Sápmi |

Oanehaččat: Almmái gahčai fatnasis Ohcejogas, Ailu Valles ođđa musihkkavideo, čáhci galbmasut go dábálaččat ja Njuohttejohkii ođđa heaŋgášaldi

Dás leat vahku maŋimuš oanehis ođđasat.

Anárjávri geassit 2019.
Anárjávrri čáhci lea leamaš galbmasut go dábálaččat. Govva: Kaija Länsman / Yle

Almmái gahčai fatnasis Ohcejogas

Duorastaga 18.7. maŋŋit eahkedis almmái gahčai fatnasis Bárššis, Ohcejogas. Son beasai ieš gállit gáddái.

Vuosttasdikšun finai dárkkisteamen su dili ja gádjunlágádus vieččai fatnasa gáddái.

Almmuhus dáhpáhusas bođii eahkedis sulaid diibmu 22.20.

Ailu Valles ođđa musihkkavideo

Musihkkár Ailu Valles lea almmustuvvan ođđa musihkkavideo. Musihkkavideo lea dahkkon šukŋii Suga suga. Dat lea Valle vuosttaš single su goalmmát soloskearrus Viidon sieiddit.

Musihkkavideo lea buvttadan STM Production X Taikavasara Photography.

Ailu Valle almmustahttá Viidon sieiddit -skearru 27.7. Márkomeannu-festiválas Gállogiettis Norgga beale Sámis. Seamma áiggiid skearru almmustuvvá digitála musihkkabálvalusain.

Čáhci galbmasut go dábálaččat

Čoaska dálkkit leat váikkuhan čáziid temperatuvrraide. Njellimis mihtiduvvon Anárjávrri temperatuvra lea birasguovddáža mihtideamis leamaš vuollel 14 gráđa, mii lea sulaid guokte ja bealle gráđa uhcit go guhkes áiggi gaskaarvu. Soađegili Unari temperatuvra lea measta golbma gráđa galbmasut go dábálaččat. Maiddái Gilbbesjávrri čázi temperatuvra lea galbmasut go gaskamearalaččat.

Njuohttejohkii ođđa heaŋgášaldi

Njuohttejohka Urho Kekkosa álbmotmeahcis oažžu ođđa heaŋgášalddi.

Suoma riikkabeaivvit juolludii ruhtadeami šalddi ođasmahttimii mannan juovlamánus. Meahciráđđehusas muitalit, ahte šalddi plánen álggahuvvo geasseluomuid maŋŋá ja ieš šalddi huksen dáhpáhuvvá boahtte geasi. Njuohttejoga Kolsankoski dálá, heittot ortnegis leahkki šalddi sadjái áigot hukset metállamateriálain heaŋgášalddi. Šalddi árvalit gárvánit badjelaš jagi geažes. Suoma riikkabeaivvit lea várren šalddi huksemii 300 000 euro.

Varrasamosat: Sápmi

Váldoođđasat

Varrasamosat

Muualla Yle.fi:ssä