Sápmi

Ođđa Frozen-filmma jáhkket hohkahit turistavalvviid Sápmái – "Sápmelašvuođa ja sámeguovllu oidnon váikkuha álo buot sámi fitnodatdoalliide"

boazo sámi siida
Sápmelaš turismafitnodat "Boazo Sámi Siida" Álttás lea dahkan sámi eallima ja boazodoalu dovddusin iežas fitnodaga bokte 2000-logu rájes. Govva: Vidar Hoel

Disney ođđa Frozen II -filmma jáhkket geasuhit olu turisttaid ja mátkkálaččaid Sápmái.

Guhká vurdojuvvon Frozen-filmma joatkkaoasi máilmmi vuosttašeahket lei guokte vahku dassái Hollywoodis Los Angelesis. Suomas filbma čájehuvvo sihke suoma- ja davvisámegillii (Jikŋon II) vuosttaš geardde juovlamánu 25. beaivvi.

Frozen II -filmmas sápmelaččat ja Sámi luondu leat oidnosis ja stuorra rollas. Disney ovddasteaddjit gallededjege filmma ráhkadettiin sihke Suoma ja Norgga beale Sámis, ja oahpásmuvve sámi kultuvrii.

Daningo dán beakkán filmma jáhkket geasuhit ja olahit olbmuid miehtá máilmmi, sávvet dan maiddái buktit eanet turisttaid davás. Ovdamearkka dihte Visit Norway, mii ovddida Norgga mátkeealáhusa, jáhkká, ahte filmma geažil máŋgasat háliidit mátkkoštit Norgii ja vásihit sámi kultuvrra.

– Riikkaidgaskasaš trenda mátkeealáhussuorggis lea dakkár, ahte olbmot háliidit vásihit juoidá albma ja lunddolačča, ja earenomáš kultuvrraid, mat eai leat nu oahppásat. Dáinna mii áigut ávkkástallat márkanastimis, dadjá Visit Norway mediaspesialista Harald Hansen NRK Sápmái.

Frozen 2
Frozen-filmma joatkkaoasis oidnojit oahpes sámi duovdagat. Govva: ©2019 Disney

“Mii leat gergosat váldit eanet turisttaid vuostá”

Sámi turismafitnodat Boazo Sámi Siida Álttás lea gearggus váldit vuostá eambbo turisttaid.

Elen Solbritt Eira Utsi ovttas bearrašiinnis lea dahkan sámi eallima ja boazodoalu dovddusin iežas fitnodaga bokte 2000-logu rájes.

– Lea hirbmat earenomáš, ahte sámi kultuvra šaddá dovddusin miehtá máilmmi filmma bokte. Sávvamis olbmot leat sáhkkit ja háliidit diehtit eambbo sámiid birra. Mii leat goit gergosat váldit eanet olbmuid vuostá, dadjá Elen Solbritt Eira Utsi NRK Sápmái.

Visit Norway ovttasbarggai Disneyin jo vuosttaš Frozen-filmma buvttadeami áigge. Dalle filbmii vižže inspirašuvnna Norggas ja Norgga kultuvrras. Ovttasbarggu bokte turisttaid mearri lassánii mealgat. Eandalitge USA:s beroštišgohte mátkkoštit Norgii eanet.

Amerihkálaš mátkefitnodagat leat jo álgán márkanastit Frozen II -reaissuid Norgii, muitala Visit Norway mediaspesialista Harald Hansen.

– Dieđusge mii geavahit filmma márkanastimis nu olu go vejolaš. Lea goit vel váttis dadjat, man stuorra váikkuhus das lea.

“Filmmat ožžot olbmuid mátkkoštit”

Maiddái Suoma bealde jáhkket filmma lasihit beroštumi davi guovlluide ja buktit eanet turisttaid Sápmái.

Sápmelaš mátkeealáhus- ja fitnodatsearvvi njunuš Petteri Valle mielas lea buot sámi fitnodagaide buorrin, go Sápmi beaggá máilmmis.

– Álot, go miinu loktejuvvo bajás ja dat álgá oidnot medias, das lea ávki. Jáhkán, ahte Norgga beallái das lea eambbo ávki go deike Suoma beallái. Muhto álot go sápmelašvuohta ja dát min guovlu boahtá oidnosii, de dat váikkuha buohkaide, geat barget mátkeealáhusas, árvala Valle.

Petteri Valle
Ohcejohkalaš fitnodatdoalli Petteri Valle jáhkká, ahte ođđa Frozen-filbma buktá buriid buot sápmelaš fitnodatdoalliide. Govva: Vesa Toppari / Yle

Ohcejohkalaš Valles leat vásáhusat filbmabarggus ja dan positiiva váikkuhusain mátkeealáhussii. Valle bearraša bohccuin lei dehálaš rolla Ailo – Pienen Poron Suuri Seikkailu -filmmas, mii lea beaggán miehtá máilmmi. Go filmmat ráhkaduvvojit Sámis, de maiddái báikkit bohtet oidnosii buorebut, dadjá Valle.

– In mun gal lean ádden ovdal, ahte dat ná olu váikkuha. Dat oidno mu fitnodagas, ahte olbmot leat geahččan daid filmmaid ja bohtet miellagiddejumi dihte deike sámeguvlui. Gal das lea stuorra váikkuhus.

Visit Finland ii ávkkástala Frozen II -filmmain

Suoma mátkeealáhusa ovddidanorgána Visit Finland oažžu dávjá ovttasbargobivdagiid filbmabuvttadanfitnodagain ja seammás maiddái evttohusaid oktasaš márkanastimis.

Riikkaidgaskasaš márkanastima hoavda Heli Jimenez muitala, ahte Disney ii goit leat dán vuoro leamašan oktavuođas Visit Finlandii. Dan geažil Visit Finland ii leat plánen ávkkástallat ođđa Frozen-filmmain iežas márkanastimis.

– Go sis lea jo ovttasbargu Visit Norwayin, de ii Disney dalle šat álgge bargat ránnjáriikkain, árvala Jimenez.

Mátkeealáhussii filmmat ja tv-buvttadeamit leat šaddan dehálaš vuohkin márkanastit guovlluid ja geasuhit olbmuid.

– Jus jurddašit stuorra buvttademiid, dego The Lord of the Rings -filmma, de olbmot leat mátkkoštan govvenbáikkiide valvin. Filmmat ja tv-prográmmat lasihit guovlluid beaggima ja das lea positiiva váikkuhus seammás maiddái turismii, dadjá Heli Jimenez.

Varrasamosat

Muualla Yle.fi:ssä