Sápmi

Ođđa Sámediggi: ovcci dálá lahtu jotket, njeallje boares lahtu máhccet ja gávcci áibbas ođđa lahtu álggahit

Saamelaiskäräjät 2020-2023
Suoma Sámediggi 2020–2023. Govva: Vesa Toppari / Yle

Ođđa Sámedikki gaskaahki lea 49 jagi ja masá bealli áirasiin bargá boazodoalus. Loga lasi dán artihkkalis!

Suoma ođđa Sámedikkis 2020–2023 jotket ovcci dálá áirasa ja álggahit gávcci ođđa lahtu, geat eai leat ovdal leamaš Sámedikkis. Dasa lassin Sámediggái máhccet njeallje olbmo, geat leat goasnu árat doaibman Sámedikki lahttun.

Anára gielddas Sámediggái válljejuvvojedje lahttun stuorámus jietnameriin guolásteaddji, ealáhatolmmoš Kari Kyrö (220, dálá lahttu), sosionoma ja gárrenávnnasbargi Anu Avaskari (183, dálá lahttu) ja badjealmmái Veikko Feodoroff (134, dálá lahttu). Anára várrelahttun šattai vuorbádeami bokte anárašgiela ávnnasoahpaheaddji ja vuovdedoalloinšeneavra Teija Linnanmäki (61, ođđa lahttu).

Inarin saamelaiskäräjäedustajat 2020-2023
Anára gieldda dihtomeriin válljejuvvon áirasat 2020–2023. Govva: Vesa Toppari / Yle

Eanodaga gielddas Sámediggái válljejuvvojedje lahttun stuorámus jietnameriin badjealmmái Tuomas Aslak Juuso (127, dálá lahttu), oahpaheaddji Ulla-Maarit Magga (98, dálá lahttu) ja doseanta ja universitehtadutki Pigga Keskitalo (88, dálá lahttu). Eanodaga várrelahttun válljejuvvui artista ja universitehtastudeanta Niko-Mihkal Valkeapää (57, ođđa).

Enontekiön saamelaiskäräjäedustajat
Eanodaga gieldda dihtomeriin válljejuvvon áirasat 2020–2023. Govva: Vesa Toppari / Yle

Ohcejoga gielddas Sámediggái válljejuvvojedje lahttun stuorámus jietnameriin jurista Anne Nuorgam (167, dálá lahttu), sosiálapolitihkalaš áššedovdi Anni Koivisto (160, ođđa lahttu) ja badjealmmái Asko Länsman (145, máhccan lahttun, dálá várrelahttu). Ohcejoga várrelahttun válljejuvvui oahpaheaddji Sammol Antti Lukkari (46, ođđa).

Utsjoen saamelaiskäräjäedustajat, saamelaiskäräjät 2020-2023
Ohcejoga gieldda dihtomeriin válljejuvvon áirasat 2020–2023. Govva: Vesa Toppari / Yle

Soađegili gielddas Sámediggái válljejuvvojedje lahttun stuorámus jietnameriin biergočuohppi Juha Alakorva (80, ođđa lahttu), doavttir Karen-Anni Hetta (78, ođđa lahttu) ja vuorbádeami bokte ealáhatolmmoš, hearrásduopmár Jouni Äärelä (34, ođđa lahttu). Soađegili várrelahttun válljejuvvui dáiddár Matti Aikio (34, ođđa).

Sodankylä saamelaiskäräjäedustajat, saamelaiskäräjät 2020-2023
Soađegili gieldda dihtomeriin válljejuvvon áirasat 2020–2023. Govva: Vesa Toppari / Yle

Gielddaid dihtomeriid maŋŋá jietnameriin Sámediggái válljejuvvojedje lahttun fitnodatolmmoš ja studeanta Inka Kangasniemi (115, ođđa lahttu) Anáris, gávpediehtagiid magisttar, MSc Pirita Näkkäläjärvi (106, máhccan lahttu) Anáris, badjealmmái ja lektor Magreta Sara (88, dálá lahttu) Anáris, badjealmmái Leo Aikio (85, ođđa lahttu) Anáris, rádjesoalddát Aslak Pekkala (74, ođđa lahttu) Anáris, dáidaga magisttar Tanja Sanila (72, dálá lahttu) Anáris, badjealmmái ja oahpaheaddji Tauno Ljetoff (70, ođđa lahttu) Anáris, fitnodatolmmoš ja ealáhatolmmoš Veikko Porsanger (67, máhccan lahttu) Ohcejogas ja filosofiija doavttir Irja Seurujärvi-Kari (63, máhccan lahttu) Helssegis.

Äänimäärillä valitut saamelaiskäräjät 2020-2023
Jietnameari vuođul válljejuvvon áirasat 2020–2023. Govva: Vesa Toppari / Yle

Eanemus davvisámegielagat ja Anára ovddasteaddjit

Ođđa Sámedikkis leat čielgasit eanemus davvisámegielat áirasat. 21 lahtus 11:s leat almmuhan Yle Sámi válgamášenis iežaset eatnigiellan davvisámegiela, logis leat almmuhan giellan dušše suomagiela ja okta nuortalašgiela. Okta áirras lea almmuhan iežas eatnigiellan sihke suoma- ja davvisámegiela.

Jietnameriin válljejuvvon olbmuin stuorámus oassi leat Anára evttohasat. Dat dahká dan, ahte ođđa Sámedikkis sullii bealli leat Anára ovddasteaddjit, 10 lahtu. Ohcejogas ođđa Sámedikkis leat njeallje lahtu, Soađegilis ja Eanodagas golbma lahtu, ja sámeguovllu olggobealde dušše okta lahttu.

Ođđa Sámedikki áirasiin gávccis leat almmuhan, ahte barget boazodoaluin, guđas iešguđetlágan oahpahanbargguin, njealjis studerejit ja golmmas leat ealáhagas. Áirasiin leat maiddái moadde dáiddára ja fitnodatdoalli.

Gaskaahki lea 49 jagi

Ođđa Sámedikki gaskaahki lea 49 jagi. Nuoramus áirras lea Karen-Anni Hetta Soađegilis, 26 jagi, ja boarrásamos Kari Kyrö Anáris, 76 jagi.

Ođđa Sámedikki sohkabeallejuohku lea hui dássit, lahtuin 11 leat nissonolbmot ja 10 almmáiolbmot.

Sámediggeválggain addojuvvojedje 2853 jiena. Suoma sámediggeválggas jienastanvuoigatvuohta lea 5873 olbmos, nu ahte eahpevirggálaš jienastanproseanta lea dán dilis 48,58. Válgalávdegoddi ii sáhttán váldit vuhtii 290 jiena.

Sámediggeválgga buot bohtosiid sáhttá geahččat Yle Sámi válgaboađusbálvalusas.

Dárkkálmahtton 2.10. diibmu 11.36: Ođđa lahtuid gielain háladettiin dárkkálmahtton, ahte sii leat almmuhan válgamášenis iežaset eatnigiela.

Varrasamosat

Muualla Yle.fi:ssä