Sápmi |

Oanehaččat: Aikasalo Ohcejoga searvegotti girkohearrán, boazodoarjja seamma dánge jagi, Romssa fylkkajuoigin ohccit maiddái Suoma bealde, dán geasi eai soaitte nu olu sarrihat ja Kaamos-ráiddu buvttadanfitnodat ohcaluvvon konkursii

Dás leat duorastaga oanehis ođđasat.

Päivi Aikasalo
Päivi Aikasalo válljeujuvvui Ohcejoga searvegotti girkohearrán. V Govva: Anneli Lappalainen / Yle Sápmi

Guldal dás duorastatiđida Yle Ođđasiid Sámis. Jietna: Yle Areena.

Aikasalo Ohcejoga searvegotti girkohearrán

Päivi Aikasalo lea válljejuvvon Ohcejoga searvegotti girkohearrán 1.9.2019 rájes.

Oulu bismagotti duopmokapihttal mearridii áššis čoahkkimisttis geassemánu 18. beaivve.

Boazodoarjja seamma maid dán jagi

Boazodoalu álbmotlaš doarjja ovtta ealli bohccos lea maid dán jagi 28,50 euro. Doarjaga mákset oktiibuot 4,5 miljovnna euro ovddas sullii 900 biebmogoddái.

Boazodoarjja vuođđuduvvá Eurohpá kommišuvnna mearrádussii. Doarjaga oažžuma eaktun lea, ahte biebmogotti olbmot oamastit boazodoallojagi loahpas unnimustá 80 eallibohcco.

Romssa fylkkajuoigin ohccit maiddái Suoma bealde

Romssa fylkkajuoigi virgái leat boahtán oktiibuot 13 ohcamuša. NRK Sámi dieđuid mielde Suoma bealde fylkkajuoigin leat ohcan Ulla Pirttijärvi-Länsman ja Ingá Máret Gaup-Juuso. Maiddái Niko Valkeapää lea okta ohcciin.

Ohcciid joavkkus leat maiddái eará dovddus juoigit ja neavttárat, earret eará Johan Anders Bær, Mikkel Gaup ja Sara Margrethe Oskal.

Romssa fylkkajuoigi bargun lea johttit ja doalvut luođi smávit báikkiide. Ortnet álggahuvvui 1990-logu álggus ja vuosttaš fylkkajuoigi lei Inga Juuso. Ulla Pirttijärvi-Länsman doaimmai fylkkajuoigin jagis 2016. Jagi 2017 rájes fylkkajuoigin lea doaibman Marja Mortensson.

Sarrihat eai soaitte šaddat nu olu dán geasi

Sarritšaddu orru báhcime dán geasi gaskamearalažžan, dieđiha Luondduriggodatguovddáš. Máŋggain sajiin Lappis sarrit lieđđu ain.

Luomešaddu fas sáhttá šaddat dán jagi juobe earenoamáš buorre, go lieđit leamašan valjis Luondduriggodatguovddáža dárkunbáikkiin. Mátta-Lappi guovllus idjabuollašat leat goit sáhttán cikcut liđiid muhtin sajiin.

Kaamos-ráiddu buvttadanfitnodat ohcaluvvon konkursii

Ohcejogas álgojagis govvejuvvon Kaamos-rihkusráiddu buvttadanfitnodaga, Mogul Movies, leat ohcalan konkursii. Sivvan konkursaohcamuššii leat mávssekeahtes vearut. Konkursaohcamuš lea dahkkon mannan mánnodaga. Áššis muitala Helsingin Sanomat.

Buvttadanfitnodagas leat leamašan váttisvuođat ráiddu ruhtadeamis ja bálkkáid máksimis. Guovvamánus Lapin Kansa muitalii, ahte jahkedoajáladagas Ohcejogas govvejuvvon ráiddus veahkehan báikkálaččat ledje báhcán bálkkáideaset ja eará ruhtaoažžumiid haga.

Buvttadanfitnodat Mogul Moviesii lea merkejuvvon ovdal mánnodaga konkursaohcamuša oktiibuot 36 máksinhehttehusa dahje eará vealgediehtomerkejumi. Oktiibuot mávssekeahtes rehkegat leat badjel 225 000 euro ovddas.

Varrasamosat: Sápmi

Váldoođđasat

Varrasamosat

Muualla Yle.fi:ssä