Sápmi |

Oanehaččat: Arctic skills -gilvvu sámesurggiid vuoitu Sápmái, Deanu guolastanlobiid vuovdin álgá, Lappi guovllus jienastanmokta ja Helssegis fállet davvisámegiela álgooahpuid

Loga dás gaskavahku oanehis ođđasiid.

Tenojoki
Govva: Vesa Toppari / Yle

Guldal dás gaskavahku Yle Ođđasiid Sámis. Jietna: Yle Areena

Arctic skills -gilvvu sámesurggiid vuoitu Sápmái

Dán jagáš Arctic Skills -gilvvu boazodoalu suorggi vuoitu manai Norgga beale Sápmái ja duodjesuorggi vuoitu fas Suoma beallai. Arctic skills -gilvvu boazodoalus vuittii Guovdageainnu Sámi joatkkaskuvlla ja boazodoalloskuvlla oahppi Johan Nikolai Triumf. Duodjegilvvu fas vuittii Anára Sámi oahpahusguovddáža duodjeoahppi Tiina-Maria Aalto.

Arctic skills -gilvvuin Barents-guovllu ámmátskuvlla oahppit gilvaledje 16 iešguđet suorggis Girkonjárggas álgovahkus. Mielde ledje ámmátskuvlaoahppit Norggas, Ruoŧas, Ruoššas, Suomas ja Sámis.

Deanu guolastanlobiid vuovdin álgá

Deanu guolástanlobiid vuovdin álgá otne gaskavahku. Turisttaide oaivvilduvvon stággobivdolobit leat vuovdinláhkai diibmu logi rájes. Fanasbivdolobiid fas vuovdigohtet bearjadaga seamma áigge.

Bivdolobiid sáhttá várret ja oastit Deanu guolástanlohpegávppis.

Ovdajienasteapmi nogai – Lappi guovllus jienastanmokta

Lappi eanagotti olbmot leat dán háve jienastan ovddalgihtii riikkabeaiválggain eanet go goassige ovdal dán jahkeduháha áigge. Badjel 62 000 olbmo Lappi eanagottis jienastedje ovddalgihtii. Dat lea oktiibuot 44 proseantta Lappi jietnavuoigadahtton olbmuin ja 4000 olbmo eanet go ovddit riikkabeaiválggain. Sámeguovllu gielddain eanemus leat jienastan Soađegilis, doppe jienastanproseanta lea 44,2.

GieldaJienastusproseantaJienasteaddjit
Anár42,02409
Eanodat41,3636
Ohcejohka40,7396
Soađegilli44,23092

Dárkilut loguid gávdná dáppe.

Ovdajienasteapmi nogai ikte ja riikkabeaiválggain sáhttá vel jienastit áitosaš válgabeaivve boahtte sotnabeaivve.

Helssegis fállet davvisámegiela álgooahpuid

Helssega geasseuniversitehta lágida miessemánus davvisámegiela álgooahpuid.

Álgokurssas lea dárkkuhus mannat čađa árgabeaivválaš fáttáid ja sániid ja oahpahallat sámegiela jietnadeami ja giellaoahpa vuođđóáššiid. Kursa lágiduvvo miessemánu 6.–27. beivviid ja dan oahpaha Risten Mustonen. Almmuheapmi nohká cuoŋománu 30. beaivve.

Lassidieđuid gávdná dáppe.

Varrasamosat: Sápmi

Váldoođđasat

Varrasamosat

Muualla Yle.fi:ssä