Sápmi |

Oanehaččat: Avvila seaŋgaossodagas galledangielddus ain fámus, Kulturruhtarájus ruhtadeapmi sámedáidagii ja -dutkamuššii, The Barents Observer almmustuvvagoahtá kiinnágillii

Dá leat duorastaga oanehis ođđasat.

Ivalon terveyskeskus.
Avvila dearvvašvuođaguovddáža seaŋgaossodaga gallestallangielddus joatkašuvvá. Govva: Sauli Antikainen / Yle

Avvila seaŋgaossodagas galledangielddus ain fámus

Avvila dearvvašvuođaguovddáža seaŋgaossodaga gallestallangielddus joatkašuvvá vel gitta boahtte vahkku, vahkku 8 álgui. Galledemiid leat gieldán guovvamánu álggu rájes danin go seaŋgaossodagas njoammugođii norovirus. Dearvvašvuođaguovddážis dieđihit, ahte buot galledemiid, maid beare sáhttá, gánneha dál sirdit maŋŋelabbui.

Galledangildosiin geahččalit suodjalit sihke seaŋgaossodaga pasieanttaid ja maiddái gallededdjiid. Norovirus sáhttá leat buohcciolbmui heakkavárálaš, deattuhit dearvvašvuođaguovddážis.

Kulturruhtarájus ruhtadeapmi Heahtá musihkkabeivviide ja sámedutkamuššii

Suoma kulturruhtarádju lea juolludan veahkkeruđaid sihke kulturdáhpáhusaide ja dutkamuššii. Heahtá musihkkabeaivvit oažžu kulturruhtarádjosis 20 000 euro musihkkabeivviid ordnemii. Soađegili filbmafestiválii fas juolluduvvo 60 000 euro sturrosaš veahkkeruhta teáhterteknihkka ođasteapmái.

Professor Jouni Jaakkola ja su bargojoavku Oulus fas ožžot 100 000 euro dutkanbarggu várás, mas galget čielggadit mo sápmelaččat leat vuogáiduvvan dálkkádatnuppástussii ja mo dálkkádatrievdan váikkuha sámi kultuvrii. Dánsadáiddár Auri Ahola oažžu 24 00 euro dáiddalaš bargamii. Dáidagiid magisttar Matti Aikio fidne 7 500 euro davviriikalaš našunálastáhtaid ruossalas luondogaskavuođa nu gohčoduvvon spirepolitihka bokte dárkkodeaddji dáiddaollisvuođa ollašuhttimii. Filosofiija doavttir Marko Jouste oažžu 14 000 euro sámemusihkka komponeren- ja heivehanbargui sihke mátkegoluide.

Oktiibuot Suoma kulturruhtarádju juohká veahkkeruđaid dán jagi 39 miljovnna euro ovddas.

The Barents Observer almmustuvvagoahtá kiinnágillii

The Barents Observer álggaha kiinnágielat ođđasiid almmustahttima.

– Mii háliidit, ahte olbmot Kiinnás dihtet eanet min Árktalaš guovllus, dadjá The Barents Observer hoavda Atle Staalesen.

The Barents Observer -neahttaaviisa lea badjel 16 jagi doaimmahan ođđasiid davviguovllus sihke eaŋgalsgillii ja ruoššagillii. Dál mediaorganisašuvdna álggaha almmustahttima maiddái kiinnágillii. Dat lea vuosttaš aviisa Norggas, mii rahpá kiinnágielat ossodaga.

Varrasamosat: Sápmi

Váldoođđasat

Varrasamosat

Muualla Yle.fi:ssä