Sápmi |

Ođđa digitála arkiivaportála rahpasa lagaš áiggiin: álkidahttá gávdnat dieđuid iežas soga ja ruovttuguovllu historjjás

Sápmelaččat leat hui beroštuvvan diehtit iežaset soga ja ruovttuguovllu historjjás. Nuohtti-portála galgáge leat ávkin daid dieđuid gávdnamii, oaivvilda Inker-Anni Linkola-Aikio.

Inker-Anne Linkola, projektipäällikkö
Sámi arkiivva bajitdárkkisteaddji ja AIDA-fidnu prošeaktahoavda Inker-Anni Linkola-Aikio muitala, ahte Nuohtti-portála bokte sáhttá ohcat sámegillii sámi materiálaid. Govva: Anneli Lappalainen / Yle

Maid Nuohtti-portálas sáhttá ohcat ja mo? Inker-Anni Linkola-Aikio Sámi arkiivvas vástida earret eará dáid gažaldagaide Anneli Lappalainen jearahallamis. Jietna: Anneli Lappalainen / Yle

Lagaš áiggiin rahpasa ođđa Nuohtti-portála neahtas. Dat lea ođđa diehtoohcangáldu, masa leat čohkken eurohpalaš muitoorganisašuvnnaid arkiivamateriálaid sápmelaččain ja sámekultuvrras digitálahámis.

Bálvalus galggašii álkidahttit ovdamearkka dihte sogaid dutkama arkiivvaid bokte.

– Olbmot háliidit dutkat iežaset soga, duogáža ja ruovttuguovllu ja leat beroštuvvan iežaset máttuin. Dihto sogaid dahje giliid birra sáhttet boahtit gažaldagat, ahte gávdnogo dain mihkkige. Das dat dávjá vuolgá ja de mii geahččalit rávvet. Dát portála galggašii álkidahttit dan maiddái, illuda Sámi arkiivva bajitdárkkisteaddji ja AIDA-fidnu prošeaktahoavda Inker-Anni Linkola-Aikio.

Nuohtti-portála bokte sáhttá ohcat iešguđet ohcansániin materiálaid iešguđet arkiivvain miehtá Eurohpá.

– Buot materiálaid ii vealttakeahttá fidne oidnosii, muhto doppe gávdno juobe ahte guđe arkiivvas dat leat. Seailluheaddjiarkiivvas lea gitta dat, makkár rivttiid dat lea juolludan, čilge Linkola-Aikio.

Nuohtti-portála lea ovddiduvvon davviriikkalaš Digital Access to Sámi Heritage Archives -fidnus. Fidnu jođiha Lappi universitehta ja das leat mielde maiddái Sámi arkiivvat Anáris ja Guovdageainnus ja Oulu ja Upmi universitehtat.

Ođđa portála ovdanbuktojuvvo ja lea iskkadanláhkai Álgoálbmotarkiiva dálá ja boahtteáiggis -konferánssas Anáris otne maŋŋebárgga. Neahttaportála rahpasa maŋŋá maid álbmogii.

Vuossárgga álgán konferánssa lágidit Arctic Indigenous Design Archives (AIDA II) -fidnu ja Digital Access to Sámi Heritage Archives -fidnu.

  • Guldal maiddái: Mii lea AIDA II -fidnu?

Vuosttas AIDA-prošeakta čohkkii duojáriid arkiivvaid, nuppi AIDA:s fas vuoddjut dasa, maid arkiiva sáhttá fállat álgoálbmogiidda ja mo heivehit arkiivabarggu nu, ahte dat vástida sámi diehtoipmárdusa. Inker-Anni Linkola-Aikio, guhte jođiha fidnu Suoma bealde, muitala lasi. Jietna: Anneli Lappalainen / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä