Sápmi |

Ođđa olmmošvuoigatvuođaid searvi háliida doarjut ovttaskas olbmuid sámiid riekteriidduiguin

Sámi olmmošvuoigatvuođaid searvi ALVA lea vuođđuduvvon ovddidit sápmelaččaid iešmearridanvuoigatvuođa.

Nákkosgirjedutki Piia Nuorgam
ALVA-searvvi ságadoalli Piia Nuorgam. Govva: Inger-Elle Suoninen / Yle

Go Suoma beale Sámis ságastallet sápmelaččaid rivttiin, dávjá bohciida sáhka erenoamážit sápmelaččaid guolástanvuoigatvuođain. Daid ovdii leat otne duorastaga gearregastimin vihtta sápmelačča Veahčakis ja Ohcejogas, geat stáhta lobiid haga guolástedje iežaset ruoktojogain beannot jagi dassái. Sin ášši ovdii bargá maiddái gieskat vuođđuduvvon searvi, Sámi olmmošvuoigatvuođaid searvi ALVA.

ALVA-searvi lea nannosit kampanjeregoahtán eandalii Veahčajoga lobihis bivdiid beales. Sin áššis muitalit vuđolaččat searvvi neahttasiiddus: "Buot njeallje áššáskuhtton guolásteaddji gullet báikkálaš sápmelaš sogaide, mat leat bivdán guoli Deanu čázádagain jahkečuđiid. Luossabivdu gullá luvvekeahtes oassin čáhcegátti sápmelaččaid kultuvrii."

Kampánjas čogget ruđa lobihis bivdiid diggegoluide. Searvvi ságadoalli, Piia Nuorgam, guhte lea ovtta Veahčajoga bivdi oabbá, muitala, ahte searvvi ulbmil lea doarjut ovttaskas olbmuid dákkár riekteriidduiguin.

– Mis lea guhká Suoma bealde váilon dakkár searvi, mii barggašii dušše olmmošvuoigatvuođaiguin. Háliideimmet doarjut ovttaskas olbmuid dákkár viiddit áššiid doalvumis ovddosguvlui, de dát orui buorre liiba ja muddu vuođđudit dán searvvi.

Boahttevuođas áigot maiddái geavahit návccaid earret eará dutkamušaid ja čielggademiid dahkamii sámi olmmošvuoigatvuođain ja juohkit dieđu ja muitalit daid birra sámegillii. Dasa lassin áigot cealkit, dahkat álgagiid ja doaibmat gulahallanlávdin daid olbmuide, geat leat beroštuvvan olmmošvuoigatvuođain.

Searvvi duohken leat dán muttus logemat olbmo. Dat lea ožžon doarjaga maiddái sámedáiddáriin, go Niillas Holmberg, Jenni Laiti ja Outi Pieski leat skeŋken Rájácummá-dáiddaprošeavttas dahkkon Rájácummá távvala ALVA-searvvi mediakampánja atnui. Sámemusihkkár Sofia Jannok fas lea addán lobi geavahit iežas musihka kampánja filmmain.

Varrasamosat: Sápmi

Váldoođđasat

Varrasamosat

Muualla Yle.fi:ssä