Sápmi |

Ođđa dokumeantaráiddus čuovvut Miisa Nuorgam mátkki Norgii oahppat sámegiela: áhpehisvuohta nuppástuhttá visot

Boatkanmeahttun lea gávccioasat rehálaš dokumeantaráidu jagis, mii nuppástuhttá Miisa Nuorgam eallima. Geahča smáhkkabihtáža!

Miisa Nuorgam lea sápmelaš, muhto ii leat mánnávuođastis oahppan sámegiela. Nuba son mearrida váldit manahuvvon giela ruovttoluotta, ja ohcá studeret Norgii Guovdageidnui.

– Háliidan oahppat sámegiela. Sámegiella lea mávssolaš oassi sápmelaš kultuvrra ja gielas lea uhki jávkat. Danin dát lea munnje earenoamáš dehálaš, dadjá Nuorgam.

Miisa Nuorgam lea doaimmaheaddji ja someváikkuheaddji ja Jagi nisson 2020. Son lea bargan eandalii e-valaštallama suorggis ja lea gilvalan maiddái Diili-prográmmas jagis 2018.

Vaikko Nuorgam juohká sosiála medias olu áššiid iežas árggas ja eallimis, ođđa dokumeantaráiddus son vurke kamerai bottuid, maid olbmot eai leat ovdal almmolaččat oaidnán.

Son vuordá fárrema mielde ođđa álggu: ođđa ustibiid, studeantafeasttaid ja vásáhusaid, muhto son ii máhte vel govahallat, makkár nuppástusat leat vuordimen. Guokte beaivvi fárrema maŋŋá Nuorgam dahká áhpehisvuođateastta, mii nuppástuhttá su ja veháš áigge ovdal fárrema Tinder-applikašuvnnas deivojuvvon albmá, Ruuviavustaja, eallima.

– Jurddašin ahte jos beasan skuvlii, guođán buot guimmešvuođaid ja duolletdálláriid Supmii, muhto deiven fiinna Ruuviavustaja ja das dat vulggii! Mun lean liikosteaddji ja ii-monogamalaš, nuba lean gealdagasas, mo moai ceavzit dáin nuppástusain, dadjá Nuorgam.

Birgego Miisa vuorddekeahtes áhpehisvuođa buktin nuppástusaiguin? Mo Miisa ja Ruuviavustaja párragaskavuohta gierdá? Geargágo son oahppat sámegiela nu, ahte bastá sirdit dan maiddái ovddos guvlui iežas mánnái? Earet eará dáid áššiid dokumeantaráidu gieđahallá,

Ráiddus leat gávcci oasi ja dat tekstejuvvo davvisámegillii ja ruoŧagillii.

Boatkanmeahttun lea ollásit geahččanláhkái Yle Areenas 20.8. ja ráidu čájehuvvo tv:s Yle TV2:žis 24.8. rájes disdagaid diibmu 22.35.

Varrasamosat: Sápmi

Váldoođđasat

Varrasamosat

Muualla Yle.fi:ssä