Sápmi

Oanehaččat: Anára boares skuvlii sávnnit, turisttaid dihte dárbbašit lasi buohccedivššáriid, Sámi guovllus báhčán njeallje guovžža ja skuvlejupmi kannabisa geavaheami heaitima doarjjan

Dá leat gaskavahku oanehis ođđasat.

Anára girkosiidda boares skuvlavistti leat vuovdán ja dohko plánejit earret eará sávnniid. Govva: YLE / Sauli Antikainen

Anára boares skuvlii visttit ja sávnnit

Anára girkosiidda boares skuvla lea vuvdojuvvon, čállá Lapin Kansa -aviisa. Skuvlla oktan eatnamiin lea vuvdojuvvon badjelaš 250 000 euro hattiin.

Giddodaga oastán Konewatt-fitnodat lea plánen skuvlii earret eará visttiid ja duddjonlanjaid, jus fal giddodat lea buorre ortnegis. Plánan lea maid huksehit ovddeš skuvlii sávnniid, main lea oainnus Anárjávrái.

Dárbbašit turisttaid dihte lasi dearvvasvuođasuorggibargiid

Lassánan turistamearri buktá lassigoluid Anára gieldda dearvvasvuođasuorgái. Anáris eai leat olus priváhtadoavttirbálvalusat fállun, de danne turistat ohcalit Avvila dearvvasvuođaguovddážii dikšui, jus buohccájit luomu áigge.

Jagi 2015 rájes olgoriikalaš buohccán turisttaid mearri lea lassánan 67%. Juovllaid, ođđa jagi ja beassážiid áigge fitnet eanemus turisttat divššuheamen iežaset Avvila dearvvasvuođaguovddážis.

Sosiála- ja dearvvasvuođalávdegoddi leage evttohan gielddaráđđehussii, ahte Anára gildii ferte turisttaid dihte bálkkáhit lasi dearvvasvuođasuorggi bargiid.

Dárbu lea goit guovtti buohccedivššárii ja vel ovtta fásta doaktárii.

Váldostivrra mearrida juovlamánus, ahte vuođđuditgo dili dihte ođđa bargosajiid.

Sámi guovllus báhččojuvvon njeallje guovžža

Dán čavčča Sámi guovllus leat goddon guovžžat Bárttehis, Áŋŋelis, Rájijovsseha ja Njellima gaskkas ja vel Vuohčus.

Daid lassin leat báhčán guokte guovžža áiddo Lappi bálgosa rájá máttabealde. Dieđut čilget fuođđoguovddáža neahttasiiddus. Dieđuid ođasmahttet dan mielde go fuođđoguovddáš oažžu sálašdieđuid bivdiin.

Dán jagi nuorttabeale boazodoalloguovllus oažžu báhčit 70 guovžža ja oarjjabealde 15 guovžža. Nuorttabealde oažžu bivdit vel ovcci guovžža ja oarjjabealde vihtta.

Skuvlejupmi kannabisa geavaheami heaitima doarjjan

Anáris ja Heahtás ordnejit skuvlejumi kannabis-nárkomirkko geavaheami geahpedeamis ja geavaheami heaitima doarjjan.

Skuvlejupmi lea oassálastiide nuvttá. Skuvlejumit leat Anáris SámiSostera Doaibmaviesus, duorastaga 19.9. diibmu 10 ja Heahtás bearjadaga 20.9. diibmu 10, nuoraidlatnja Kieppis.

Skuvlejumi materiálat leat jorgaluvvon maiddái davvisámegillii. “Dáppe oažžu hállat kannabisas” -materiálat leat dárkkuhuvvon earenoamážit veahkkin, go hállojuvvo kannabisa geavaheamis.

Skuvlejupmi heive gielddaid ja organisašuvnnaid gárrenávnnasbargiide, nuoraidbargiide, oahppidearvvasvuođabargiide ja mánáidsuodjalusa bargiide.

Varrasamosat: Sápmi

Váldoođđasat

Varrasamosat

Muualla Yle.fi:ssä