Sápmi

Ođđa sámegielat vloggejeaddji atná dehálažžan sámegiela oidnoma Youtubes – "Háliidan čájehit sámeeallima"

Britt-Inger Ruotsala
Britt-Inger Ruotsala hálida vlogga bokte loktet sámegiela oidnosii maiddái Youtubes. Govva: Britt-Inger Ruotsala

Britt-Inger Ruotsala álggahii vlogga vai beasašii geavahit sámegiela eambo maiddái gávpotbirrasis.

Dál lea fas okta ođđa sámegielat youtubbar, go 19-jahkásaš Britt-Inger Ruotsala almmustahtii vuosttas vloggas (videoblog) gieskat. Ruotsala lea Heahtás eret, muhto orru dál Roavvenjárggas.

Ruotsala lea jurddašan vlogga álggaheami juo máŋga jagi, muhto dál beasai álgui, go fidnii teknihkalaš rusttegiid. Son liiko govvet ja editeret videoid.

– Osten alccen kamera giđđat, ja dan maŋŋá de govvegohten buotlágan diŋggaid, muitala Ruotsala.

Vuosttas videostis son muitala eambo iežas birra, ja geahčči beassá oaidnit makkár lea su dábálaš árgabeaivi. Boahttevuođas Britt-Inger Ruotsala áigu gieđahallat eará alcces dehálaš fáttáid, dego zero waste -jurddašeami.

– Lean plánen govvet reaisovideoid ja govvet iežan eallima, ja maiddái sámi árbevieruid, lohpida Ruotsala.

Su ulbmilin lea almmustahttit ođđa video oktii vahkus. Dál son lea govvemin nuppi video.

"Gávpogis in beasa sámástit – háliidan, ahte giella seailu"

Britt-Inger Ruotsala lea hárjánan ruovttustis Heahtás gullat ja geavahit sámegiela beaivválaččat, muhto go fárrii Roavvenjárgii, giella jávkagođii su árgabeaivvis.

Sámegielat vloggaid ráhkadeapmi lea buorre vuohki lasihit giela geavaheami, oaivvilda Ruotsala.

– Dáppe Roavenjárggas ii sáhte nu olu hupmat sámegiela. Mun háliidan, ahte mu giella seailu. Dál go mun human measta álot suomagiela, de lean fuobmán, ahte mu gielladáidu manná fuonit guvlui.

Iežas giellageavaheami lassin son atná dehálažžan, ahte sámegiella šaddá eambo oidnosii Youtubes.

– Leat moattis, geat dahket sámegillii videoid Youtubei, muhto jáhkán, ahte lean áidna Suoma beale sápmelaš, gii vlogge sámegillii, árvala Ruotsala.

"Jus hupmá sámegiela, galgá geavahit dan"

Vloggejeaddjit ja eará nu gohčoduvvon tubeteaddjit leat šaddan ođđaáigge nástin. Vloggaid ja eará videosisdoalu sáhttá gii beare luđet Youtubei olles máilbmái oaidnin láhkai.

Jus soapmásis lea miella geahččalit vlogiid ráhkadeami, leat Britt-Inger Ruotsalas moadde rávvaga.

– Gánneha leat buorre kamera ja editerenprográmma, ja galgá smiehttat, ahte makkár fáttáid birra hálida dahkat videoid. De ii leat go beare álgit. Dat lea váttis álggus, muhto dat gal manná buoret guvlui mađi eambo govve.

– Galgá geahččalit, ja jus hupmá sámegiela, de galgá áinnas geavahit dan, deattuha Ruotsala.

Britt-Inger Ruotsala lei mielde dán vahku Sohkaršohkas. Guldal sáddaga Yle Areenas dahje nuppádassii radios bearjadaga diibmu 17.30–20.00.

Varrasamosat

Muualla Yle.fi:ssä