkat dien ja dien. Boares olbmot dieđusge máhttet lohkat dan boares Biibbala bures.

Dál son illuda nuoraid beales.

– Jus smiehttat vaikko rihppaskuvlageavahusas, de nuorat bohtet fáhtet sáni, leahan dat giella hui áddehahtti ođđa jorgalusas.

Erva Niittyvuopio lea Oulu bismagotti sámebarggu čálli.
Dál oažžut ovdamearkka dihte rihppaskuvlamánáide addit iežas Biibbala, illuda Niittyvuopio. Govva: Vesa Toppari / Yle

Ođđa jorgalusas muhtun oahpes áššit leat rievdan, muhto eai olu, govvida Niittyvuopio.

– Dat lea šaddan njuovžilabbon dat giella. Jus jurddašetne, ahte dá lea dat boares Biibbal ja de lea dát otnábeaivve giehtaprográmma, ja dás veardidat vaikko dan oskkudovddastusa, dat lea mannan njuovžilabbon dat giella, čilge Niittyvuopio.

– Ii dat leat olu rievdan, muhto moadde sáni goit. ovdal daddjui “Bassi vuoiŋŋa ala,” ođđa vuohki maid mii geavahat dál, lea "Bassi vuigŋii." Dat lea várra dat mo lea vuohkkasut dadjat, muitala Niittyvuopio.

Earkebisma Tapio Luoma galledii Ohcejogas ođđa davvisámegielat Biibbaljorgalusa ávvumeassus.
Vai olbmo oktavuohta Ipmilii seailu ja son oažžu das fámuid, de dalle dárbbašuvvo eatnigielat Biibbal, dadjá earkebisma Tapio Luoma. Govva: Vesa Toppari / Yle

Earkebisma sávvá, ahte eandalii nuorat buolva gávdná ođđa jorgalusa mielde Ipmila Sáni

Ávvumeassui lei boahtán maiddai earkebisma Tapio Luoma.

– Lean ilus go bessen leat mielde dáid doaluin. Ođđa biibbalajorgalusat eai ilmma oba juohke logát jagige. Dál dat dáhpáhuvai dáppe Ohcejogas. Dát lei fiinna vásáhus munnje, muitala Luoma.

Luoma muittuha man dehálaš eatnigiella lea oskkus.

– Lea čielggas, ahte eallima hearkkimus ja deháleamos áššiid sáhttá gieđahallat dušše iežas eatnigillii. Dál go ođđa jorgalus lea almmustuvvan, sávan ahte das lea mearkkašupmi sámiid vuoiŋŋalaš eallimii.

Earkebisma sávvá, ahte eandaliige nuorat buolva gávdná ođđa jorgalusa mielde Biibbala Sáni.

– Áddehahttivuohta lea issoras dehálaš. Sávan, ahte ođđa jorgalusa mielde eatnigielat sámenuorat gávdnet eallimii vuođu masa dorvvastit, dadjá Luoma.

Sámegielat Biibbala ávvumeassu 1.9.2019
Ohcejoga girku lei measta dievva sotnabeaivve 1.9.2019 go ávvudedje davvisámegielat Biibbala ođđa jorgalusa. Govva: Vesa Toppari / Yle

Davvisámegiellagat illudedje biibbalajorgalusas, anárašgiellagat gártet vel vuordit

Ohcejoga ávvumeassus čogge oaffara anárašgielat biibbaljorgalussii. Dan sii gártet goit vuordit, go dássážii leat gárvánan easkka evangeliumat, muitala girkohearrá Tuomo Huusko.

– Jorgalanbargu lea oalle guhkes proseassa, das gal manná guhká. Sáhttá mannat vel 10-20 jagi. Dat lea ovddos guvlui go lea evangeliumat leat jorgaluvvon ja de boahtá Ođđa Testameanta, muitala Huusko.

Anárašgielat biibbaljorgalusbarggus lea goit áibbas earálágan resursadilli go davvisámegielat jorgalanbarggus lei. Davvisámegielat jorgalusas ledje davviriikalaš bargojoavkkut.

– Anárašgielat jorgalanbargojoavku lea unni, muitala girkohearrá Tuomo Huusko.

Ávvumeassu maŋŋá fálle girkostalliide mállása ja gáfiid.
Ohcejoga ávvumeassui ledje boahtán olu olbmot miehtá Sámi. Govva: Vesa Toppari / Yle

Ávvumeassu maŋŋá fálle girkostalliide mállásiid ja gáfiid báhppalis ja girkostobuin. Ođđa Biibbala sáhttá diŋgot alcces vaikko Pipliagávppi bokte.

Varrasamosat: Sápmi

Váldoođđasat

Varrasamosat

Muualla Yle.fi:ssä