Sápmi

Ođđa nákkosgirji čalmmustahttá nenetsaboazodoalliid njálmmálaš árbedieđu ja dasa laktaseaddji jávohuvvama – čuovo nákkosdilálašvuođa gáiddusin

Roza Laptander nákkosgirji dárkkistuvvo 29.4. diibmu 10 gáiddusoktavuođaid bokte.

Poroja Pohjois-Venäjällä.
Ođđa nákkosgirji čalmmustahttá erenoamážit dan, maid nenetsaboazodoallit guđđet muitalkeahttá njálmmálaš árbedieđu sirddedettiin. Govva: Fedoseyev Lev / AOP

Lappi universitehtas dárkkistuvvo otne gaskavahku Roza Laptander nákkosgirji, mii čalmmustahttá Jamala nenetsaboazodoalliid njálmmálaš árbedieđu ja erenoamážit jaskesvuođa ja jávohuvvama rolla njálmmálaš árbedieđus ja dan sirdimis.

– Nenetsat sirdet iežaset historjjálaš muitalusaid, árbedieđu ja persovnnalaš vásáhusaid buolvvas bulvii njálmmálaš árbedieđu bokte. Erenoamáš mearkkašahtti lea goittotge dat, mii báhcá muitalkeahttá ja manin, muitala Laptander Lappi universitehta dieđáhusas.

Laptander nákkosgirjji mielde nenetsaid jaskesvuhtii ja jávohuvvamii leat iešguđetlágan sivat. Sii soitet jaskesvuođain geahččalit suodjalit iežaset servodahkii dehálaš dieđu dahje sirdit dan ovddosguvlui jogo rahpasit dahje ii nu rahpasit. Jaskesvuođa sáhttá geavahit sihke muitima ja vajáldahttima veahkkin.

Roza Laptander nákkosgirji, When we got reindeer, we moved to live to the tundra: The Spoken and Silenced History of the Yamal Nenets, dárkkistuvvo gaskavahku 29.4. diibmu 10 gáiddusoktavuođaid bokte.

Nákkosgirjji čálli Roza Laptander lea Lappi universitehta Árktalaš guovddáža antropologiija dutkanjoavkku ja globálanuppástusa dutkanjoavkku lahttu. Iežas dutkamušain son lea beroštuvvan sosiolingvistihkas, antropologalaš gielladiehtagis, nenetsaid giela dokumenteremis ja Oarje-Sibirjjá nenetsaid njálmmálaš historjjás. Iežas bargguin son lea čállán nenetsaid boazodoalloservodagain ja daid dálá eallimis Jamala duottarguovllus.

Varrasamosat: Sápmi

Váldoođđasat

Varrasamosat

Muualla Yle.fi:ssä