Sápmi |

Oanehaččat: Anárjoga čáhci buhtis, turisttaid váruhit rahkki sarváin, rievssahiid leat lohkan ja ohcet hálddahusplánejeaddji

Loga dás maŋŋebárgga oanehis ođđasiid.

Anárjohka, Inarijoki
Lappi EBI -guovddáža dutkamiid mielde Anárjoga čáhci lea buhtis. Govva: Jouni Aikio / Yle

Lappi EBI-guovddáš: Anárjoga čáhci buhtis

Anárjoga čázis eai leat gávdnan nuoskivuođaid. Lappi EBI-guovddáš lea dutkan Anárjoga čázi Gáregasnjárggas čáhcebuhtistanlágádusa bajábealde ja vulobealde. Čáhceanalysain eai leat gávdnan makkárge earenoamáš árvvuid dábálaš árvvuid ektui, dadjá biologa Jukka Ylikörkkö Lappi EBI -guovddážis.

Ylikörkkö dadjá, ahte čáhcebuhtistanlágádusasge eai leat almmuhan váttisvuođain.

Váruhit fas rahkki sarváin – ovddit jagiid fallehan vánddardeddjiid ala

Bálgosiid ovttastus váruha olbmuid fas rahkki sarváin. Ragat álgá čakčamánu loahpabealde ja bistá gitta golggot-skábmamánnui. Bálgosiid ovttastus lea juo jahkeviissaid váruhan turisttaid rahkki sarváin.

Ovdamearkka dihte jagis 2014 rahkki sarvvis fallehii Pallas guovllus vánddardeaddji ala ja vánddardeaddji gáibidii boazoeaiggádiin buhtadusaid falleheami dihte. Áššis muitaledje dalle Lapin Kansa ja Ilta-Sanomat. Bálgosiid ovttastus bivdá maiddái olbmuid almmuhit bahás sarváin bálgosiidda dahje Bálgosiid ovttastussii.

Rievssahiid mearri bisson seammán ovddit jagi dásis, muhto geahppánan jagi 2015 dásis

Rievssahat, riekot, Luke, tilastot
Rievssahiid mearri lea molsašuddan ollu 2000-logus. Govva: Luke
Golmma davimus gielddas leat lohkan rievssahiid meari. Lohkamiid mielde rievssahiid mearri lea lahka guhkes áiggi gaskaárvvu, mii lea 7,6 rievssaha ovtta njealjehaskilomehteris.

Luondduriggodatguovddáš Luke dieđuin jagi 2017 maŋŋá rievssahiid mearri lea veháš lassánan. Luke dieđuid mielde Ohcejogas rievssatnálli lea vehá bajábealde gaskaárvvuid ja doppe rievssahat maid leat vehá lassánan ovddit jagiid ektui. Eanodagas ja Anáris rievssahiid mearri lea bisson moatti ovddit jagi dásis.

Jagi 2015 meriin rievssahiid mearri lea čielgasit geahppánan vaikko maŋimuš jagiid nálli lea laskan.

Ohcet plánejeaddji válmmaštallat bargiidhálddahussii guoski bargguid

Sámediggi ohcá mearreáigásaš hálddahusplánejeaddji. Plánejeaddji bargun lea hálddahushoavdda stivrejumis válmmaštallat almmolaš- ja bargiidhálddahussii guoski bargguid.

Bargu álgá soahpamuša mielde ja bistá dán jagi lohppii. Ohcamušaid oktan mildosiiguin galgá doaimmahit Sámedikki čállingoddái čakčamánu 9. beaivve rádjái.

Varrasamosat: Sápmi

Váldoođđasat

Varrasamosat

Muualla Yle.fi:ssä