Sápmi |

Ođđa váidalanbálggis ekonomalaš, sosiálalaš ja čuvgehušlaš vuoigatvuođain

Váidalusaid sáhttet dahkat eaŋkalolbmot dahje priváhtaolbmuid joavkkut, geat čuoččuhit máinnašuvvon soahpamušriikka loavkidan sin TSS-oktasašsoahpamušas dovddastuvvon ekonomalaš, sosiálalaš ja čuvgehušlaš vuoigatvuođaid, čállá sámediggi dieđáhusas.

TSS-soahpamuš lea okta ON olmmošvuoigatvuohtasoahpamušain, mii guoská ekonomalaš, sosiálalaš ja čuvgehuslaš vuoigatvuođaid. Govva: Yle / Aletta Lakkala

Suopma lea ratifiseren nu gohčoduvvon TSS-soahpamuša beavdegirjji eaŋkalolbmo váidalusain. TSS boahtá suomagiel sániin Taloudellisia, sosiaalisia ja sivistyksellisiä oikeuksia koskeva kansainvälinen yleissopimus (Ekonomalaš, sosiálalaš ja čuvgehuslaš vuoigatvuođaid guoski álbmogiidgaskasaš oktasašsoahpamuš).

TSS-soahpamuš lea okta Ovttastuvvan Našuvnnaid olmmošvuoigatvuohtasoahpamušain. Dat lea namalassii ekonomalaš, sosiálalaš ja čuvgehuslaš vuoigatvuođaid oktasašsoahpamuš, man Suopma lea ratifiseren jo jagis 1976.

Ođđa váidalanbálggis

Dál ratifiserejuvvon molssaevttolaš beavdegirji eaŋkalolbmo váidalusain boahtá fápmui cuoŋománu maŋimuš beaivve.

- Váidalusaid sáhttet dahkat eaŋkalolbmot dahje priváhtaolbmuid joavkkut, geat čuoččuhit máinnašuvvon soahpamušriikka loavkidan sin oktasašsoahpamušas dovddastuvvon ekonomalaš, sosiálalaš ja čuvgehušlaš vuoigatvuođaid, čállá sámediggi dieđáhusas.

Ovdamearkkat dákkár vuoigatvuođain leat iešmearridanvuoigatvuohta ja vuoigatvuohta oassálastit kultureallimii, návddašit dan ovdduin sihke návddašit dieđalaš, girjjálaš dahje dáiddalaš buktagiid heakkalaš ja ávnnaslaš ovdduide addojuvvon suojis.

Váidalusat dahkkojuvvojit TSS-komiteai, mii gohcá soahpamuša ollašuhttima.

Ávžžuhusat Supmii sámiid vuoigatvuođaid birra

TSS-komitea lea addán ovddit ávžžuhusa Supmii jagi 2007.

- Jagi 2007 komitea lea ávžžuhan Suoma, ahte Suopma ollašuhttá buot dárbbašlaš doaimmaid, main sihkkarastojuvvo, ahte vuovdečuollamat ja eará doaimmat, maid priváhta olbmot dál ollašuhttet sámiid ruovttuguovllus, eai gáržžit sámiid vuoigatvuođa doalahit ja ovddidit árbevirolaš kultuvrra ja eallinvuogi, erenoamážit boazodoalu, eaige sin ekonomalaš, sosiálalaš ja čuvgehuslaš vuoigatvuoiđaid geavaheami, sámedikkis čállet.

- Lassin komitea ávžžuha soahpamušriikka – ráđđádallamiin áššis čavga buot oassebeliiguin, sámedikki mielde maid – gávdnat áššáigulavaš čovdosa gažaldahkii eanaoamsteamis ja -geavaheamis sámiid ruovttuguovllus sihke ratifiseret farggamusat iehčanas riikkaid eamiálbmogiid guoski ILO:a oktasašsoahpamuša Nr 169.

Suopma attii guđát raportta  TSS-soahpamuša ollašuhttimis Suomas 5.7.2011. Raporta gieđahallojuvvo komitea 53. čoahkkimis Geneves skábmamánus 2014. Sámediggi lea addán čealkámuša TSS-soahpamuša ollašuhttimis Suomas jagi 2010 . 

Varrasamosat: Sápmi

Váldoođđasat

Varrasamosat

Muualla Yle.fi:ssä